Dizionari de Lenghe Furlane

filâ  fi|lâ  [AF]

1. v.tr. (ancje ass.) lavorâ fibris o altris materiâi in maniere di formâ un fîl:  une biele dì la madrigne i da un fas di cjanaipe e, lant a passon, che le fili, se no guai a jê (Popolâr - Andreina Nicoloso Ciceri, La fie e la fiastre - Racconti popolari friulani I); prime di metisi a gucjâ o a filâ la lane, jê e tignive sù rosari (Pieri Somede dai Marcs, A jerin lagrimis)
2. v.tr. (ancje ass.) ancje di besteutis, tant che ragns o cavalîrs, fâ il fîl de tele o de galete:  lusinte come i cavalîrs che van a filâ (Luigi Gortani, Meni Fari)
   
   1. di ciertis sostancis, formâ filaments:  il vin e l'asêt lâts di mâl e filin (Giulio Andrea Pirona, Ercole Carletti, Giovanni Battista Corgnali, Il Nuovo Pirona); il frico, a croste indorade o a cûr tenar e che al file, al concuiste ducj (Serena Fogolini, Il frico ae concuiste de Americhe)
3. v.intr. lâ svelt:  ur zirà la schene a ducj e e filà a sentâsi di chê altre bande (Gianni Gregoricchio, Trê feminis); la barcje e filave sul flum (Done Bete, La Sunte pescjadore)
   Sin. cori , lâ vie
   
   1. scjampâ:  il gjat che al nase il trist timp, al file fûr pa puarte, al travierse il paîs come une saete, e vie di cariere vierte pa campagne (Luigi Gortani, Il prin gjat a Glemone)
      Sin. cjapâ sù il trenteun , discjolisi , fuî , gjavâsi , lipâ , marcjâ¹ , scjampâ
   2. passâ, lâ indevant, sucedi intune cierte maniere:  dut al filave ben se un al saveve rispuindi just ma se si inçopedave in alc l'inzegnîr al leve in bestie (Franco Vigo, Unitâts des misuris)
      Sin. lâ , lâ vie , cori , procedi
4. v.intr. davuelzisi in maniere coerente:  mai domandâ ce che si vûl, ma refudâ par podê vê. El rasonament al file (Arturo Feruglio, Viaç a Vignesie)
   Sin. cori , rezi , stâ in pîts , tignî pont , tacâ , stâ sù
5. v.intr. pensâ e tornâ a pensâ a alc, spec. in maniere ossessive, cun risintiment, cun displasê e v.i.:  cualchi volte e filave a lunc suntune cagnere, i dave fastidi alc di usuâl, e fricave cence reson (Dino Virgili, La aghe da pît la cleve); agne Mine e jere masse impegnade a filâ su lis sôs disgraciis e a masanâ improperiis (Franca Mainardis, Il sium di Lissandri)
   Sin. filâ sore , filâ parsore , filâ sù
   
   1. pensâ lant daûr de fantasie:  al veve plui gust, a pene che al podeve, di stâ di bessôl a filâ cui siei pinsîrs, cui voi pierdûts (Pieri Menis, Sul agâr)
6. v.intr. dal gjat, fâ un sunôr tipic, vibrât, cuant che al è content
   Sin. ronronâ , fâ fûs
   
   1. fâ un sunsûr che si somee cun chel che si fâs fasint il fîl:  un filâ di viulins / cun cualchi sclipignade / di arpe, ogni lant (Ercole Carletti, Prin di durmî)
7. v.intr. dai fasûi e di altris plantis che si rimpinin, cressi e lâ une vore insù

Polirematichis e espressions idiomatichis

• filâ parsore loc.v.
• filâ sore loc.v.
• filâ sù loc.v.
• vê un frut parsore filâ loc.v.
• vê un frut sore filâ loc.v.

Proverbis:

• a cui che al file ben, rompii lis gjambis; a cui che al file mâl, rompii i braçs
• cuant che si vierç il fassinâr, si cognòs cemût che a àn filât i cavalîrs
• cui che al file al à cjamese, cui che nol file ind à dôs
• e je triste la lane che no si po filâ
• no si file mai tant sutîl che il cjaveç nol salti fûr
• nol è plui il timp che Berte a filave
• parê e no jessi al è tant che filâ e no tiessi
• se si file dal nâs a la bocje, no torne su la rocje
• se si file mai tant che al rivi dal nâs a la bocje, e je une glagn che no torne su la rocje
• se si podès filâ ducj i fîi, si tirarès dongje ancje lis telis di ragn