Dizionari de Lenghe Furlane

jù  jù  [FO]

1. av. viers il bas, intune posizion basse, o plui basse:  Nita e vierzè il barcon adalt, e cjalà jù (Dino Virgili, La aghe da pît la cleve)
   Sin. abàs , dabàs , dulinjù , in bas , sot , injù
   Var. jò
   
   1. te part basse di alc, massime tai plans bas di une costruzion:  la none e steve jù, te cusine, e e podeve passâ mieze zornade cence che le viodès (Carlo Sgorlon, Il dolfin)
   2. a une cuote basse o plui basse rispiet a un ciert pont di riferiment:  [rispiet al paîs in mont] jù in citât la nêf si sporcje subit (Alan Brusini, Gian Paolo Linda, I forescj)
   3. a meridion:  sul finî dal 500 i Sclâfs, di une bande si urtavin cul duche di Baviere, di chê altre a mostravin intenzion di disbassâsi jù inte Dalmazie (Josef Marchet, Cuintristorie dal Friûl fin sot la Italie); o torni jù in Afriche… lunis o martars ae plui lungje… (Pieri Menis, Si disarès che e je inventade)
2. av. ancje par segnâ une direzion indefinide, a une cierte distance:  al cjalave jù pe place de bande dal monument, po de bande de strade, ma plui dispès de bande de glesie par cirî sô agne, ma nol rivà adore di viodile (Pieri Menis, Sul agâr)
   Sin. vie
3. av. a nivel bas intune scjale di valôrs, intune jerarchie e v.i.:  ancje lis usancis, par une reson o par chê altre, no restin simpri compagnis: a van sù e jù, come lis cjançons in une classifiche (Bete di Spere, Cuant che il furlan nol è plui tant DOC); lis temperaduris dal mês passât a son stadis plui jù de medie stagjonâl
   Sin. sot , injù
   
   1. in cundizion negative:  risultâts [sportîfs] che pal moment a son propit jù (Christian Romanin, Alè Udin, in Internet ancje par furlan!)
4. av., adi.inv. intune cundizion psicologjiche negative, cjapât de malinconie, cence ligrie, cence sperance e v.i.:  viodistu, e je la tierce volte che e scuen operâsi in cinc agns; e je une vore jù (Carlo Sgorlon, Prime di sere); mi soi simpri sintût un pôc jù in chestis zornadis, però dopo o pensi che o ai cuasi finût [la universitât] e mi tiri sù (Andrea Decorte, Nur eine andere stille Nacht…)
   Sin. abatût , aflit , avilît , basot , demoralizât , deprès , deprimût , disamorât , discoragjât , discoragjît , dolentrât , gram² , grot , indât , ingusît , inmarumît , intosseât , lancurôs , malabiât , malapaiât , malcontent , malinconic , mareât , nichilît , passionât , passionôs , paturniôs , rivilît , scomât , sconsortât , scoragjât , scuintiât , scunît , sfiduciât , suturni , tribulât , vilît
5. av., adi.inv. in cundizions fisiche scjarse, pe strache o ancje in brute situazion di salût, ancje cun specificazion di cualchi mancjance o afezion:  si sintive jù di fuarcis e al veve dolôrs pe vite e al jesseve nome tal biel timp (Alan Brusini, Par stradis lungjis)
   Sin. basot , clopant , debil , flac , flacjon , impotent , lami , mol¹ , dispossent , pendant , pendolant , sflacjon , strac , vîl , mâl , malmetût
6. av., adi.inv. in fase o in situazion economiche o di valôr o di cuotazion negative:  comprâ lis azions cuant che a son jù e vendilis cuant che a son sù
   Sin. bas , sot
7. adi.inv. intune cundizion di inferioritât economiche, sociâl, jerarchiche e v.i.:  "Âstu metude la mude di fieste [par lâ là dai carabinîrs]?" "Sì jo! Ûstu che o vadi a rispuindi come un cercandul, par che mi disin che o soi jù? Jo o voi a rispuindi cul cjâf alt e cul miôr vistît che o ai!" (Alviero Negro, La cjase)
8. av. cun valôr enfatic, par dî di un fat o alc che al torne, che si ripet o che al sucêt cun intensitât, cun fuarce, cun decision:  intant jù pachis e po mi gjavavin une ongule di une man o di un pît, ogni interogatori une ongule (Ivano Urli, Storie di Min); il mont intor di me al jere dut blanc cun cualchi magle maron di morârs. E jù nêf. E jù nêf (Checo Tam, Sense); e jù ridadis e, cuant che a ridevin, par un moment, si dismenteavin de vuere (Roberto Ongaro, Il muc)
   Sin. dai¹

Polirematichis e espressions idiomatichis

• butâ jù loc.v.
• butâ jù dal jet loc.v.
• butâ jù la tonie loc.v.
• butâsi jù loc.v.
• colâ jù loc.v.
• culà jù loc.av.
• dâ jù loc.v.
• dâ jù pai cuars loc.v.
• dî jù loc.v.
• dî jù di dut loc.v.
• di rive jù loc.av., loc.adi.inv.
• dilunc jù loc.av., loc.prep.
• fâ jù loc.v.
• in jù loc.av., loc.adi.inv.
• jù di cuarde loc.adi.inv.
• jù di morâl loc.adi.inv.
• jù di suste loc.adi.inv.
• jù par loc.prep.
• jù pe setemane loc.av.
• là jù loc.av.
• lâ jù loc.v.
• lâ jù di colôr loc.v.
• lâ jù dûr loc.v.
• lâ jù in place loc.v.
• lâ jù pal cuel loc.v.
• lâ jù pesant loc.v.
• lenti jù loc.av.
• mandâ jù loc.v.
• mandâ jù la bocjade loc.v.
• meti jù loc.v.
• molâ jù loc.v.
• molâsi jù loc.v.
• par jù loc.av., loc.adi.inv.
• par sù e par jù loc.v.
• parâ i dincj jù pal cuel loc.v.
• parâ jù loc.v.
• parâ jù la bocjade loc.v.
• parâ jù pal cuel loc.v.
• pôc sù pôc jù loc.av.
• pocâ jù loc.v.
• poiâ jù loc.v.
• poiâlis jù loc.v.
• rivâ jù loc.v.
• sbregâ jù loc.v.
• stâ jù il flât loc.
• sù e jù loc.av., loc.s.m.inv.
• sù par jù loc.av.
• tirâ jù loc.v.
• tirâ jù a cjampanis doplis loc.v.
• tirâ jù a cjampanis rotis loc.v.
• tirâ jù di spese loc.v.
• tirâ jù di spesis loc.v.
• tirâ jù i bregons loc.v.
• tirâ jù il cjapiel loc.v.
• tirâ jù la piel loc.v.
• tirâ jù tabârs loc.v.
• tirâ jù tant di cjapiel loc.v.
• venti jù loc.av.
• vignî jù loc.v.
• vignî jù pai cops loc.v.
• vignî jù pe nape loc.v.

Proverbis:

• a fuarce di cori sù e jù, ancje la cuarde e fruie la piere dal poç