Dizionari de Lenghe Furlane

plovi¹  /-ó-/  plo|vi  [FO]

1. v.intr. impers., vignî jù des gotis di aghe dai nûi:  ancje chê dì al veve plovût a selis dute la buinore, e nome viers misdì si jere salustrât a tramontane (Alan Brusini, Par stradis lungjis); al durmive sot il stelât e, se al ploveve o se al jere masse frêt, inte stale di cualchi famee (Roberto Ongaro, Cretevierte); in chê domenie di fin di Otubar al ploveve che Diu le mandave (Pieri Menis, Chei di Muraie); al rivà l'an dal sut, che in dute la stagjon nol veve plot mai, e il riul al jere sec (Riedo Pup, Vergjilio)
   Var. maiâ
   Cfr. sglavinâ , sbivicjâ , rasinâ , rasicjâ , gotâ
   
   1. jentrâ de aghe de ploie dentri tun ambient:  o ai trê fruts e l'om ducj intun grum, intune barache dulà che al plûf pardut (Pieri Somede dai Marcs, Cjase di fitâ)
      Sin. gotâ
   2. [BF] fâ vignî la ploie:  Lui [il Signôr] al plûf e al trai soreli su dutis lis cjasis (Pieri Piçul, Vieri e gnûf)
2. v.intr. (fig.) vignî jù, colâ:  jo o durmivi […] tune stanzie là che al ploveve des frisis dal sofit di breis il patùs che a jevavin sù lis surîs tes lôr scanis sul cjast (Meni Ucel, Messe a straoris); lis granadis che a sclopavin in alt a fasevin plovi su la piche «a raggera» manadis di plomp (Pieri Menis, Cemût che o soi restât caporâl); te cjamare dal ospedâl e jere chê lûs frede. E ploveve di un barcon larc che al dave suntun vialut di pins (Agnul di Spere, I prâts des Savodagnis); dôs feminis stavin inzenogladis ai pîts del jet, e lis lagrimis gji plovevin a cuatri (Federigo Comelli, Il me paîs); saetis che a plovevin dal cîl su la puare int riparade sot di une linde (Pieri Somede dai Marcs, Ta la ombre dal santuari)
3. v.intr. (fig.) molâ jù aghe o cualchi licuit:  "[…] Striça la cotala che a ti plouf" (Novella Cantarutti, La aga di Plan da li steli); la biondone dute in glorie e ploveve di sudôr jù pal agâr de schene (Dino Virgili, La aghe da pît la cleve)
4. v.intr. (fig.) rivâ in maniere fisse, sedi di robis concretis che imateriâls:  i creditôrs scomençarin a fâ plovi lis petizions (Federigo Comelli, Il me paîs); il gjornâl locâl, che su cheste robe al leve a gnocis, al publicave ogni dì letaris e articui che a plovevin di ogni bande (Fabian Ros, L'om che al pierdeve pinsîrs pe strade)

Proverbis:

• beât chel muart che al plûf sul so cuarp
• bisugne sparagnâ la ombrene par cuant che al plûf
• cuant che al è nûl, al po plovi cuant che al vûl
• cuant che al plûf e al è soreli, si petenin lis striis
• cuant che al plûf il prin martars di lune, no si à sec plui par chê lune
• cuant che il soreli la joibe al va tal nûl, domenie al plûf sigûr
• fumate basse, bon timp e lasse; fumate alte, al plûf cuant che i salte
• il test di Bertolt nol fale mai: cuant che al plûf lui al rît e cuant che al è soreli al vai
• lavâ cuant che al plûf e suiâ cuant che al è soreli
• pai predis se nol plûf al gote
• se al plûf a Sant Zorzon, siet montanis e un montanon
• se al plûf a Ssant Laurinç, la campagne le vinç
• se al plûf il dì de Sense, par cuarante dîs no si sta cence
• se al plûf il dì di Sant Barnabè, e cole la ue fin che a' nd è
• se al plûf il dì di Sant Zorç, il cavalîr al va te cort
• se al plûf il dì di Sant Zorzon, la vendeme a va malon
• se al plûf Vinars Sant, al plûf l'an dut cuant
• se al plûf Vinars Sant, arsure l'an dut cuant
• se al plûf Vinars Sant, la tiere no je mai sazie
• se nol plûf al gote
• se nol plûf alc al ven fûr