Dizionari de Lenghe Furlane

colâ¹  co|lâ  [FO]

1. v.intr. vignî jù dal alt viers il bas, finî intun puest plui bas:  dut il lanternit dal toglât e dal cjôt dai purcits al è colât par tiere te arie (Checo Tam, La codebuie); ogni volte che o vierç un scûr, a colin fruçons di stabilidure o tocuts di modon (Maria Forte, Cjase di Dalban); lis bombis a colarin su lis fabrichis e sui operaris, sui cuartîrs là che e viveve la int normâl, su lis feroviis, su lis radios, su lis televisions e ancje su lis scuelis (Angelo Floramo, Cuintristorie dal Nûfcent 1990-2000); jù pe muse di Tin pizighet a colavin lis lagrimis a spissul (Pieri Menis, Un macet di sanmartinis)
   Sin. cjadê , plombâ , precipitâ , scalapâ , sdramassâ , svolâ , tombolâ , vignî jù
   Var. golâ
   
   1. di cdn., finî par tiere par vê pierdût l'ecuilibri o un sostegn:  i cinc fruts a 'ndi vevin saldo une, di mâi e di malans, mo un al colave de cjadree, chel altri si scotave tal spolert, chel altri il gjat i sgrifignave la muse (Alan Brusini, Come tai romançs); fâ moviment al sbasse il pericul de osteoporosi e di colâ e rompisi i vues (Guglielmo Pitzalis, Ocjo ai vues!)
      Sin. cjadê , marcolâ , scalapâ , sdramassâ , tombolâ , inçopedâsi
   2. metisi sentât o distirât dut a bot:  Tilde no rivà plui a scjafoià la smare e e colà suntune cjadree, sangloçant di gnervôs (Gianni Gregoricchio, Trê feminis)
      Sin. butâsi
   3. (fig.) no rivâ plui a stâ impins:  cuant che [il mus] al colave di fam e di strache, il so paron lu leave pe mede dai vinceis, par che al podès passonâ (Josef Marchet, Lis predicjis dal muini)
   4. ancje di suns, lâ, rivâ di un lûc plui alt a di un plui bas:  lis cjampanis a lassavin colâ ancjemò i lôr colps secs come clapadadis (Pieri Menis, Sflameadis)
      Sin. lâ jù , vignî jù
2. v.intr. di fenomens atmosferics, vignî jù dal cîl:  une gnot e je colade tante di chê nêf che, te buinore, o vin scugnût jessi di cjase pal barcon de cjamare (Alan Brusini, Gian Paolo Linda, I forescj); intal daspò misdì, che a Min i jere parût lunc come il passio, e jere colade tante di chê ploie che Diu nus vuardi (Franca Mainardis, Aiar di cjase)
   Sin. lâ jù , trai , vignî jù
   
   1. ancje di lûs, rais e v.i., lâ a tocjâ, lâ a bati, iluminâ:  lampadinis al neon si ingrandivin cuintri un spieli e la lûs e colave sul banc di zinc, ancje chel ordenât, ma cence anime vive (Alan Brusini, Gian Paolo Linda, I forescj); il soreli al colave jù cence sflandôr pai ramaçs dal bosc, che al slungjave simpri plui incà la sô ombrene grise e frede (Pieri Menis, Une letare par Bepo)
      Sin. bati
   2. dal soreli o di altris cuarps celescj, lâ a mont, lâ daûr di alc che no ju lasse viodi:  in chê celeste sere furlane il soreli al colà jù daûr la gobe dai cuei e il scûr al nassè ben planc, di scuindon, dafonts dai rivuats, jenfri lis cjarandis fissis (Dino Virgili, La aghe da pît la cleve)
      Sin. lâ jù , bonâ , tramontâ , lâ a mont¹ , platâsi , scuindisi
   3. (fig.) rivâ in grande bondance:  là di Baduscli a colin palanchis cu la palote (Josef Marchet, Lis predicjis dal muini)
      Sin. plovi¹
3. v.intr. de part di un organisim, distacâsi de sô sede:  in chei dîs un sirocâl al faseve colâ lis fueis prin da la ore (Pieri Somede dai Marcs, Sant Simon: 28 di Otubar 1917); intant la sô salût e leve simpri piês, i jerin colâts i dincj denant, la muse e jere dute une grispe (Pieri Somede dai Marcs, A jerin lagrimis)
   Sin. cjadê , vignî jù
   
