Dizionari de Lenghe Furlane

saltâ fûr    [FO]

1. loc.v. jessî cuntun salt o vignî fûr svelt:  in chel moment saltavin fûr, da li boschetis, i ladrons che gji disvuedavin li sachetis ai viasadôrs (Ranieri Mario Cossâr, Il sechin tal font dal sac)
   
   1. vignî fûr di cjase o di un ambient, soredut al improvîs:  al fo dut un cori di dutis lis bandis. Mariane e saltà fûr a viodi ce che al jere sucedût (Maria Forte, Il bal spisimât des ombrenis); saltait fûr, bielis bambinis, / puartait fûr chel cjâr morbin; / za lis gjambis lis vês buinis / par balâ fin a la fin (Popolâr, Saltait fûr, bielis bambinis)
   2. vignî fûr o vignî vie cun fuarce:  de cooperative al jessive a pleton une roie di vin che a faseve une grant poce tal mieç dal curtîl. Cul prin cjalt de Primevere al jere saltât fûr il cjalcon di une bote di lambrusc… (Pieri Somede dai Marcs, 21 Avrîl); si à scuviert che il poç dai fîi eletrics des pompis di prese de aghe di mâr al veve une crevadure di 20 cm, e che di li e saltave fûr aghe une vore radioative (Alessandro Pascolini, Il disastri de centrâl nucleâr di Fukushima Dai-ichi)
2. loc.v. jessi intune posizion, ancje rispiet a altris elements, che e permet di jessi viodût:  gruesse, grasse e taronde, simpri legre, cu la muse un pôc ruane che i saltave fûr dal façolet neri a pinie leât un pôc mol sot dal barbuç (Pieri Somede dai Marcs, Pre Josef)
3. loc.v. nassi, comparî, tacâ a vignî fûr:  e ven Primevere: fine e frescjine e salte fûr la jarbe pal prât (Catarine Percude, La rosade di sant Zuan); cumò el soreli l'è za par saltâ fûr e lui al duar ancjemò (Dolfo Zorzut, Ipocrisie, ipocrisie, el Signôr ti cjastie)
4. loc.v. jessi puartât e metût a disposizion o in viste:  "E je ancjemò plui di mieze ore di lûs. Parcè no tachìno une partidute?" La bale e jere saltade fûr dal moment e li, sul pedrât, a vevin tacât a cori, a pidâ e a vosâ (Gianni Gregoricchio, La clape)
   
   1. jessi cjatât:  dopo di vê butât par aiar dut il curtîl e ficjât lis mans e i bachets in dutis lis busis e cirût dal toglât fintremai in cjase, la cunine no jere saltade fûr (Gianni Gregoricchio, Îr e doman)
5. loc.v. capitâ dal improvîs:  juste cumò e salte fûr la storie des autonomiis a mostrâ che no ducj i pipins a son pipins dal dut, a mostrâ che e je ancjemò cualchi persone, cualchi flât di libertât (Josef Marchet, Personis e pipins)
   Sin. vignî fûr
   
   1. jessi, sucedi tant che risultât:  la stale e i prâts fasin il mussulin, / e da chest salte fûr e pan e vin (Pieri Çorut, Il Strolic furlan par l'an 1851); cjo! par fâsi viodi sapientone tantis voltis e da di chês talianadis che no us dîs… e a saltin fûr po di chei strambolots che Jesus Marie (Pieri Somede dai Marcs, Lassait che mi sbrochi!)
   2. jessi cognossût, soredut dal improvîs o cence jessi spietât o dopo di jessi stât platât o no savût:  "Ca dentri lis robis si lis sa dome dopo fatis, duncje e podarès saltâ fûr cualchi altre novitât…" (Costantino Smaniotto, Co l'amôr al cimie); alore jê une gnot e va tal cimitieri e e robe ducj i flocs des rosis […]. La robe, dopo un pôc, e salte fûr. A van di jê lis vuardiis e po al deventà il procès (Andreina Nicoloso Ciceri, La fantate inzegnose - Racconti popolari friulani I)
6. loc.v. fâ une azion, soredut dî o fevelâ, che e pues jessi caraterizade dal fat di jessi volontarie, improvise, no spietade, strambe e v.i.:  e che nissun salti fûr a dînus che o sin materialiscj e che o cjalìn nome l'interès dai budiei (Josef Marchet, La torce de civiltât); une volte Catin e jere saltade fûr cun chestis peraulis: "Menut al è un frut che mi plâs: bon, rispietôs; e a Gjisute al pâr che i vadi […]" (Maria Forte, Dome la cjampanute di Sant Bortul)
   Sin. vignî fûr , saltâ sù
7. loc.v. rivâ a frontâ ben une situazion, un probleme, un impegn e v.i.:  chel puer on al lavorave dut el dì e ancje di gnot, ma mai nol podeve saltâ fûr cu li spesis (Dolfo Zorzut, Ipocrisie, ipocrisie, el Signôr ti cjastie); il fat di no rivâ a saltâ fûr di cheste storie tal mût che al intindeve lui, a Gubian i sglonfave il fiât (Gianni Gregoricchio, Îr e doman)
   Sin. saltâi fûr , puartâle fûr , puartâse fûr

Components:

• fûr av., prep., inter., adi.inv., s.m.sing.
• saltâ v.intr., v.tr.

Proverbis:

• la prime ploie di Avrîl il cai al salte fûr dal so covîl
• no bisugne fâlis, par che no saltin fûr
• no si file mai tant sutîl che il cjaveç nol salti fûr