Dizionari de Lenghe Furlane

navigâ  na|vi|gâ  [AF]

1. v.intr. viazâ cuntune nâf, cuntune barcje e v.i.:  si viôt la isule “Fernando di Noronha” là che a vivin pôcs pescjadôrs e al è un grant penitenziari. A son vot zornadis che o navighìn: Colomp, par rivà fintremai achì i à metût trê mês! (Vico Bressan, Cîl e aghe)
   
   1. v.tr. traviersâ cuntune nâf, cuntune barcje e v.i.:  il poete al podeve colocâ il so Purgatori tal mieç dal mâr nome par vie che in chê volte nissun lu veve navigât (Carlo Sgorlon, Il dolfin)
2. v.intr. di nâf, barcje e v.i., viazâ, passâ par une aghe:  il cjapitani de nâf al disè che la nâf no jere stade colpide e che e navigave regolarmentri (Checo Tam, La vuere di Checo)
   
   1. v.tr. di nâf, barcje e v.i., traviersâ une aghe:  cetantis imbarcazions che e navighin la lagune! (Arturo Feruglio, Viaç a Vignesie)
3. v.intr. (fig.) viazâ o lâ ator, ancje no su la aghe, soredut cuntune idee di durade tal timp o di ripetizion o di indeterminazion:  a di chê ore al navigave cul so fagotin daûr la schene sù pal stradon da bande di tramontane (Luigi Gortani, Sant Martin); pe campagne di Sante Marie e Sclaunic al navigave su la biciclete nere Tilio Repece, cognossût par Tilio Vuardian (Ivano Urli, Sisilis)
   
   1. ancje di strade, flum e v.i., lâ di une cierte bande, vê un ciert percors:  passât Cividât, la viere capitâl dal Friûl, sù sù par chê strade che e navighe ad ôr dal Nadison, si jentre te cuiete tiere di Sclavanie (Josef Cjargnel, La regjine dal Landri)
4. v.intr. (fig.) dal pinsîr o sim., indreçâsi a un ogjet, a un argoment, ancje cun libertât o indeterminazion:  e chel cîl ce misteri! / Ce navigâ pal cîl la fantasie! (Enrico Fruch, Sul puint di Premariâs); pal cjâf i navigavin i pinsîrs di prime, ma no si sintive di tornâ a fevelâ di chês robis (Nadia Pauluzzo, Il bintar)
   Sin. lâ , cori , vagolâ , svolâ
5. v.intr. (fig.) frontâ situazions, rivâ a lâ indenant:  ma dut il mont al sa / che son umign distints / capaçs di navigâ / cun ducj i vints. / Cul to cjâf, cul to mont, / Çorut lasse i progjets: / no tu pûs stâ al confront / di chei sogjets (Pieri Çorut, Orès lâ a Triest); la Nande si adatave al dut e e navigave cence rompisi masse in chê miserie sbaldide (Maria Forte, La cjase dal Murat)
   
   1. lâ indenant cuntune cierte maniere di fâ o di pensâ:  tô mari e je une buine femine, ma e navighe ancjimò cu lis ideis di une volte (Vittorio Vittorello, A ogni cost)
6. v.intr. (fig.) impegnâsi par vê un ciert risultât:  "Doman o passantdoman al ven fûr el lunari e bisugne che o navighi par podê vendilu!" (Arturo Feruglio, In cîl e je une stele!…); a vevin tant navigât par tignî drete la famee (Pieri Somede dai Marcs, Cun pocje spese…); jê si rindè cont di jessi strache, che e veve navigât dut al dì (Jolanda Mazzon, Fûr di timp)
   Sin. spesseâ , movisi , niçâsi , cori , dâsi lis mans intor , dâsi da fâ , lavorâ , trotâ

Proverbis:

• bisugne navigâ seont il vint
• daûr vint ducj sa navigâ