   1. dai cjavei, no cressi plui:  a vincj agns a àn za tacât a colâi i cjavei, cumò che a'nd à trente al è coçon
4. v.intr. di part dal cuarp, stâ intune posizion plui basse dal normâl par vie dal pês, de etât e v.i.:  in cualchi conte si dîs che aes aganis ur colavin lis tetis, alore lôr, par che no ur intrigassin cun ce che a vevin di fâ, lis butavin daûr schene; al à il barbonçâl che i cole che no si viôt nancje il cuel
   Sin. lâ jù , vignî jù
   
   1. di part dal cuarp, no jessi te sô posizion normâl, no jessi plui controlade:  [dopo che si veve trat une sclopetade par incident lu vevin] distirât su la taule in cusine, palpant la gjambe bielzà sglonfade, sbridinade dai balins e cul pît insom che al colave di dutis lis bandis (Alan Brusini, Il coragjo de sclope)
      Sin. lâ , butâ , bati , finî , balâ
5. v.intr. di costruzion o arbul o sim., no stâ plui impins:  o ai inmò tai voi i peçs alts trente metris, cui braçs tirâts tal colâ par tiere e il bot che a fasevin e lis lidrîs inmò umidis e vivis inceadis e tal doman scridelidis tal soreli (Alan Brusini, Il zardin); Cul taramot dal 1511 al è colât il cjistiel vieri di Udin e po tal so puest a àn fat chel palaç che si viôt cumò
   Sin. ruvinâ , sdrumâ jù , vignî jù , cjadê
6. v.intr. (fig.) di guvier, regjim o dinastie, pierdi il podê dal improvîs:  o vin sperimentât che, cuant che al cole il guvier - in medie ogni vot mês - la int nancje no si çugne (Riedo Pup, A restin nome carabinîrs e predis)
   Sin. cjadê , finî , sdrumâ jù
   
   1. di citât, jessi concuistade o obleade ae rese:  cuant che Gurize e cole, tal 1916, "chei de manteline", come che a clamavin i soldâts talians, no si compuartin propite benon cu la popolazion civîl (Angelo Floramo, Cuintristorie dal Nûfcent 1910-1920)
      Sin. cjadê
7. v.intr. (fig.) no rivâ a passâ ben une prove:  colâ inte domande plui facile
   Sin. pierdisi , falâ , falî , sbaliâ
8. v.intr. ancje cu la particule "i", finî imbroiât o intun pont de discussion dulà che si scuen dâ reson a chel altri:  se al viodeve, metìn, vignî fûr un di une bande là che a no jerin i siei cjamps, lu frontave cun tante polegane che lu faseve colâ (Lucio Perès, Vigji il vuardian); lu faseve spietâ intal puest precîs che jê e veve stabilît e dopo, magari, nancje no si presentave. De bande sô Nedo si imprometeve di no colâi plui (Gianni Gregoricchio, Trê feminis)
9. v.intr. (fig.) no vê plui valôr, efiet e v.i.:  la vecje toponomastiche leade al mont agricul no ven plui doprade ancje parcè che al cole il leam tra il doprâ i lûcs e il non (Rino Gubiani, Studi da la evoluzion dal paisaç mediant i toponims); lassâ colâ une domande cence rispuindi
   Sin. distudâsi , finî , smamîsi , smavîsi , sparî , sfantâsi , lâ al mancul
10. v.intr. di comunicazion telefoniche, radiofoniche o televisive, interompisi dal improvîs:  la radio no si sintive. Il segnâl al jere colât (Max Mauro, Un Friûl difarent: i 90 mhz di Onde Furlane); o ai la batarie che e je scuasi finide, se e cole la linie, tu sâs che al è par chel
    Sin. pierdisi
11. v.intr. (fig.) passâ di une situazion a une altre che pal solit e je piês, cjatâsi intune situazion negative:  la Furlanie e colave sot di un paron dûr, risolût a no molâle ni par pôc ni par trop (Josef Marchet, Cuintristorie dal Friûl fin sot la Italie); cuant che un al strace e nol sa doprâ ben la bondance, nol fâs nancje dûl cuant che al cole te miserie (Antoni Beline, Pre Pitin)
    Sin. cjatâsi , finî , lâ a finîle , lâ
12. v.intr. (fig.) finî par pierdi di cualitât, finî intune cundizion o forme che no si pues calcolâ positive:  nus sburtin a dismenteâ inte ilusion che il consum di prodots nus rindi libars e imortâi, intune semplificazion de realtât che e fâs colâ il pinsîr inte banalitât plui totâl (Walter Tomada, Pierluigi Cappello: «L’om plui concret? Il poete»); il bal al cole tal satanic. Il cjalt al scjafoie, il sudôr al scomence a puçâ (Arturo Feruglio, Viaç a Vignesie)
    Sin. scjadi , sbrissâ , lâ jù
13. v.intr. (fig.) di alc di negatîf, capitâ:  lis vueris che a son coladis, une daûr di chê altre, sul cjâf de nestre int, no àn sparagnade nissune famee (Gianni Gregoricchio, Trê feminis); i vignivin tal cjâf lis vecjis storiis, sintudis di frut, che a contavin de vôs dal sanc, des maledizions che a colavin su chei che a alçavin la man cuintri i lôr viei (Roberto Ongaro, Il muc); al fo propit in chel Jugn morentât, che un gnûf dolôr al colà su chê cjase che e scomençave a insestâsi e comedâsi tes robis (Maria Forte, Cjase di Dalban)
    Sin. capitâ , finî , lâ , plombâ , sucedi , rivâ , vignî
    
