Dizionari de Lenghe Furlane

saltâ  sal|tâ  [FO]

1. v.intr. fâ fuarce e distacâsi dal dut de tiere par tornâ a vignî jù tal stes puest o intun altri:  tal zîr di trê minûts i parons di cjase a rivin a segnâ: cross di Pezzella e Cornelius che al salte plui indalt di ducj chei altris e le bute dentri. (Marc Stolf, Parma - Udinese 2-2); di ca e di là de strade e un esercit di cjanis di palût e 'savis e crots che a saltavin ta la aghe (Alan Brusini, Come tai romançs); [i fruts] saltavin dentri ta la aghe a «marinare», zigant; a jessevin là di là scjassant il cjâf, si suiavin la muse tes mans (Dino Virgili, La aghe da pît la cleve)
   
   1. vê une reazion istintive che e compuarte un moviment svelt, imburît:  "Auf, che al è morghin!" e al tirave pai pîts cualchidun: chel al saltave in senton cuntun spac (Dino Virgili, La aghe da pît la cleve)
   2. tornâ a distacâsi di tiere o di une supreficie dopo di vê batût cuintri o par vie de velocitât o di une altre fuarce:  i lens e lis vîts si disfueavin in chel seon discjadenât e la tampieste e saltave a pitinton dai cops ai curtîi (Maria Forte, La rive di Sant Pieri)
      Sin. sbalçâ
2. v.intr. movisi svelt, lâ une vore svelt:  sant Pieri sbarlufît [par vie che al veve cjapât cuatri legnadis] al saltà di strade fûr dal fen […] al corè jù in curtîl a cjapâ il batali e a scomençâ [a bati] la prime vie [di forment] (Catarine Percude, Il prin sarasin); i voi a saltavin mo su Berto e Nedo e mo sul pari (Gianni Gregoricchio, Trê feminis)
   Sin. butâsi
   
