Dizionari de Lenghe Furlane

lâ vie    [FO]

1. loc.v. slontanâsi di un puest o di une compagnie:  tor miezegnot i amîs a van vie e ancje el paron di cjase al va sù a durmî (Dolfo Zorzut, Cui che al coione, al reste coion); «Disii che no stedi lâ vie, e che cuant che al sarà il moment di fevelâ i fevelarai jo» (Vittorio Vittorello, A ogni cost)
   Cfr. partî¹ , lâ , lâ dilunc , lâ indevant , lâ indenant , scjampâ , mocâse , bati il tac , taiâ il cjan , taiâ la cuarde , gjavâsi , fâ fagot , filâ , filâ vie
2. loc.v. in particolâr tignint sù costruzions cu la preposizion "par", movisi in maniere gjeneriche o a traviers di alc:  Catinuta a lava via pai cjamps e pai rivâi e pai prâts ducj plens di rosis e rusutis di tancj colôrs (Ugo Pellis, Catinuta); la fontane e jere suntune culine lontane, di là di un palût, e si scugnive lâ vie par un puint di bree (Pieri Menis, Il gno prin pâr di scarpis)
3. loc.v. lâ ator cuntune cierte ande, cuntun ciert aspiet, fasint viodi ciertis carateristichis:  un militâr cussì biel vistût e dut lustrât i pareve une persone in grant, e si tignive in bon, e cuant che e saveve di vêsal daûr e leve vie impicotide gjoldintse tra piel e vues (Catarine Percude, L'ucielut de Mont Cjanine); e viodeve ancje pes stradis, massime pal Corso, lis mulis vistidis propi come chês te television. Lis cjalave lâ vie siguris, sence pôre di nuie e di nissun, no come lôr di piçulis, jê massime (Jolanda Mazzon, Di là de rêt)
   
   1. ancje di alc di inanimât o imateriâl, vê un ciert progrès, une cierte maniere di lâ:  "No i mancje plui nuie: la campagne che a rint; la cjase in ordin; i afârs che a van vie drets; il fi studiat; e po… e po… la salût!" (Bruno Paolo Pellarini, Amôr in canoniche)
4. loc.v. dal timp, passâ:  il marcjât al tire, i ordins ju veis in man… No larà vie trop che la fabriche e tornarà a piâ doman ce che e piart vuê (Gianni Gregoricchio, Barbe Masaniello); al larà vie un an prin di organizâle ben (Adrian Cescje, Memoriis di politiche linguistiche)
   Sin. lâ dilunc , passâ
5. loc.v. di alc che si viôt, che si sint, che al à cualchi efiet, sparî:  la canute nere […], lade vie la cragne, cumò e je plui splendide ancjimò de famose canute nosele che al puartave tal nonantevot siôr Momolo Bressan segretari di Surisins (Arturo Feruglio, Viaç a Vignesie); al è un biel clime ca sù. Mi son parfin lâts vie i dolôrs reumatics, o miôr… ju varai ancjemò, ma no ju sint (Checo Tam, La maree nere)
   
   1. in particolâr de furnidure di corint eletriche, mancjâ par un pôc di timp:  al è dome un temporâl. Ve, che e je lade vie la lûs! (Gianfranco Pellegrini, Torse Sand Creek)
6. loc.v. di cuantitât di bêçs, materiâl, timp e v.i., coventâ e jessi impegnade par vê un ciert risultât:  mi va vie mieze paie dome par paiâ il fit de cjase; pensait che par puartâ indenant une vît di un incalm ti van vie trê agns par vê i prins risultâts (Redazion il Diari, Il paleontolic dal vin furlan)
7. loc.v. ancje cun valôr esortatîf gjeneric, cence sens di moviment:  "Parcè cjalistu dut a ledrôs? Anìn vie, spude il marum e contimi i grîs che ti passin pal cjâf" (Catarine Percude, Lis âfs)
   Sin. lâ
   Cfr. dai¹ , sù , sù mo , sù po , vie
8. loc.v. in costruzions cul gjerundi, par segnâ une azion progressive o continuade:  e si sintive pôc lontan di alì / a cjantâ il rusignûl / ci un tenôr di fâ dûl; / piulavin tel nît i uceluts, / planchin planchin vignive jù il roiuç, / al leve vie cidinantsi il creât (Pieri Çorut, Zoventût e Primevere)
   Sin. lâ
   Cfr. stâ , jessi daûr

Components:

• lâ v.intr., s.m.sing.
• vie s.f., av., inter., s.m.sing., prep.

Proverbis:

• a la ostarie si fâs il cont prin di lâ vie
• ce che al ven cence fadie, in pôc timp ancje al va vie
• i bêçs dai predis a vegnin cjantant e a van vie sivilant
• il mâl al ven a cjars e al va vie a oncis
• il mâl al ven a funts e al va vie a oncis
• in trê dîs la nêf e va vie: Sant Zuan, Sant Pieri e Sant Jacum
• si à simpri di lâ vie cun doi solt di mincjon te sachete