    1. ancje di ciertis situazions che a puedin jessi neutris o positivis:  al colà un zito dopo lis peraulis di Carmine. E po Carmine al alçà il cjâf (Dino Virgili, La aghe da pît la cleve); la sielte e je colade su la biele storie dal surisin che al cîr la felicitât (Erika Adami, A Tavagnà si jude il furlan)
14. v.intr. finî, in gjenerâl par câs o par resons che no si puedin controlâ, intune cierte posizion, compagnie e v.i.:  cheste volte tal eterni zûc de vite e veve saltât un grum di caselis e e jere colade in chê plui fortunade di dutis (Carlo Sgorlon, Ombris tal infinît); cuant che o soi lât a scuele o soi colât cu la stesse mestre che al veve vût gno fradi
    Sin. jessi¹ , finî , cjatâsi , intivâsi , lâ a finî , lâ a finîle , tocjâ
15. v.intr. dai voi, de cjalade e v.i., indreçâsi par câs su alc o cdn.:  cuant che o jeri daûr a tornâ sù, il voli mi colà tun cjanton, juste chel là che parsore al jere postât Alberti (Gianluca Franco, Il solt di Arlunc)
    Sin. finî , lâ
16. v.intr. lâ a tocjâ un ciert argoment:  il discors al colà sui Batistons, sul matrimoni di Guri e Nita (Dino Virgili, La aghe da pît la cleve)
    Sin. lâ , tocjâ , finî , rivuardâ¹ , bati
17. v.intr. ricori intun timp determinât di setemane o di lunari o cuntune cierte periodicitât:  il scûr al jere penç, che al colave il gnûf di lune (Gianni Gregoricchio, Trê feminis); in chel an Pasche e colave adore: i mandolârs e i ciespârs a jerin ducj in flôr e lis âfs a businavin tra i ramaçs (Pieri Somede dai Marcs, Par une lengate)
    Sin. jessi¹ , tornâ , vignî
18. v.intr. (fig.) di cdn. o dal so vivôr, cedi par vie di un sfuarç masse grant, no resisti plui:  o sint che mi molin i zenoi e colâ lis fuarcis (Ivano Urli, Storie di Min)
    Sin. pierdisi , slacâ , socombi , sparî , sfantâsi , lâ in nuie , lâ al mancul
    
    1. vê une depression:  nol podeve tornâ a colâ e bandonâsi come prime (Maria Forte, La tiere di Lansing)
19. v.intr. di presits, cuotazions e v.i., vê un ribàs une vore fuart:  lis istessis nâfs a vapôr che a puartavin i emigrants intes Americhis a tornavin a Gjenue e intai puarts europeans plenis di gran coltivât dai americans, cussì che al colave il presit dal prodot european (Elio Varutti, Il Risorziment a Martignà)
    Sin. colassâ , lâ jù , ribassâsi , calâ , sbassâsi
20. v.intr. ancje in domandis pragmatichis o retorichis, sucedi:  "[...] ca no viôt nuie di ce che mi covente." "Po ce ti colial cumò? No sâstu là che e je la tô robe?" (Costantino Smaniotto, Maridâsi...!?)
    Sin. nassi , jessi¹ , sucedi
    Cfr. vê
21. v.intr. fâ une pression suntun pont, su alc o su cdn.:  il pês dal arc al cole te stesse misure su lis dôs colonis
    Sin. pesâ , tocjâ
    
