Dizionari de Lenghe Furlane

plombâ  plom|bâ  [AF]

1. v.intr. jessi verticâl, a plomp o in linie drete cun alc:  la toresse no plombe juste su la façade de glesie (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. colâ¹
   
   1. v.tr. fâ che alc al sedi dret, a plomp:  la man blancje di cjalcine e zonte clap su clap, madon su madon cuntune ande sigure e seguitive; po il voli al smicje dilunc dal orli che no vegnin infûr dal spali tindût, e al plombe i cjantons (Dino Virgili, La aghe da pît la cleve)
2. v.intr. colâ cun fuarce o dal improvîs:  à la cjoche, i zenoi i clopin, al ven indenant, la vite si strucje e al plombe par tiare (Dolfo Zorzut, No je plui vive); il bâr sot i pîts al slacâ tune bugade di turbit, e Vergjilio al plombà te Ledre (Riedo Pup, Vergjilio)
   Sin. colâ¹ , sdrumâ , slacâ
   
   1. v.tr. fâ colâ cun fuarce:  chel altri al sacramente intun lengaç che el Sepulcri nol capìs e inalore par no falâ, al torne a plombâlu dentri [te roie] (Arturo Feruglio, I stivâi di Zuan Batiste)
      Sin. butâ , trai
3. v.intr. fâ sintî dal alt la sô viamence, il so pês e v.i.:  Lui e Avost il soreli al plombave, butant cinise tai voi, lis cialis a seghetavin i pins (Alan Brusini, Il zardin)
4. v.intr. butâsi intor a colp, cun empit:  si alcin dôs cuaiis. O sbari. E colin dutis dôs. Ma el cjan, invessi di plombâ sui uciei, al scjampe vie lontan (Arturo Feruglio, 15 di Avost); jarin plombâti aduès doi ladrons, che dopo vêgji butât un las ator dal cuel, lu vevin strangolât (Ranieri Mario Cossâr, Il sechin tal font dal sac)
   Sin. butâsi , saltâ
5. v.intr. rivâ o capitâ a colp:  in chel, come un seon, e plombe in place dute la comitive (Zuan Lurinçon, La batarele); sul popul furlan al è plombât il flagjel dal taramot che nissun no sal spietave (Glesie Furlane, Un popul ancjemò di liberâ)
   Sin. capitâ , plovi¹ , rivâ , lâ , colâ¹ , vignî
6. v.intr. finî intune cierte situazion o cundizion, in gjenar in cualchi maniere negative, ancje in maniere improvise:  da la gjonde sin plombâts tal dolôr e tal plui grant displasê (Costantino Smaniotto, Co l'amôr al cimie); pôc dopo che la sale e jere plombade tal scûr (Gianni Gregoricchio, Îr e doman); ducj si son inviâts par lâ a durmî, cence nancje dâsi la buine gnot, e la cjase e plombà tal cidinôr (Pieri Menis, A uciei cu lis archetis)
   Sin. calâ , colâ¹
   
   1. v.tr. meti intune cierte situazion o cundizion o ancje contest:  o ai imparât a tornâ a la int e duncje a plombâ te int la teologjie, la spiritualitât e dut (Roman Michelot, Ricuart di pre Pauli Varutti)
      Sin. calâ
7. v.tr. fâ rivâ, fâ vê, ancje tal sens di dî fûr o di dâ fûr, soredut in maniere clare, fuarte, svelte e v.i.:  sedial laudât e benedît il «Censis» […] che al à plombât une peraule definitive, finalmentri, su la «miserie» di Triest (Riedo Pup, Tanto cjapo e tanto magno); lis flichis di plombâi a Raffaella a son scritis e ripetudis in numar e in peraule, claris e tarondis, fin l'ultin carantan (Riedo Pup, Tal non di Raffaella afârs e guviars)
   Sin. molâ , meti jù , butâ
8. v.tr. [BF] sierâ, tratâ, jemplâ e v.i. cul plomp, viôt implombâ

Polirematichis e espressions idiomatichis

• a plombe e reste loc.av., loc.adi.inv.