Dizionari de Lenghe Furlane

trai  trai  [FO]

1. v.tr. dâ fuarce a alc par che al svoli:  al sarès tornât a trai slavaris tal Tiliment, a Rivis (Agnul di Spere, I prâts des Savodagnis); la int - mai stade tante int in cjase Cleve - e traeve la aghe sante cul ulîf (Dino Virgili, La aghe da pît la cleve)
   Sin. tirâ , butâ
   
   1. (ancje ass.) in zûcs e sports, butâ la bale di une cierte bande:  [i cravuats] no disin, come nô, cuant che a zuin: "Trai al balin! Trai al balin". Ma a disin: "Udri balina! Udri balina!" (Jacum Viole, I segni di una guerra-Lis olmis di une vuere); mi cjati ancje bessôl cul puartîr denant, che o podarès fintâ, trai e segnâ (Stiefin Morat, Donald dal Tiliment)
2. v.tr. dâ un colp, une bote cun fuarce:  traeve pans come une musse plene (Pieri Çorut, I pulçs)
   Sin. dâ , molâ , tirâ
   
   1. (ass.) dâ pidadis:  la vacje e pocave, e traeve (Riedo Pup, I furlans e la leç)
3. v.tr. (fig.) dî cun agressivitât, rabie, rassegnazion e v.i.:  nol sa dî une peraule cence trai un porco (Jaio Furlanâr, Blestemis)
   Sin. plombâ jù , tirâ , tirâ jù , molâ
4. v.tr., v.intr. (ancje ass.) fâ partî un colp di arme di fûc o ancje cuntune altre arme:  al veve zurât di no trai nancje une sclopetade ancjemò prin di partî pal front. «Schercìno - dissal - vûstu che o vadi a trai ai austriacs a riscjo di copâ gno cugnât Gjiraldo di Caprive, che al è cun lôr!» (Riedo Pup, I furlans e la pâs); ti vualme un jeur che al durmive sot un çuf di meniche. Lât di corse a cjase a cjoli la sclope, al è tornât sul puest e i à trat li par li (Alan Brusini, Amîs come prime); cu la fionde al jere un campion. I traeve aes passaris incorint cu la biciclete cence mans e lis lassave secjis (Alan Brusini, Par stradis lungjis)
   Sin. sbarâ , tirâ
   
   1. ancje in riferiment a fûcs di artifici:  Celest dal Cont, sul cuc de tese, al traeve i falconets, colps che a rimbombavin come canonadis e si sfantavin vie vie lontan pes culinis (Pieri Menis, Chei di Muraie); dut il lûc al jere iluminât, a sunavin lis bandis, a traevin i mortalets (Catarine Percude, Il solt del Signôr)
5. v.intr. di fulmin, rivâ a tiere, colpî alc o ancje lampâ tal cîl, ancje impers.:  l'an passât che al à trat saete su la stale di Beltram, o jerin in cuatri a parâ il fûc (Josef Marchet, Lis predicjis dal muini); une saete a zic-zac e trai tra i nûi (Pieri Somede dai Marcs, La bissebove); al à trat sul cjampanili (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   
   1. di altris elements naturâi, fâ lûs, rivâ cu la lûs:  il soreli al jentrave tes cjamaris, si slargjave par tiere, al traeve in sbighet tai mûrs (Dino Virgili, La aghe da pît la cleve); al plûf e al trai soreli, / la gjate e va a bevi, / e monte suntun pâl, / e clame carnevâl (Zuan Nazzi Matalon, Ottorino Burelli, Sacheburache)
   2. v.tr. fâ rivâ i efiets di un element naturâl:  Lui al plûf e al trai soreli su dutis lis cjasis (Pieri Piçul, Vieri e gnûf)
6. v.tr. cjapâ, movi viers di se o meti in tension:  al trai la cuarde par visâ di tirâlu fûr dai fastidis (Ivano Urli, Storie di Min)
   Sin. tirâ
7. v.tr. meti in tension une part dal cuarp in maniere di fâle rivâ plui lontan, di dreçâle, di slungjâle e v.i.:  une aghe cussì lampide […] e cussì frescje che, nome viodile, tu ti sintivis invidât a trai la man a ûs cop, par cerçâle (Josef Cjargnel, Il dragat dal Fontanon)
   Sin. tirâ , slungjâ , dreçâ
8. v.tr. fâ jentrâ aiar tai polmons respirant:  ce suspîr che e veve trat co, di une dì a di chê altre, no lu veve plui lumât su la piere dal puarton (Gianni Gregoricchio, Trê feminis)
   Sin. tirâ
9. v.tr. gjavâ alc di un puest sierât, ingjavât o limitât:  Adriano al trai de sachete la corone e al intone planchin par cont so une part di rosari (Ivano Urli, Storie di Min)
   Sin. cjoli , cjapâ , tirâ fûr , gjavâ , tirâ
   
