Dizionari de Lenghe Furlane

lâ jù    [FO]

1. loc.v. vê un moviment o direzion dal alt al bas o di Nord a Sud o sim.:  il sipari al va jù e la comedie e je finide (Costantino Smaniotto, Co l'amôr al cimie); la strade e va jù a plomp cuintri Colorêt e cuasi no si viodile tal mieç dai cocolârs (Riedo Pup, Il Crist di Quilin); il Valon par lâ a Triest e la Magnissa par lâ jù ta Bassis, jarin tra li stradis li plui pericolosis (Ranieri Mario Cossâr, Il luminut da la Madona)
   Sin. calâ , sbassâsi , dâ jù , dismontâ , vignî jù
   
   1. colâ:  intun un crac trement, un nûl di faliscjis la taponin. No pol plui, cole jù in imbast. L'è lât jù el paviment da cjamare disot (Dolfo Zorzut, No je plui vive); a Setembar [dal 1976] si sdrume ce che a nol jere lât jù in Mai (Igor Londero, Cuintristorie dal taramot)
      Sin. sdrumâ , sdrumâsi , vignî jù , sdrumâ jù , sdrumâsi jù
   2. finî sot aghe
      Sin. lâ sot , subissâsi
   3. dal soreli o di altri cuarp celest, lâ sot de linie dal orizont:  daûr mont Spiç ros, imbuît, colôr di sanc al leve jù il soreli (Catarine Percude, La fuiace de Madone); il soreli al jere lât jù daûr des monts sflamiant par un moment e il scûr al vignive sù di ogni bande jemplant il mont di malinconie (Pieri Menis, Sul agâr)
      Sin. lâ sot , tramontâ , lâ a mont¹
2. loc.v. dal mangjâ e dal bevi, jessi glotût:  i esibirin un licôr dolçut. Lui al jere golôs piês de canaie e il dolç i leve jù come sîr (Antoni Beline, Pre Pitin); il mangjâ al va jù a grops par sante scugne e no par il plasê di gustâ o di cenâ in compagnie (Franca Mainardis, Aiar di cjase)
   
   1. ancje di sensazion fisiche o psicofisiche di tension tal cuel o tal stomi, sparî come jessint glotude:  "E son dôs setemanis che mi sint un grop sul stomit e no son sants che al vueli lâmi jù" (Arturo Feruglio, Il speziâr); chel marum tal cûr al cres, si intorgole tal cuel e nol va jù nancje a gloti (Dino Virgili, La aghe da pît la cleve)
   2. in gjenar cun costruzions negativis, podê jessi sopuartât:  "No mi va jù, inutil; no mi va jù [il moroseç in canoniche]. E bastassial che dut al fos restât fra di nô. Ma no, corpo di bio! E à sintût dut ancje Madalene […]" (Bruno Paolo Pellarini, Amôr in canoniche); "Scolte frute, a mi no mi va jù che tu vedis decidût di un moment in chel altri sence pensâi parsore, sence domandâ un consei!" (Jolanda Mazzon, Fûr di timp)
3. loc.v. vê une riduzion di cuantitât, intensitât, valôr e v.i.:  il câl paurôs de popolazion furlane che insom dal 1500 e jere lade jù di plui di un tierç rispiet ai prins agns dal secul (Gian Carlo Menis, Storie dal popul furlan); la fiere e jere lade jù scuasi dal dut (Carlo Sgorlon, Il dolfin)
   Sin. calâ , sbassâsi , cangjâ
   
   1. calâ di pês:  il miedi al à dite che al è miôr se o voi jù di cualchi chilo
4. loc.v. di magle, colôr e v.i., smamîsi o sparî:  "Ten ca, ten ca la gjachete, tu âs di parâmi jù une magle di ont…" "Une magle di ont?! Nol sa che il gras nol va jù sence benzine?" (Bruno Paolo Pellarini, Comari 'Sese)
   Cfr. lâ vie

Components:

• jù av., adi.inv.
• lâ v.intr., s.m.sing.

Proverbis:

• cuant che si va jù par la aghe, si cjapisi pai baraçs se no si po altri
• la cjase dai contents e je lade jù par la aghe
• tropis voltis l'amôr al va jù pai lavris