Dizionari de Lenghe Furlane

mandâ jù    [CO]

1. loc.v. fâ lâ intun puest o intune posizion calcolade plui basse o plui meridionâl:  si faseve, la sabide dopo misdì, la spongje e, dopo di vêle striçade dal pignot, le mandavin jù pal poç tal zei dal lidric par che si indurìs vie pe gnot (Pieri Menis, Il cuader de none); sul moment al fo mandât jù un agnul inta val di Gjosafat par eseguî la volontât di Dio (Luigi Gortani, La invidiose)
   
   1. fâ colâ:  "A àn mandât jù cul aparechio SUKHOI dai manifestins par convincinus a rindisi" (Checo Tam, Sense)
   2. fâ sprofondâ, viôt mandâ sot
2. loc.v. gloti, fâ passâ tal stomi ce che si à in bocje:  mi à dade la gavete plene di mignestre di vuardi. O ai mandât jù dut cence tirâ flât (Pieri Menis, Il «miracul» di un ûf)
   Sin. parâ jù , gloti , butâ jù
3. loc.v. (fig.) sopuartâ une ofese, une umiliazion o acetâ alc che si calcole negatîf o diviers di ce che si volarès o di ce che si spietisi:  tasê, simpri tasê, mandâ jù i grops e suiâsi las lagrimas par tantas ofesas (Valter Rodaro, Cjara o bec?); e je dure di mandâ jù par Alì Shinà, la nestre idee di libertât (Igor Londero, Un blanc e un neri)
   Sin. parâ jù , gloti , butâ jù
4. loc.v. no dî o ritirâ peraulis o pinsîrs:  "Cu la spade tes fasarès mandâ jù chestis peraulis di tradiment…" (Alviero Negro, Strumîrs e Çambarlans)
5. loc.v. fâ lâ vie une magle, il sporc o altri:  "Siôr Nardin al veve une magle di ont cussì grande su la gjachete. […] O ai scugnût sfadiâ une ore par mandâjale jù" (Bruno Paolo Pellarini, Comari 'Sese)

Components:

• jù av., adi.inv.
• mandâ v.tr.