Dizionari de Lenghe Furlane

butâsi  bu|tâ|si  [FO]

1. v.pron.tr., v.pron.intr. viôt butâ
2. v.pron.tr. butâ alc un cun chel altri o un cuintri di chel altri:  a si impense […] das frutis che a saltavin cu la cuarde, a zuavin di campo o di butâsi la bale o il cercli (Federico Morocutti, Tumieç e il ventesim secul)
3. v.pron.tr. butâ alc intor di se stes, o metisi intor un cul altri:  si butà sul cjâf un façoletat e un grumâl intor de panze (Pieri Menis, Il fi de Rosse)
4. v.pron.intr. petâ un salt:  il brâf on si butà di un lamp su la sponda de la barcja vicina (Federigo Comelli, Il me paîs)
   Sin. lançâsi , plombâ , precipitâsi , proietâsi , saltâ , scaraventâsi , slançâsi
5. v.pron.intr. (ancje scherç.) fâsi colâ dal alt o lâ cuintri alc par copâsi:  isal chest ce che tu vuelis? No, pluitost mi buti intal poç! (Gianni Gregoricchio, Trê feminis); jo… ma jo i mi copi, i vai a butâmi pal cret di Picjàs (Novella Cantarutti, Il cosacut); ma va a butiti te Ledre, çondar! (Redazion Udinetoday, Opoku invitato da Wikipedia a "butâsi te Ledre")
6. v.pron.intr. metisi sentât o distirât:  le convincerin a butâsi une orute intal jet (Gianni Gregoricchio, Trê feminis); cu lis mans su la muse si bute sul sofà sbrendolôs e si met a vaî come un frutin (Pieri Menis, Il tesaur di done Cheche); si bute sfinide suntune cjadree poiant il cjâf sui braçs incrosâts (Pieri Somede dai Marcs, Un pugn di moscjis)
   Sin. saltâ , slançâsi , traisi
   
