Dizionari de Lenghe Furlane

scjampâ  scjam|pâ  [FO]

1. v.intr. lassâ di corse un puest, soredut par no patî un dam o par slontanâsi di un pericul:  Lise lu cjape e ti comence a pestâlu, ma il frut al rive a scjampâi des mans e si met a cori jù pal curtîl (Pieri Menis, Tinut di Libro); i sin rivâts a pena a scjampà. Dal solâr al lun di luna i ai jodût i Turcs rivâ ta la grava (Pier Paolo Pasolini, I Turcs tal Friûl)
   Sin. batise , brusâ il paion , filâ , filâse , filâ vie , fuî , lâ vie , mocâ , mocâle , mocâle vie , mocâse , mocâse vie , niçâse , niçâse vie , sbignâle , sbignâse
   
   1. dislontanâsi di un lûc li che si è sierâts o obleâts a stâ:  Joseba Sarrionandia, professôr universitari e scritôr […] condanât intal 1980 a 22 agns di preson cu la acuse di jessi membri di ETA […] al scjampe de preson di Martutene par jentrâ in clandestinitât (Carli Pup, Teritoris - Oms di Libertât)
2. v.intr. rivâ a salvâsi, ancje cence une azion di slontanâsi o par câs:  di dute chê int, tresinte e plui personis, no scjamparin de ruvine che la vedue cul so fi e doi altris fruts (Catarine Percude, La fuiace de Madone)
3. v.intr. (fig.) gjavâsi fûr di une situazion negative:  li che o voi, la int e à bisugne di nô: a 'nd è lavôr par dutis chês che come me a scjampin de miserie (Antescûr, Se Diu al vûl)
   Sin. lâ vie , slontanâsi
4. v.intr. (iperb.) lâ vie di premure:  cumò o scuen scjampâ che o ai un che mi spiete (Roberto Ongaro, Cretevierte)
   Sin. cori , cori vie , lâ , lâ vie
   
   1. lâ svelt o par pôc timp intun puest:  «Ach, Peter!» e scjampà jù in cantine a cjolimi la bire (Pieri Menis, La gjaline robade); e jere scjampade a clamâ il miedi (Franca Mainardis, Aiar di cjase)
5. v.intr. (fig.) dal timp, passâ svelt:  i agns a scjampin
   Sin. cori , filâ , lâ , lâ vie , fuî
6. v.intr. (fig.) lâ vie, lâ al mancul, sparî:  a pensâ dulà che [il vin] al jere stât par tant timp [tune tombe], la gole e scjampave (Pieri Menis, Doi pizighets e un lari)
   Sin. passâ
7. v.intr. colâ di man o no jessi plui controlât:  un reful i fe scjampâ un moment il rem da lis mans: si pleià la barcja sot chel impit del vint (Federigo Comelli, Il me paîs)
   Sin. sbrissâ
8. v.intr. vignî dit o scrit, ancje se nol pâr bon, se nol è just, coret e v.i.:  dineâ di vê viodût e sintût, cul terôr di lassâsi scjampâ une mieze peraule, un suspîr, une esitance (Franco Marchetta, Madalene); bon, va ben, e scjampe ancje cualchi blesteme… (AAVV, Sul florî)
   Sin. sbrissâ
9. v.intr. di espression, azion e v.i., no podê jessi stratignude:  Catine e fasè muse contegnose, ma i scjampave di ridi (Gianni Gregoricchio, Trê feminis); i scjampà un berli, sigûr plui di sorprese che di pôre (Antescûr, L'om misteriôs)
10. v.intr. ancje cun subiet sotintindût, di stimul fisiologjic, fâsi sintî:  mi scjampe di fâ 'sisin; cumò i scjampave une biele cagade (Checo Tam, La invasion)
    
    1. (coloc.) di gas o escrement, lâ fûr dal cuarp par vie che no si rive plui a stratignîlu:  i è scjampade une pedeade
11. v.intr. (fig.) no jessi viodût, notât o capît:  agne Ursule, e veve di viodi dut ce che al jentrave e ce che al jessive […] no i scjampave nuie di ce che al sucedeve in chê cjase (Pieri Menis, Agne Ursule); a mê mari no i jere scjampade la ande di cjoli vie di lui (Gianni Gregoricchio, Trê feminis)
    Sin. cori vie , passâ vie , sbrissâ
12. v.intr. (fig.) lâ fûr di cjâf, no jessi ricuardât:  i scjampave de memorie ancje il so non di Rite (Alan Brusini, Come tai romançs)
13. v.intr. (fig.) refudâsi di cognossi o di frontâ alc:  il pelegrinaç nol à mai di jessi un scjampâ de realtât, ma une fuarce par tornâ te realtât (Antoni Beline, Sant Jacum, là che al finìs il mont)
14. v.tr. evitâ:  Zuan lu cirive e lu scjampave tal stes timp. Alc i faseve pôre e alc lu tirave in chel om (Maria Forte, La tiere di Lansing)

Polirematichis e espressions idiomatichis

• scjampâ di cjase loc.v.
• scjampâ la anime loc.v.
• scjampâ la pazience loc.v.
• sierâ il cjôt dopo scjampade la purcite loc.v.
• sierâ la puarte dal cjôt daspò scjampât il purcit loc.v.

Proverbis:

• a messe là che al sune, a scjaldâsi là che al fume, a mangjâ là che al è pan e scjampâ là che si dan
• cui che al cor al cor e cui che al scjampe al svole
• cui che al scjampe al à lis alis
• cui che al scjampe un pont, ind scjampe mil
• dai al cjan cuant che al scjampe
• dal destin no si scjampe
• de man di Diu no si scjampe
• ducj a àn coraç cuant che il lôf al scjampe
• il diaul co al viôt la crôs al scjampe
• il trist al scjampe ancje se nissun no i cor daûr
• la peraule che e scjampe e sa indulà che e va
• no bisugne lassâ scjampâ il jeur par pôre di ruvinâi la piel
• no si à di sierâ la chebe co l'uciel al è scjampât
• no stâ corii daûr a cui che al scjampe
• no stâ spietâ di sierâ il cjôt daspò scjampade la purcite
• par salvâ la piel no stâ lassâ scjampâ il jeur
• par scjampâ de miserie si à di lâ là che a son cjamins che a fumin e no cjampanii che a sunin
• trê robis a fasin scjampâ la int di cjase: il fum, la triste muîr e la cjase discuvierte
• trê robis a fasin scjampâ la int di cjase: la cusine fumose, la femine rabiose e la cjase discuvierte