Dizionari de Lenghe Furlane

movisi  /-ó-/  mo|vi|si  [FO]

1. v.pron.intr. cambiâ di puest o di posizion:  Miriam si movè intal sium, trabascjant cualchi peraule (Gianni Gregoricchio, Trê feminis); lu tocje, lu cjape pe man, lu clame, ma chel nol rispuint, no si môf (Pieri Menis, Chei di Muraie); la gravitazion e à une carateristiche universâl: doi cuarps cualsisedi che a si movin intun cjamp gravitazionâl a seguissin la stesse traietorie a la midiesime velocitât (Sergio Cecotti, Teologjie algjebriche)
   Var. muevisi
   
   1. cjaminâ, lâ ator:  cumò si moveve nome cul zirel o cul baston (Checo Tam, Anglia Ford 1960)
   2. di mecanisim, aparât e v.i., jessi in funzion, metisi in funzion:  cumò a vegnin metûts sù simpri plui dispès implants eletrics che a fasin movi automatichementri lis cjampanis (Monika Pascolo, Il sun de fieste)
      Sin. funzionâ , partî¹ , lâ , jessi in vore , metisi in vore
2. v.pron.intr. tacâ a lâ intune cierte direzion:  - Viodêtmi di chel frut! - al sconzurà co si moverin i cjars (Dino Virgili, La aghe da pît la cleve)
   Sin. direzisi , indreçâsi , partî¹ , slontanâsi , tirâ , trasferîsi
   
   1. lâ vie di un ciert puest:  di Vinars Sant nissun si môf di cjase (Pieri Somede dai Marcs, Resurezion a Pontinie)
3. v.pron.intr. (fig.) cambiâ di maniere di fâ, di pensâ e v.i.:  daspò che o soi inta chest mont, jo no ai mai voltât bandiere […] nissun al è stât babio di fâmi movi di un pêl (Guido Antonioli, Florean dal Palaç, I, 1)
   Sin. cedi , cessâ , desisti , lassâ , molâ , recedi , ricessâ , rinunziâ , zirucâ
4. v.pron.intr. fâ une azion svelt:  moviti, moviti cun chê scove, e viôt di netâ pal ben (Pieri Somede dai Marcs, La buteghe dal barbîr)
   Sin. cori , niçâsi , spesseâ , bailâ , messedâsi
5. v.pron.intr. (fig.) impegnâsi par une situazion o une cuistion, intun setôr e v.i.:  [Radio Onde Furlane] e vûl jessi, e in pôc timp lu devente, un centri di riferiment par chel che si môf tal mont de culture e de creativitât furlane (Max Mauro, Un Friûl difarent: i 90 mhz di Onde Furlane)
   Sin. bati mans e pîts , butâsi in cuatri , dâi daûr , dâi sot , dâsi ator , dâsi da fâ , dâsi lis mans ator , impegnâsi , intervignî , messedâsi , metisi sot , spindisi

Proverbis:

• cui che al sta ben che no si movi
• la pale che si môf si lustre