Dizionari de Lenghe Furlane

metisi sot    [CO]

1. loc.v. metisi in posizion plui basse, lâ li che si è sot di alc:  al jere un biel morâr che al faseve ombrene e mi soi metût sot a polsâ
   
   1. lâ tal jet:  un cjap di pinsîrs a navigâi pal cjâf, che nol veve voie di dispiardiju. A cisicavin jenfri di lui, bonâts dal sium, e no dulivin come la sere prime cuant che si jere metût sot, tor des undis (Nadia Pauluzzo, Il bintar)
      Sin. lâ sot , butâsi
2. loc.v. metisi intor alc, sot dai vistîts:  si veve metût sot il costum e al veve dutis lis intenzions di gjoldisi il daspomisdì rinfrescjantsi tes aghis netis dal Anaxum, come che lu clamave lui (Raffaele Serafini, Soreli jevât a mont)
3. loc.v. fâ alc cun impegn:  no je une persone che e vebi autoritât e volontât di metisi sot e di sburtâ indenant une barache intrigose di chê fate (Josef Marchet, Lis predicjis dal muini); a Mariane no i vanzave trop timp di lambicâsi. Lis voris la tignivin impins di matine fintremai gnot, su e jù pal ronc. E ancje Firmato al scugnive metisi sot. Al veve juste il timp di fâ i compits, a pene gustât. E dopo ancje lui vie, daûr di sô mari (Gianni Gregoricchio, Îr e doman)
   Cfr. metisi a vore , metisi in vore
4. loc.v. metisi intune cundizion subordenade:  simpri pronts a metisi sot di un o di chel altri sorestant par cjatâ protezion (Angelo Floramo, La disubidience civîl e armade dai furlans cuintri dal Leon)

Components:

• metisi v.pron.intr., v.pron.tr.
• sot prep., av., adi.inv., s.m.sing.