   1. cjapâ, e in câs servî, alc di licuit, in particolâr vin:  al traeve un bocâl di vin, si sentave da cjâf de taule a mangjâ polente di îr e une crodie di formadi, e vin (Dino Virgili, La massarie); visiti di lâ te cjanive a trai un got di chel di stropul (Tarcisio Venuti, La cjase di Toni); trai di chel fresc di bote (Pieri Somede dai Marcs, Ursule)
      Cfr. spinâ
   2. (pop., eufem.) fâ i bisugns, cjiâ:  si lasse cjapâ di une brute mosse di cuarp e le trai come l'ôc (Ivano Urli, Storie di Vera)
      Sin. fâ
   3. ancje in riferiment a pedeadis:  se al trai un pêt un siôr: "Bon pro siorie"; / se un puar: "Olà fier pieç di disgraciât" (Ermes di Colorêt, I, 167)
      Sin. fâ , molâ
10. v.intr. lâ intune direzion o vignî di une cierte direzion:  e e ven la sere. Un aiarin al trai / de bande buine, sut (Renato Appi, Sagre)
    Sin. inviâsi , lâ , tindi , voltâsi , tirâ
11. v.intr. vê une cierte tindince, someance e v.i.:  al è un turchin fis, un fregul turbit… anzit, no turbit, fumatôs; e secont lis oris o il cîl al trai a viole o a cobalt (Dino Virgili, Un riul tra Venit e Friûl); une arzile de miôr, doprade pai modons di façade che a train sul zalit (Ivano Urli, Storie di Min); Miutine e pandeve une bielece plui incoloride, che e traeve daûr la mari (Maria Forte, Cjase di Dalban)
    Sin. tirâ , butâ
12. v.intr. smirâ a un fin, cirî di rivâ alc:  un oportunist che al trai dome a la cjadree
    Sin. aspirâ , bramâ , dreçâ , pontâ , pretindi , smirâ , suspirâ
13. v.tr., v.intr. ancje cun costruzions infinitivis, vê la tindince o la volontât di fâ une cierte azion, di compuartâsi intune cierte maniere:  ognun al trai a pensâ par se (AAVV, Sul florî)
14. v.intr. [BF] jessi volût, plasê:  o larai là che mi trai di lâ (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    Sin. lâ

Polirematichis e espressions idiomatichis

• lâ a trai loc.v.
• mandâ a trai loc.v.
• ni jessi muart ni trai loc.v.
• ni muardi ni trai loc.v.
• ni trai ni muardi loc.v.
• ti trai loc.inter.
• trai a sorte loc.v.

Proverbis:

• a volê trai il ves plui grant de buse o che il ves nol passe o che la buse si sprece
• cjacarâ cence pensâ al è come trai cence smicjâ
• cui che le nase le travase, cui che le nûl le trai pal cûl
• dulà che il dint al dûl la lenghe e trai
• i fis a train daûr dal pari
• il traditôr al trai il clap e al scuint la man
• il vin trat e bevût al vâl un scût
• lei e no capî al come trai e no maçâ
• no si traii il pan di forment al purcit
• vuarditi dal asin che se nol po muardi al trai