Dizionari de Lenghe Furlane

sbrissâ vie    [CO]

1. loc.v. di cdn., lâ vie, slontanâsi, soredut svelt o di scuindon o cence imparêsi tant:  cjalantmi a pene e je deventade rosse come une bore di fûc, mi à saludât a la largje, e cence dîmi nuie e e je sbrissade vie (Pieri Somede dai Marcs, Anzule); Cumò i soldâts a tornavin. I uficiâi no volevin che la int si fermàs denant de cjase di Solidarnosc. Jean Arnoux al saveve che al jere miôr se no lu cjapavin, e al sbrissà vie framieç de int (Agnul di Spere, Messe di misdì a Varsavie)
   Sin. sbrissâ , sbrissâ fûr , smuçâ , svuincâle , svuincâse , mocâse , scjampâ
2. loc.v. di alc, movisi, slontanâsi svelt o lizêr:  si viodevin grancj nûi neris che a sbrissavin vie a platâ lis stelis, e de bande di Buie si sintive un businôr lontan di tons (Carlo Sgorlon, Prime di sere)
   Sin. lâ vie , cori
3. loc.v. di alc, ancje imateriâl, scjampâ, no jessi stratignût o controlât o capît:  il vueit e il cidinôr si ingrumave li dentri, simpri plui, e il vieli sal sintive sul cûr: al veve une grispe di plui su la muse e al jere deventât plui suturno. Al sintive ancje lui che alc i sbrissave vie (Dino Virgili, La aghe da pît la cleve)
   Sin. scjampâ
4. loc.v. dal timp, passâ, soredut cence efiets, cence risultâts, cence mudaments:  lis oris i passavin dutis compagnis cence che, scuasit, si inacuarzès di chel sbrissâ vie des zornadis (Maria Forte, Cjase di Dalban)
   Sin. passâ , scjampâ , lâ vie

Components:

• sbrissâ v.intr.
• vie s.f., av., inter., s.m.sing., prep.