   1. (ass.) metisi a durmî:  ce pastiliis ve, siôr dotôr! Ce agarolis! Un bocâl di lat cjalt bolint e un cuintin di aghe di vite dentri; e butâsi. E sù cuzinis e sfilzadis (Meni Ucel, Tant parom); prime di lâ un fregul a butâsi, il predi mi pree di cori a visâ il professôr di violin che il capelan di Lussarie al è a Vignesie (Arturo Feruglio, Viaç a Vignesie)
      Sin. lâ tal jet , lâ a durmî , lâ a polsâ , polsâ , metisi sot de plete
7. v.pron.intr. [TS] venat. dai uciei, lâ a poiâsi
8. v.pron.intr. lâ cuintri di cdn. o di alc:  si bute cuintri di Rite e le cjape pai cjavei e le sdrane (Pieri Somede dai Marcs, Barbane); chei doi si butarin su di lui a sflanconadis, cun fuarce rabiose, e la pistole e finî par tiere, e Sandri al fo strissinât vie (Maria Forte, Cjase di Dalban)
   Sin. assaltâ , lâ cuintri , saltâ intor , butâsi intor
9. v.pron.intr. lâ incuintri, lâ intor di cdn. ancje par amôr, afiet e v.i.:  tal curtîl e rivà Mariute che si butà vaìnt fra i siei braçs (Roberto Ongaro, Cretevierte); si butà parsore di lui a bussâlu e lu bussave sui voi, sul cerneli (Roberto Ongaro, Il muc)
10. v.pron.intr. lâ svelt:  Gjelmin si butà a cjapâ il prin puest suntun scagnut di confessionari (Riedo Pup, I furlans e la confession); Mirco si jere butât pes scjalis, al jere lât tra i zuiadôrs di balis (Alan Brusini, Par stradis lungjis)
    Sin. precipitâsi , cori , lâ di corse
11. v.pron.intr. jentrâ intune situazion pericolose o no spietade, che e domande cûr, fuarce e v.i.:  mi à scrit lui da la Afriche, prin di butâsi disperât in combatiment (Pieri Somede dai Marcs, Vilie di Nadâl (teatri)); bisugnave butâsi tal viaç voie o no voie (Maria Forte, Cjase di Dalban)
    Sin. impegnâsi , olsâ , provâsi
12. v.pron.intr. impegnâsi, meti lis fuarcis, metisi a fâ alc:  si butave sul lavôr cence padin (Carlo Sgorlon, Ombris tal infinît); int di bêçs e di cumierç, che si butà a fitâ cjasis e magazens (Gianni Gregoricchio, Trê feminis); ogni volte che al capite un ricors la istituzion si bute a corezi lis sôs sieltis par contentâ cui che al ricor (Adrian Cescje, Memoriis di politiche linguistiche)
13. v.pron.intr. di flum, lâ a finî intal mâr, intun lât o intun altri flum:  il Cuar si bute tal Tai a Romans di Vildivar, invezit il Cormôr, dopo jessi stât canalizât a Cjasteons di Strade, si bute te lagune di Maran (Luigina Di Giusto, Andrea Guaran, Mauro Pascolini, La culine furlane); la aghe de riviere di Samardencje e vignive jù bruntulant a butâsi te Urane (Meni Ucel, I colaçs)
    Sin. finî , lâ
14. v.pron.intr. di stradis, condots e v.i., lâ tun ciert pont:  a rivin dulà che la strade si bute sot vie dai ramaçs dai cjastinârs che le sierin parsore (Meni Ucel, Misure)
15. v.pron.intr. dal soreli, de lune e v.i., calâ o lâ, in aparence, daûr di alc:  chel soreglut che al jeve di Cuie e po al passe adasiin li parsore intun cîl net e clâr tant che un voli di uciel, par butâsi, tal ultin, daûr dal Cjaval tun sflandôr di no crodi; (Meni Ucel, La "Fieste dai Roncs")
    Sin. finî , lâ , lâ jù
16. v.pron.intr. ancje ass., stuarzisi di une bande:  il peç, come rassegnât al so destin, dopo un ultin rezisi impins, come di creature che e vûl resisti, al spacà i leams e si butà dut di une bande e po jù a plombâ jenfri chei altris peçs (Maria Forte, La tiere di Lansing); tignî lis breis pognetis par no che si butin
17. v.pron.intr. vê une cierte evoluzion:  no vevin rivât a salvâi i pîts che za a tacavin a butâsi in gangrene (Roberto Ongaro, Cretevierte); sigûr il timp si bute in ploie e o varìn di stâ dentri in cjase (Mirella Fanutti, Marcella Zampa, Artiscj par zûc)
18. v.pron.intr. cjapâ une part, sielzi di stâ di une bande:  al voleve sintî cence sei viodût, par butâsi di ca o di là dome tal ultin (Maria Forte, Varc di confin); buine part de siorie […] no spietà agns par butâsi de lôr bande, cjapant sù ideis e mûts di fâ dai gnûfs parons (Francesc Placerean, Cuintristorie dal Friûl dal 1866 fint in dì di vuê)
19. v.pron.intr. bandonâsi a di un compuartament, a di un umôr e v.i.:  cul stâ dibant, si butisi tai vizis e si jemplisi di debits (Roberto Ongaro, Cretevierte); butâsi te disperazion e bandonâsi al vin (Roberto Ongaro, Cretevierte); butâsi tal fanatisim plui vuarp (Josef Marchet, Sflacjons e insolents)

Polirematichis e espressions idiomatichis

• butâsi aduès loc.v.
• butâsi fûr loc.v.
• butâsi in cuatri loc.v.
• butâsi in jet loc.v.
• butâsi intor loc.v.
• butâsi jù loc.v.
• butâsi malât loc.v.
• butâsi tal bevi loc.v.
• butâsi tal fûc loc.v.
• butâsi te schene loc.v.
• butâsi vie loc.v.