    1. (fig.) vê di jessi sopuartât:  o podìn svantâsi di vê vût i alpins, che no àn mai amade la vuere, stant che il so pês al è simpri colât soredut su la lôr gobe (Angelo Floramo, Cuintristorie dal Nûfcent 1940-1950)
       Sin. pesâ , cjalcjâ
22. v.intr. di un vistît, di une tende, di cjavei e v.i., lâ jù intune cierte posizion o intun mût particolâr:  ogni tant Rosute si fermave a tirâsi sù cu la conole un riçot restîf che i colave jù pe muse (Dino Virgili, La aghe da pît la cleve); al jere un om grant e sec, cui cjavei grîs che i colavin sul cerneli e lis orelis (Carlo Sgorlon, Prime di sere); cjadenis di aur che a lavin in zîr dal cuel dôs voltis prime di colâ jù fin ae cinturele (Pieri Menis, Chei di Muraie); si tire jù la barete che i colave fin sul nâs (Pieri Menis, Un macet di sanmartinis)
    Sin. stâ , vignî jù , lâ jù
23. v.intr. finî intune cundizion negative pal umôr, pe morâl, pe legalitât e v.i.:  si jere come inflossît, e al colà dentri i pinsîrs plui neris (Maria Forte, Mabile la Lunghine); a fuarce di volê lâ cuintri il conformisim uficiâl, a colin intun conformisim contrari (Josef Marchet, Cuintristorie dal Friûl fin sot la Italie)
    Sin. finî , lâ , sbrissâ , subissâsi , lâ a finîle
24. v.intr. [CO, TS] ling. di acent, jessi suntune cierte vocâl o silabe:  se l'acent tonic al cole su la ultime vocâl scuvierte des peraulis polisilabis, si scrîf l'acent grafic
    Sin. finî , jessi¹ , lâ
25. v.intr. [CO, TS] ling. di sun o foneme o secuence di suns o fonemis, pierdisi, no jessi plui pronunziât:  cundut che daûr di ciertis osservazions gjenerâls la lenizion par furlan no rive a fâ colâ lis dentâls intervocalichis (simpri Benincà, 1989), si cjate che in cualchi câs [d] intervocalic posttonic al cole (Sandri Carrozzo, Di VĬDĔO a viôt e di CRĒDO a crôt. Une ipotesi di derivazion)

Polirematichis e espressions idiomatichis

• colâ il voli loc.
• colâ jù loc.v.
• fâ colâ i braçs loc.v.
• fâ colâ i coions loc.v.
• fâ colâ lis balis loc.v.
• lassâ colâ loc.v.
• lassâsi colâ loc.v.

Proverbis:

• al è passât il timp che a colave la mane
• al prin colp nol cole l'arbul
• che al coli il mont, baste che nol coli par me
• cuant che il piruç al è madûr, al cole
• cuant che la piruce e je madure, e cole
• cui che al à la cjamese scuintiade che al stedi atent che no i colin i bregons
• cui che al è plui in alt nol pense che al po colà
• cui che al nas disfortunât ancje se al cole par daûr si romp il nâs
• cui che si sente sun dôs cjadreis dispès al cole par tiere
• cul lâ ator di gnot si cole tal poç
• cuntun colp nol cole l'arbul
• e clope ancje la code dal mus, ma no cole
• e treme la code dal mus, ma no cole mai
• il fûs cuant che al cole al zure il vêr
• il miôr piruç i cole in bocje al purcit
• il mus che al è colât une volte nol cole plui
• il piruç co al è fat al cole
• il piruç nol cole mai lontan dal piruçâr
• insom de scjale si cole
• l'arbul al cole di chê bande che al pent
• l'arbul al cole di chê bande che al plee
• la blesteme a va ator siet agns e po e torne a colâ su par cui che le da
• la tampieste e cole simpri sui cjans magris
• la trope prudence e cole in imprudence
• lis botis no colin mai dutis intune volte
• lis maledizions a van trê dîs par lûc, po a colin là che e je la colpe
• nissun mestri nol è colât dal cîl
• no cole une fuee cence il permès di Diu
• par un colp nol cole il len
• se al plûf il dì di Sant Barnabè, e cole la ue fin che a' nd è
• un vuarp che al mene un altri vuarp a colin ducj i doi te buse