Dizionari de Lenghe Furlane

partî¹  par|tî  [FO]

1. v.intr. slontanâsi di un puest o di une persone, tacâ un moviment, un percors, un viaç e v.i.:  a voltis al partive a buinore e al stave oris tal bosc e al tornave cul sac plen (Maria Forte, Il Bide di Miot); montât sul automobil, al è partît viers Codroip cun dute la compagnie (Pieri Somede dai Marcs, Lis nestris rosis); « […] Adio, vecju paîs, e cumpagns zovinuts, / Napoleon al clama la miei zoventût.» / Co al leva il soreli, al prin lusour dal dì, / Vissens cul so cjaval di scundion l'è partît (Pier Paolo Pasolini, Il soldât di Napoleon); al jere partît par la France, cun in sachete dome i bêçs dal viaç e un contrat di manoâl (Franca Mainardis, Il sium di Lissandri)
   Sin. bati il tac , cjapâsi sù e lâ , fâ fagot , fâ partence , lâ , lâsint , lâ vie , marcjâ¹ , inviâsi
2. v.intr. (fig., eufem.) murî:  i vignivin iniment chei che al veve viodûts a murî là dentri [in preson], i lôr deliris, il lôr spavent disperât di scugnî partî cence vê podût tornâ a sintî il savôr de libertât (Carlo Sgorlon, Prime di sere)
   Sin. partî di chest mont , lâ , murî
3. v.intr. di un colp, jessi dât o trat:  i carabinîrs a cirivin di tignî indaûr cu lis buinis, ma cuant che un toc di modon i rivà al Marassial, al partì il prin colp di carabine (Maria Forte, "Nossent"); l'om al fasè partî une cenglade a tradiment (Gianni Gregoricchio, Trê feminis)
   Sin. lâ , scjampâ
4. v.intr. di un troi, di une strade, di un cors di aghe e v.i., tacâ, ramificâsi:  al rivà fintremai insom il borc, indulà che al partive il troi dal cuel (Dino Virgili, La aghe da pît la cleve); la stradele di cjamp che e partive de strade bande Savalons su la rive çampe de renzite (Lucio Perès, Une lance longobarde cjatade a Baracêt)
   Sin. dislontanâsi , ramificâsi , slontanâsi , tacâ
5. v.intr. (fig.) vê un principi, une fonde:  la idee di meti sù une radio e jere partide des discussions dentri dal moviment autonomist furlan (Max Mauro, Un Friûl difarent: i 90 mhz di Onde Furlane)
   Sin. movisi , tacâ
6. v.intr. di mieç di traspuart, mecanisim, motôr e v.i., metisi in moviment:  John intant al veve cjalcjât un altri boton e la machine e partive a grande velocitât (Checo Tam, John König)
   Sin. inviâsi , lâ
7. v.intr. vê efiet, jentrâ inte fase di aplicazion:  l'an passât a son stadis ancje classis che no àn cjatât lis risorsis umanis e là, duncje, nol è stât pussibil fâ partî l'insegnament (Patrizia Pavatti, Insegnament dal furlan - la norme "in situazion": tra regulis e plan de ufierte formative)
8. v.intr. (coloc., fig.) rompisi, ruvinâsi, no funzionâ e v.i.:  tal curtîl al jere dut scûr, stant che ancje la lûs e jere partide (Franca Mainardis, Il sium di Lissandri)
   Sin. lâ
9. v.intr. (coloc., fig.) incjocâsi:  al partive cuntun tai, parcè che i mancjave sostance (Antoni Beline, Pre Pitin)
   Sin. lâ in bale , lâ
10. v.intr. (coloc., fig.) scjaldâsi, inamorâsi:  al è partît par une compagne di universitât
    Sin. deventâ mat , inamorâsi , lâ fûr
11. v.intr. (coloc., fig.) dâ i numars, deventâ mat:  lassilu pierdi, al è partît
    Sin. dâ di mat , dâ i numars , deventâ mat
12. v.intr. (coloc.) intun discors, intun resonament, pierdisi di argoment o ancje fevelâ di altri in maniere ecessive:  cuant che al partìs a fevelâ di politiche no lu ferme nissun
    Sin. tacâ

Polirematichis e espressions idiomatichis

• partî in cuarte loc.v.

Proverbis:

• la supierbie e partìs in caroce e e rive a pît
• mâl di part mai nol part