Dizionari de Lenghe Furlane

butâsi jù    [CO]

1. loc.v. sentâsi o distirâsi a colp:  Rose e tire un caregon dongje il fogolâr, po si bute jù sfinide (Pieri Somede dai Marcs, Vilie di Nadâl (teatri)); Vigjut si butà jù vistît te sô brande di stranc e si indurmidì come un len (Pieri Menis, Tal bosc di Kebespok)
2. loc.v. saltâ jù di un puest che al è adalt:  "Mi copi sâstu,.. mi buti jù dal puiûl…" (Pieri Somede dai Marcs, Al fresc)
   
   1. lâ jù, cori jù cuntun moviment imburît o ancje vê une posizion o une direzion che e va injù a colp:  sgjavelade come che e jere e in cjamese di gnot, si butà jù pes scjalis ad in cuatri berlant (Roberto Ongaro, Il muc)
3. loc.v. pierdi fuarce, buine volontât, ligrie, lâ in depression e v.i.:  tal temperament dai talians e je une cjarie tremende di passion, di calôr, di facilitât a entusiasmâsi e a butâsi jù (Josef Marchet, Sflacjons e insolents); "Sù mo, Gjulie, che no si buti jù in chê maniere… E viodarà che il so om al torne di sigûr…" (Maria Forte, Cjase di Dalban); si invià insù a planc, avilide, strache. "No ai di butâmi jù, bisugne che o mi fasi fuarce […]" (Jolanda Mazzon, Fûr di timp)
   Sin. cruziâsi , dolorâsi , sconfuartâsi , scunîsi , disperâsi , deprimisi , butâsi vie
4. loc.v. jessi masse modest, no pretindi, no mostrâ e no volê jessi preseât par ce che si vâl
   Sin. butâsi vie , svilîsi

Components:

• butâsi v.pron.tr., v.pron.intr.
• jù av., adi.inv.