Dizionari de Lenghe Furlane

pontâ  pon|tâ  [FO]

1. v.tr. (ancje ass.) fâ une pression concentrade intun pont, ancje fin a sbusâ o a ferî:  no mi sarès inacuart che mi veve pontât un fiar se no ves viodût un fîl ros che al partive de gjambe (Lucio Perès, Tal Cuar)
   Sin. ponzi , sponzi
   
   1. (fig.) dâ la impression di sbusâ o di jessi une buse, soredut in plui ponts:  al cjalà ancje lui, in alt, lis stelis che a pontavin il cîl, lontanis di dut (Maria Forte, La tiere di Lansing)
      Sin. pontinâ
2. v.intr. vignî insù o infûr di une superficie:  dut al pandeve aromai il tornâ de Vierte, dal striceâ dai cops cu la ultime nêf, al prin pontâ dai cidivocs (Roberto Ongaro, Cretevierte)
   Sin. dâ sù , pocâ
3. v.tr. fissâ cun gusielis o in altris manieris:  al dislace une mane di vencs e al lee un vidiç pleât a bandon. Lui i mostre dulà che al è miôr pontâlu (Maria Forte, La tiere di Lansing); anei, veris, pontepets, rincjins, braçalets golainis e cordons, dut di aur, che la int cul timp e cuissà cun cetante fede e sacrificis e veve regalât ae Madone e che a vignivin pontâts midiant di une curdele, ancje chê di sede nere, sul denant de cotule (Pieri Somede dai Marcs, La Madone dai siet dolôrs)
   Sin. fermâ , fissâ , tacâ
   
   1. fissâ a alc o in alc pe ponte:  e à pontât la gusiele tal lavôr e e je lade vie (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Sin. impirâ
4. v.tr. (ancje fig.) dâ un supuart, une poie:  pontâ un puint (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. poiâ , sopontâ , tignî sù , sostignî
5. v.tr. fâ une pression, soredut cun chê di fâ prese:  lui al slungje une gjambe e le ponte par tiere (Maria Forte, Fadie come ale); la aghe, il pantan mi rivavin za sul stomi, […] o pontavi, o sbatevi i braçs ma lavi simpri plui sot (Pieri Somede dai Marcs, Resurezion a Pontinie)
   Sin. impontâ
6. v.tr. dâ dongje, fissâ o comedâ cusint:  a improntava un sul âtri, lissâts, bridions di ogni fata, a ju imbastiva e po a ju taava driu il stamp, cul scalpel, denant metasi a pontâ (Novella Cantarutti, Scarpeti); la puare femine e jere muarte su la sô cjadree, biel che e pontave i cjalçuts dal fi (Gianni Gregoricchio, Lilie)
   Cfr. cusî , imbastî¹ , mendâ
   
   1. ancje cun obiet costituît no dal materiâl, ma dal destinatari o beneficiari dal lavôr:  Menie e veve vût il so dafâ cui fradis, lavâju e pontâju, che ju tignive come pipins (Pieri Menis, Chei di Muraie)
7. v.tr. (fig.) dâ un dolôr vîf e profont, sedi tal cuarp che tai sintiments:  il frêt nol pontave plui tant insot (Franca Mainardis, Un bosc cence colôrs); Rosute perdonimi, ma il pinsîr di viodilu dongje di te, al è come une spine che mi ponte il cûr… (Pieri Somede dai Marcs, Vilie di Nadâl (teatri))
   Sin. muardi , scjassâ , scossâ , ponzi , sponzi
   
   1. criticâ o cjoli vie cdn. in maniere di ofindilu:  e rivave a sopuartâle cun muse serene, ancje se lis peraulis a pontavin (Maria Forte, Cjase di Dalban)
      Sin. ferî , ponzi , sponzi , becâ
8. v.tr. (ancje ass.) indreçâ alc viers o cuintri di alc o di cdn.:  pontâ il canocjâl viers la lune, il Cjar mat e lis Stelis tramontanis (Carlo Sgorlon, Il dolfin); i vevin pontade la baionete su la panze (Maria Forte, Dome la cjampanute di Sant Bortul)
   Sin. dreçâ , indreçâ
9. v.tr. [TS] venat. (ancje ass.) dal cjan, tignî fer il cuarp e il music intune posizion che e segne al cjaçadôr dulà che al è il salvadi:  dopo vêigji dade une buine tiradine di orelis, pront cu la doplete, la sburti indenant: a colp la bestie e à scomençât a pontâ (Arturo Feruglio, 15 di Avost)
10. v.tr. individuâ tant che obietîf, interès o sim.:  no mi vergonzi a dîlu, che tra chês mês compagnis a 'nd vevi pontade une in mût particolâr, la manco vistose forsi, e forsi la plui salvadie di ducuantis, […] ma cuntun pâr di voi… (Giovanni Gortani, Trê Rafaei in jerbe)
11. v.intr. direzisi inviers di un lûc, cjapâ une cierte direzion:  al fasè la Californie dal Nord, al zirà dentri par Carson City, tal Nevada e di li al pontà par jù, traviers il desert, fin a rivâ a Las Vegas (Stiefin Morat, Adalt abàs); inmaneâ une rêt di fuartecis di sbarament cuintri Napoleon che al ponte a Viene (Angelo Floramo, Lis Termopilis austriachis che a deventin la Cjaurêt francese)
    Sin. inviâsi
12. v.intr. volê rivâ cun determinazion a un obietîf:  progjets che a pontin a dâ un gnûf disvilup a chest teritori (Carli Pup, Ocitanie in moviment)
    Sin. ambî , golosâ , oselâ , pretindi , smicjâ
13. v.tr. (ancje ass.) meti une pueste tun zûc, tune scomesse o sim.:  dit e fat [il zuiadôr e il diaul] si metin a zuiâ. E el zuiadôr al vinç. Pontin el dopli e lui al torne a vinci (Dolfo Zorzut, Blancjuteflôr e el zuiadôr)
    Sin. piriâ , scometi , zuiâ
14. v.intr. (fig.) vê fiducie in cdn. o tal bon efiet di alc:  se chei altris a pontin su la lôr fuarce militâr o su la lôr potence economiche, la Italie invezit e ponte su la imprevedibilitât de sô politiche (Riedo Pup, Lassaitle fâ la cjossule); la propagande nazionaliste e veve pontât dut su la liberazion des tieris iredentis (Carli Pup, La seconde Irlande)
    Sin. contâ , fâ calcul , impastanâ , fâ stât

Polirematichis e espressions idiomatichis

• pontâ i pîts loc.v.