Dizionari de Lenghe Furlane

tirâ jù    [AF]

1. loc.v. cjapâ alc e cdn. e fâ fuarce par sbassâlu, fâlu vignî jù, fâlu colâ e v.i.:  e veve cjapade Dorine par une man e cun dute fuarce le tirave jù pes scjalis (Pieri Menis, Chei di Muraie)
   
   1. cjapâ alc che al è picjât o poiât adalt:  passade la stazion di Reane Eliseo al tirà jù de rêt la valîs di fibre e al si invià de bande de puarte [dal vagon] (Carlo Sgorlon, Prime di sere); e tirà jù de gratule i scudielins e ju poià su la taule (Maria Forte, La tiere di Lansing)
   2. sbassâ, fâ vignî jù, fâ colâ e v.i. ancje cence une fuarce di trazion:  se si va in ciertis regjons, soredut intal centri Italie, al è un svant tignî di cont lis cjasis, lis placis, lis stradis di une volte; in Friûl, invezite, al è il gust barbar, contrari, di disfâ, di tirâ jù (Giorgia Zamparo, Interviste cul scritôr Elio Bartolini)
   3. fâ colâ, fâ precipitâ un velivul:  la cuintriaerie no jere stade a cjalâ e i doi avions a jerin stâts tirâts jù (Checo Tam, La vuere di Checo)
2. loc.v. gloti:  «Bon, bon! Un vin che al à grinte, che si tache ben!» e lu tirave jù a tacis, cjalant il sofit come un gnûf paradîs (Maria Forte, La tiere di Lansing)
   Sin. mandâ jù , parâ jù
3. loc.v. fâ calâ di cuantitât o intensitât:  il vuardian mi puarte la intimazion di presentâmi a paiâ sîscent e sessantesiet francs. O voi jù e là jù mi disin che o pues ricori e che al è facil che mi tirin jù cinccent francs e che lassin nome lis spesis (Riedo Pup, Jo, evasôr fiscâl)
   
   1. fâ someâ plui bas il numar di agns, fâ someâ plui zovin:  Miute di Agnule e scomençave prin dal timp a deventâ frole, ma in chê dì cun chel vistît e veve tirât jù une vore di agns (Pieri Menis, Une cotule pal dì de sagre)
4. loc.v. copâ, soredut cuntun proietil:  si vicinave inviât. Po si fermà par piâ un sigaret, butant fûr grandis bocjadis di fum. "Tenente, aio di tirâlu jù? …" dissal un alpin sot vôs. "Tâs… Sta fer!" (Pieri Menis, Sul agâr)
   Sin. fâ la fuee , fâ la piel , fâ la scusse , copâ , dispicjâ , fâ jù , fâ la spese , fâ fûr , tirâ jù di spesis , tirâ jù di spese
5. loc.v. scrivi o fâ une rapresentazion grafiche, soredut copiant, o ancje une fotografie:  un gjornalist al sarà presint [tal bal], cul librut des notis e un lapis gnûf, a tirâ jù il non e sorenon des plui zentîls balarinis e dai cavalîrs plui morbinôs (Josef Marchet, Lis predicjis dal muini); ma la invenzion che pâr cuasi divine, / je la fotografie. / Pensâ che in manco di une avemarie, / cu un negozi che al pâr un canocjâl, / si tire jù un ritrat al naturâl! (Pieri Çorut, La fotografie di Pieri Çorut)
6. loc.v. dî cun fuarce e in serie:  plen di devozion al tirave jù paternostris e avemariis (Catarine Percude, Il voli di chest mont)
   
   1. dî cun fuarce frasis di ofese ae religjon, di rabie e v.i.:  subit pal paîs e nassè une grant confusion di int, che si sbandave di ca e di là, tirant jù mocui e maledizions (Luigi Gortani, Al marcjât di Vile); "Va sù svelte o ai dit, prime che o tiri jù un porco" (Alviero Negro, Un cjapiel di stran)
      Sin. corponâ , corpononâ , cospetâ , cospetaçâ , cospetonâ , maledî , osteâ , porconâ , resiâ , sacraboltâ , sacramentâ , sangonâ
7. loc.v. fevelâ mâl:  po chei stes che da vîf lu àn sglonfât, / e tirin jù di lui subit mancjât (Pieri Çorut, Il nestri dolôr in muart del Arcivescul Zacarie Bricito)
   Sin. tirâ jù la piel , tirâ jù tabârs , taiâ tabârs , menâ par lenghe

Components:

• jù av., adi.inv.
• tirâ v.tr., v.intr.

Proverbis:

• no stâ fidâti di chei che a tirin jù i sants in glesie