Dizionari de Lenghe Furlane

lâ fûr    [FO]

1. loc.v. di cdn., jessî, slontanâsi di un puest sierât o delimitât o definît ancje di un materiâl, di un contest e v.i.:  plui di dut si divertive a cori, a saltâ daûr des bestiis cuant che a levin fûr des cisis che a sieravin il lôr prât (Pieri Menis, Pascute); Eliseo al le fûr de ostarie e al cjaminà un pieçut de bande di Buie (Carlo Sgorlon, Prime di sere)
   Sin. vignî fûr , jessî fûr , jessî
   
   1. vê une direzion che e puarte fûr di un puest, di un lûc, di une localitât e v.i.:  si butarin jù pes andronis che a lavin fûr tai roncs (Dino Virgili, Devant di dut il cîl)
2. loc.v. jessî di cjase, par une cualsisei reson:  "E… dulà… ise Anzuline?" "È lade fûr un moment ma tornarà in curt: se volês tornâ…" (Pieri Somede dai Marcs, Ursule)
   
   1. lâ fûr di cjase par divertiment:  cun chê [cun Catine] Nenute e rideve, e scherçave, i plaseve di lâ fûr cun jê de fieste par lâ a messe, a jespui, parfin a fevelâ di fantats (Pieri Menis, Marum); la siore no le lassave lâ fûr di sere, nancje chês pocjis oris che e veve di libertât (Roberto Ongaro, Il muc)
   2. passâ timp libar insiemi, soredut par morosâ
3. loc.v. di un materiâl, jessî di un contignidôr:  si viôt un recipient che i va fûr aghe (Giovanni Battauz, Flavio Cossar, Renato Iacumin, I mosaics de basiliche di Aquilee)
   
   1. ancje di un flum, jessî dal so jet o di une altre aghe, jessî dal so bacin, lant parsore dai arzins o rompintju:  i prins mês dopo rivâts i colons a Avellaneda a son stâts segnâts tant des dificoltâts climatichis, plui di dut de ploie, che e à fat lâ fûr i flums (Javier Grossutti, La emigrazion dal Friûl - Vignesie Julie in Argjentine e in Uruguay)
   2. di un vues, jessî de sô sede di articolazion normâl:  al è colât in biciclete e i è lade fûr une spale
4. loc.v. (ancje ass.) no rispietâ un limit, esagjerâ:  cul cûr che i bulive, lui al si à tirât drenti ta ostarie. "Un mieç, Toni!" "No tu vâs fûr?" "No, un mieç di chel blanc e di chel bon, us disi" al dîs cuntune vôs di pôc di bon (Dolfo Zorzut, La furlane)
   
   1. no rispietâ une regule, une norme, un parametri, une prerogative e v.i:  il Ministeri pai bens e pes ativitâts culturâls, te sô valutazion […], al è lât fûr des sôs competencis (Marc Stolf, Al è un judiç a Berlin. E a 'nd è un ancje a Rome)
5. loc.v. jessi diferent, no corispuindi a une categorie, a un concet e v.i.:  partîts politics che a van fûr dai schemis dal pinsîr politic tradizionâl (Marc Stolf, Corsiche, Scozie, paîs Basc, Catalogne, Friûl… Europe)
6. loc.v. tocjâ un argoment diviers di chel che si è daûr a fevelâ:  no vuidavi jo la Assemblee, le vuidave Samo Pahor, che par sô nature di caratar nol gjave la peraule nancje a cui che al va fûr dal ordin dal dì (Adrian Cescje, Memoriis di politiche linguistiche); cumò o sin lâts fûr dal discors, mi pâr (Riedo Pup, Murî di fam cui camarins plens)
7. loc.v. (fig.) sfrancjâsi di une situazion, spec. dure, o pericolose:  la Slovenie, cemût che a dimostrin i indicadôrs economics, e à di timp tacade la strade juste par lâ fûr de crisi economiche e finanziarie che le à puartade sul ôr dal precipizi (Tjaša Gruden, La Slovenie indenant ancje sul risanament des bancjis)
   Sin. vignî fûr
8. loc.v. slontanâsi di un grup, di un acuardi, di un rapuart e v.i.:  Degasperi al à butât fûr [dal guvier] i liberâi, anzit a son lâts fûr di bessôi (Josef Marchet, La scrassigne)
   Sin. bandonâ , lassâ , lâ vie , partî¹ , sbrissâ fûr , slontanâsi
   
   1. lâ a vivi in maniere indipendente rispiet ae famee:  "Sâr pari… al è indificil dî di tornâ, cuant che si è za lâts fûr une volte… Nol è che no si vueli ben ae cjase viere… ma nô o sin dislontanâts di jê" (Dino Virgili, La aghe da pît la cleve)
9. loc.v. (coloc.) no jessi razionâl, no compuartâsi in maniere normâl:  alore e je vere che tu sês lât fûr dal dut! (Stiefin Morat, Kebar krossè)
   Sin. lâ fûr cui sintiments , lâ fûr dai semenâts , lâ fûr dal vade , lâ fûr di semenât , dâ di mat , dâ i numars , deventâ mat
10. loc.v. jessi spindût:  calcolâ trops bêçs che a van fûr ogni mês pes boletis
    Sin. saltâ fûr , vignî fûr
11. loc.v. jessi publicât, metût in circolazion, metût in cumierç e v.i.
    Sin. vignî fûr , saltâ fûr
    
    1. jessi cognossût ator:  Toni si impense dai sacs che al veve butât tal flum e lu conte ator a ducj. E va fûr la vôs, fin che e va in orele al vescul (Popolâr - Andreina Nicoloso Ciceri, Toni Mat - Racconti popolari friulani I)

Components:

• fûr av., prep., inter., adi.inv., s.m.sing.
• lâ v.intr., s.m.sing.

Proverbis:

• la caritât a va fûr pal porton e e jentre pal barcon