   1. montâ di premure, spec. su di un mieç di traspuart:  Nedo al saltà suntun camion militâr di passaç e il polvar de strade sal glotè (Gianni Gregoricchio, Trê feminis); al veve a pene il timp di cori in stazion par saltâ sul tren (Carlo Sgorlon, Il dolfin)
3. v.intr. movisi a scjassadis, tremant:  rivât dongje dai lavôrs, Ricardo al dismontà par lâ indenant a pît, cu la biciclete che i saltave sui claps (Carlo Sgorlon, Prime di sere)
4. v.intr. (fig.) dal cûr, tacâ bati a fuart cuasi che al volès jessî fûr:  a ogni cricâ di un stec pescjât, a ogni svolt fra i ramaçs, a ogni bave di aiar che e ves businât tes pontis dai pins, il cûr i saltave in bocje e al tremave come une vuiscje (Pieri Menis, Tal bosc di Kebespok)
   Sin. sbalçâ
5. v.intr. di alc, distacâsi di colp:  la pression e à fat saltâ il stropul; la esplosion e à fat saltâ il cuviert dal fabricât de unitât 1 (Alessandro Pascolini, Il disastri de centrâl nucleâr di Fukushima Dai-ichi)
   Sin. saltâ vie
6. v.intr. sclopâ:  i partesans a vevin fat saltâ il dipuesit di benzine e copâts chei mucs (Roberto Ongaro, Il muc); a Pinçan a jerin juste rivâts a passâ il puint che i soldâts lu àn fat saltâ cun dut ce che al veve parsore: int cu la cosse, cjaruçs cjamâts di fruts e di viei, soldâts, vacjis, cjavai, ducj un salt tal Tiliment in plene (Alan Brusini, Amîs come prime)
   Sin. saltâ par aiar , tonâ , sclopâ
7. v.intr. (fig.) soredut di mecanisim eletric, no funzionâ plui:  il contat al fâs saltâ l'eletric, al sune l'alarme (Ivano Urli, Storie di Min); la int, usade a lavorâ cuant che al jere inmò scûr, no si faseve plui di tancj fastidis se une lampadine i saltave (Raffaele Serafini, Soreli jevât a mont)
   Sin. lâ , lâ vie
8. v.intr. (fig.) vignî tant che istint, umôr, voie e v.i.:  a fasevin finte di no viodilu di tant antipatic che al jere, e sporc e vilan. E ancje viliac, che se i saltave di barufâ, al si sielzeve une frute (Alan Brusini, Amîs come prime); di là a cualchi timp a sant Pieri i tornà a saltâ di lâ a spas, ma cheste volte si tirà invezit tal paîs dai Malcontents (Catarine Percude, Contents e malcontents)
   Sin. saltâ sù , vignî sù , saltâ la moscje , saltâ il gri
9. v.intr. (fig.) di cdn., jessi destituît:  cul Comissari De Gregoris o jeri rivât ancje a concludi, ma chel lu àn fat saltâ, parcè che al jere masse vecjo (Alviero Negro, Int di masnade)
   Sin. colâ¹
10. v.intr. (fig.) di program, progjet e v.i., finî tal nuie, jessi sospindût o scancelât:  no savìn se il progjet dal autodrom bordanês al sedi saltât propit in gracie de oposizion de popolazion e dai siei rapresentants politics, o se a sedin stadis altris lis resons (Linda Picco, Paveis al puest des machinis)
    Sin. lâ sù pal stec , lâ strucj
11. v.intr. (fig.) intun resonament, intun discors, intune leture e v.i., passâ di colp di un pont a di un altri:  al è impussibil fâ culì une ispezion dai centenârs di pagjinis de vore di Citolini; e sarès, come che al dîs il cont Collaltino, une «lungje navigazion» che nus stracarès nô come i siei amîs; e alore saltìn subite al setim dì, al colp di sene finâl (Mario Turello, Il brevet)
    Sin. passâ , lâ
12. v.intr. fâ un moviment di une o di plui posizions intun ordin:  il cjaval [dai scacs] al salte simpri di une casele nere a une blancje o di une blancje a une nere (Nilde Teresa Negro, Zuìn di scacs)
    Sin. lâ , movisi
13. v.intr. [TS] zûcs tai zûcs di azart, dal banc, pierdi dute la sume che si à a disposizion
14. v.tr. passâ cuntun salt:  Febo al coreve come un mat intes braidis, saltant i riui come un zupet (Checo Tam, Domenie di cjace); se al scrupulave alc […] se svuincave pai curtîi, saltant i mûrs di confin [par no sei cjapât dai todescs] (Maria Forte, La Madone de Pâs)
15. v.tr. (fig.) lassâ di bande, volint o cence volê:  il CJS al svilupe contats direts cui grops di produtôrs dal Sud, saltant i mecanisims ordenaris de intermediazion (Buteghe dal Mont, Luche Nazzi, Guide par un consum just e solidâl); tai siei zîrs ator pai paîs, nol saltave mai Bertiûl, là che al jere bon vin e che al veve tantis cognossincis (Antoni Beline, Pre Pitin); "[…] Contimi dut, cence saltâ nancje une virgule" (Carlo Sgorlon, Ombris tal infinît)
    
    1. no fâ une robe che e jere programade o che e sarès normâl, usuâl:  [ae fin dal Votcent] tancj zuiadôrs a scugnevin saltâ la zornade di vore pe partide (Gotart Mitri, Il zûc dal balon); DJ Caralitanus al è un tipo particolâr: des voltis al salte la gulizion par durmî (Checo Tam, La maree nere); a 'nd jere sì di chei che a saltavin cualchi Pasche cence confessâsi (Riedo Pup, I furlans e la confession)
       Sin. pierdi , lassâ di bande , lassâ , lassâ pierdi

Polirematichis e espressions idiomatichis

• fâ saltâ i gnerfs loc.v.
• saltâ ai voi loc.v.
• saltâ di pâl in frascje loc.v.
• saltâ fûr loc.v.
• saltâ il fossâl loc.v.
• saltâ il gri loc.v.
• saltâ in bocje loc.v.
• saltâ intai voi loc.v.
• saltâ intor loc.v.
• saltâ la moscje loc.v.
• saltâ la moscje al nâs loc.v.
• saltâ pal cjâf loc.v.
• saltâ par aiar loc.v.
• saltâ parmìs loc.v.
• saltâ siet scudielis vueidis par cjapâ chê plene loc.v.
• saltâ sù loc.v.
• saltâ tai voi loc.v.
• saltâ tal cjâf loc.v.
• saltâ tal cuel loc.v.
• saltâi fûr loc.v.

Proverbis:

• cuant che nol è a cjase il gjat, a saltin lis surîs
• fumate basse, bon timp e lasse; fumate alte, al plûf cuant che i salte
• la mierde che e salte in scagn o che e puce o che e fâs dam
• no stâ saltâ vidiel se no gno pari ti maride