Dizionari de Lenghe Furlane

sbrissâ  sbri|ssâ  [FO]

1. v.intr. movisi cuntun moviment continui, cence pierdi il contat cu la superficie, parsore di un plan orizontâl o di rive jù:  dôs lagrimonis i sbrissarin jù pe muse rusine (Pieri Menis, Sot il puarti); aghis lentis di ledruts e di roiis a sbrissavin vie sot i pôi, incidinis e lustris (Dino Virgili, La strade come un destin)
   Var. sbrissiâ
   Cfr. sgliciâ
2. v.intr. pierdi l'ecuilibri, pierdi la prese e colâ o riscjâ di colâ:  si volte a cjalâ par viodi di chel frut forest, cuant che lu viôt sbrissâ di un clap e colâ (Marisa Moretti, Neveade); i cjavai cundut che a jerin ben glacinâts a sbrissavin te nêf (Pieri Somede dai Marcs, 11 di Fevrâr 1929)
3. v.intr. lâ fûr di control par mancjance di prese:  la machine e sbrissà indenant cence nancje strabalçâ, dome une sgliciade lizere (Franco Marchetta, Light my Fire)
   Sin. slicâ , slichiâ
   Cfr. sgliciâ
   
   1. scjampâ des mans, colâ:  Meni Fari une dì al stave juste fasint la polente, cuant che a l'improvîs e vignì la Muart par cjolilu. A mancjà pôc che da fufe no i sbrissàs il mescul fûr di man (Luigi Gortani, Meni Fari); tal sierâ la puarte par difûr, i sbrissà la clâf che, colant, e le a finî intune poçute di aghe ploiane (Roberto Ongaro, Cretevierte)
      Sin. scjampâ
4. v.intr. movisi a planc, o cun prudence, o cence fâsi viodi o sim.:  al slizerì e indolcì i siei moviments, al sbrissà jù dal cjar ben planchin, al slungjà il pas e al rivà une vore lontan dai nemâi (Maria Forte, L'avôt); une sere, une ombre nere e sbrisse di scuindon vie pai inclustris, un pas spaurôs al vergole l'aiar cidin sot i mûrs de cente (Dino Virgili, La Çucule)
   
   1. lâ par pôc timp:  "Che a si podès almancul savê, corpo da la ostrighe, dulà che al è lât cumò a finîle chel altri." "Us ai dit che i no sai… Al sarà sbrissât a cjoli spagnolets." (Anute Fabris, A passe la scalmane)
      Sin. fâ un scjampon , fâ un salt , lâ un salt
5. v.intr. (fig.) colâ un pôc a la volte intune cundizion psicologjiche o morâl negative:  proviodiments imperiâi indreçâts a prevignî il sbrissâ dal cult te idolatrie des iconis (Adrian Cescje, Viaç aes origjins dal Logos); si lassìn sbrissâ, cence inacuarzisi, tal tuessin di un nazionalisim garp (Celso Macôr, Jentrade a Sacheburache)
   Sin. colâ¹
6. v.intr. (fig.) di alc, finî di scuindon o di premure in cualchi alc di sierât strent, tant che une borse, une sachete, e v.i.:  ogni volte che al viodeve un puaret […] al rivave adore di fâi sbrissâ te sachete cualchi franc, cence che al si visàs (Alan Brusini, Trê parabulis)
   Sin. colâ¹ , finî
7. v.intr. (fig.) intune conversazion, intun resonament e v.i., passâ un pôc a la volte di un argoment a di un altri:  al veve menât masse il cjar pal agâr in cuistions dal borc prime di sbrissâ sul argoment che in realtât lu lambicave (Franco Marchetta, Madalene)
   Sin. colâ¹ , finî , lâ a finîle
8. v.intr. (fig.) jessi rimandât, jessi tirât dilunc:  la riunion e je sbrissade ae setemane che e ven
   Sin. finî , lâ , passâ , slitâ
9. v.intr. vignî dit o scrit, ancje se nol è il câs, nol va ben, nol è just, nol è creançôs e v.i.:  se mancje mai e ves di sbrissâti une mieze peraule, a son ancje culì pachis di vueli sant (Ivano Urli, Storie di Min); "O cjacararai ben cun lui: o ai za pensât ce che o dovarai dî." "No copari, jo no lu farès, al podarès sbrissâi alc e comprometi la situazion" (Costantino Smaniotto, Co l'amôr al cimie)
   Sin. sbrissâ fûr , scjampâ

Polirematichis e espressions idiomatichis

• sbrissâ fûr loc.v.
• sbrissâ il voli loc.
• sbrissâ la pene loc.
• sbrissâ la peraule loc.
• sbrissâ parsore vie loc.v.
• sbrissâ vie loc.v.

Proverbis:

• al è miôr sbrissâ cul pît che no cu la lenghe
• ce che al sbrisse nol va in cont
• miôr sbrissâ cul pît che no cu la lenghe