Dizionari de Lenghe Furlane

svolâ  svo|lâ  [FO]

1. v.intr. movisi tal aiar fasint cuintri ae fuarce di gravitât:  lis cisilis a svolavin come matis ator dal cjampanili, e il soreli al gjavave fûr riflès di inceâ des gornis gnovis e des lastris dai barcons (Carlo Sgorlon, Prime di sere); o vevi viodût un gnotul che mi svolave parsore dal cjâf in plene dì (Checo Tam, Neapolis); tal cidin, si sintin svolâ i avons (AAVV, Sul florî); dôs voltis i avions dai todescs, svolant râs tiere, a vevin metraiade chê altre spuinde (Agnul di Spere, Spietant)
   Var. svualâ , svuelâ
2. v.intr. viazâ dentri di un aeromobil o di un velivul spaziâl:  o ai il brevet e o ai svolât tant te vite (Christian Romanin, Un president di transizion)
3. v.intr. di ogjet lizêr, movisi tal aiar sburtât dal vint o sim.:  la int intei curtîfs e finive in chê volte di bati, e ancjemò pal aiar e svolave la bule (Catarine Percude, Il prin sarasin); la buere mi varès grimpât e fat svolâ tant che une plume (Carlo Sgorlon, Il dolfin)
   
   1. jessi scjassât dal vint o sim., ancje cence lâ lontan:  lis machinis, corint cussì imburidis, i fasevin svolâ lis cotulis e ancje i cjavei cun dute chê arie (Renza Battistella, No son plui vitis a spelâ vuitis)
4. v.intr. movisi par aiar sburtât di une fuarce esterne, ancje violente:  e saltà fûr une barufone tremende. Al svolà di dut: il grumalut, tocs di pan, un pac di spongje, sedons, plats, pignatis, tacis… (Roberto Meroi, Pistums); a cjolevin sù i claps jenfri lis Sinis dal binari 3 e ju tiravin ridaçant di gust, cirint di fâ svolâ par aiar chê scjate di bire, rosse (Agnul di Spere, La scjate rosse)
5. v.intr. (fig.) jessi mot o dât cun fuarce:  nol jere propit di escludi che a svolassin ancje cuatri sganassons (Laurin Zuan Nardin, Stramp)
6. v.intr. colâ jù cun fuarce par vie de gravitât:  Lele al svole par trentecinc metris. Il so cuarp al bat plui voltis cuintri la mont e cuant che ae fin la cuarde lu ten, plui lungje dal solit pal rimant mancjât, si cjate plui in bas dai amîs (Cristina Noacco, Faliscjis)
   Sin. colâ¹ , plombâ , precipitâ , sdrumâ
   
   1. (fam.) pierdi l'ecuilibri e colâ par tiere:  ocjo di no svolâ che al è bagnât
7. v.intr. (fig., iperb.) movisi cun grande sveltece:  il vint soflava a favôr. La barcja svolava (Federigo Comelli, Il me paîs)
   Sin. cori , filâ , precipitâsi , scjampâ
   
   1. lâ di corse, spesseâ:  al svolà alore in paîs e dopo un pôc al tornà sù cuntune scuadre dai siei (Pieri Menis, Sul agâr); e vidintle viars me a movi il pas / corei, svolai, precipitai des scjalis (Ermes di Colorêt, II, 232)
      Sin. cori , precipitâsi
   2. finî fûr di control a grande velocitât:  la machine svualà fûr di strade crevant i arcazios dal ôr de fuesse e si pleà lant jù a sfracaiâsi (Sandri Di Suald, Ah! la provincie)
8. v.intr. (fig.) movisi cun grande lizerece:  invezi di cjaminâ tu svolavis su li pontis dai pîts (Zuan Morsan, Zovin di lune)
9. v.intr. movisi tal aiar tant che mieç di trasmission:  i glons di duti li cjampani da li vili a svualavin pa la aria glaçada (Novella Cantarutti, Scûr e lusour); la ultime note dal piano e svolà di bessole tal aiar, si strucjà difûr marcolant pal zardin indurmidît, e svampì (Dino Virgili, La aghe da pît la cleve)
10. v.intr. (fig.) spandisi svelt:  tai paîs lis novitâts a svolavin e ca di un pôc ducj a varessin savût cui che al jere (Carlo Sgorlon, Prime di sere)
11. v.intr. (fig.) dal pinsîr o sim., indreçâsi a un ogjet, a un argoment, ancje cun libertât o indeterminazion:  il pinsîr al jere bielzà daûr a svolâ inta chê isule sintude a innomenâ intal timp de scuele (Gianni Gregoricchio, Trê feminis); Meni al si cuietà e al lassà svolâ lontan il so pinsîr (Pieri Somede dai Marcs, Il segno)
    Sin. lâ , cori , vagolâ , navigâ
    
    1. lâ cul pinsîr, cu la imagjinazion o sim. a un ogjet, a un argoment o doprâ la imagjinazion in libertât:  par no ruvinâsi el sintiment, e svolâ masse cu la fantasie, al è miôr, inaloris, navigâ tiare tiare, e capî chel che si rive a capî (Arturo Feruglio, Viaç a Vignesie)
       Sin. fantasiâ , impensâsi , lâ ator , lâ fûr , svagâ , vagolâ , viazâ , lâ
12. v.intr. (fig.) di timp, cori vie svelt:  zemût che al passe il timp! / Zemût che i agns a svolin! (Maria Gioitti del Monaco, Il timp al passe); mi cjati ancje dispès cu lis mês amiis e, cuant che o passi il dopo misdì cun lôr, fra compits, babadis, ridadis e strambolots, mi divertìs une vore e il timp al svole (AAVV, Sul florî)
    Sin. cori , cori vie , fuî , lâ vie , scjampâ , scjampâ vie , svolâ vie

Polirematichis e espressions idiomatichis

• svolâ cence alis loc.v.

Proverbis:

• bêçs di pote ai van che ai trote; bêçs di stole ai van che ai svole
• cui che al cor al cor e cui che al scjampe al svole
• il timp al svole
• la peraule e svole, la cjarte e reste
• no bisugne cjapâ dutis lis moscjis che a svolin
• robe di stole e va che e svole