Dizionari de Lenghe Furlane

pocâ  po|câ  [AF]

1. v.tr., v.intr. (ancje ass.) dâ un colp o plui colps:  a chest pont il vieli napolitan cul so baston al scomençà a pocâ su la spale chel om che al jere mieç indurmidît (Marc Stolf, Al è simpri cualchidun che al è "plui mancul" di te); il vidiel al è nassût, ma nol respire, mi buti parsore, lu massazi, i môf lis talpis devant, i pochi su la schene (Laurin Zuan Nardin, A confessâsi)
   Sin. urtâ , petâ , bati , stossâ , stocâ² , trussâ , colpî , trucâ²
   Cfr. dâ
   
   1. movi o remenâ cun moviments fuarts o imburîts:  [la polente] al voleve pocâle lui fin tal ultin sul fogolâr, se no jê, cjapade des voris, si distrigave a butâle jù: "O cuete o crude il fûc le à viodude!" (Maria Forte, Il bal spisimât des ombrenis)
   2. di bestie, dâ colps cul cjâf, cui cuars:  la vacje e pocave, e traeve, no deve jù il lat (Riedo Pup, I furlans e la leç); il cjastron al puce. Ma no si mateave in chê volte se il cjastron al puçave. Il cjastron al poche. Ma al saveve ben Pilete cemût fâ par no fâsi pocâ (Ivano Urli, La gnove stazion)
      Sin. scoçâ , stoçâ , scuarnâ , scuarnassâ , trussâ
   3. dâ colps tune puarte par domandâ di jentrâ:  stant che il campanel nol funzionave, al pocà cu la man spalancade cuintri il puarton di len. […] Finalmentri une femine si mostrà sul barcon dal prin plan (Carlo Sgorlon, Ombris tal infinît)
      Sin. tucâ , bati
   4. vê une azion che e à un efiet fuart, ancje cence un impat fisic:  il soreli al pocave a fuart. A vevin cjaminât par dôs oris (Agnul di Spere, Zûcs di Istât)
      Sin. bati , petâ
2. v.tr., v.intr. fâ pression, movi o cirî di movi cuntune pression:  "Oh mo! coragjo, fantats! Al mio segnâl pocait [l'arbul] ducj cuancj cuintri la aghe. Sù: fuarce Oo - ou!" (Luigi Gortani, Il poul malât)
   Sin. sburtâ , parâ
3. v.tr., v.intr. (fig.) dâ un stimul, fâ che cdn. o alc si indrecin intune cierte maniere, a cjapin une cierte strade e v.i.:  lis resons che lu pocarin a scrivi a forin di une bande chê di lassâ une testemoneance […] di chê altre difindisi des acusis (Giovanni Pillinini, Zuan Batiste Cavedalis - Une vite esemplâr); su la cuistion de tutele minoritarie a vevin metude la muse e a pocavin chei altris politics di chês altris fuarcis politichis (Adrian Cescje, Memoriis di politiche linguistiche); un indificil a brincâ, ma che cualchi zornade… le sacrificave a lavorâ co i pocave la fam (Maria Forte, La tiere di Lansing)
   Sin. sburtâ , indreçâ , inviâ , stiçâ
4. v.intr. plasê, jessi preseât:  al jere stât cualchi an pes Gjarmaniis, ma no i pocave chê vite (Maria Forte, Chê massanghe plui grande); un stramp, un diaulat, un voie di fâ nie, che nol veve fat un colp se no ce che i pocave (Alan Brusini, Par stradis lungjis); al veve cirût tantis voltis di fâ un pocje di amicizie cun lôr, ma a chei no i pocave masse di vêlu pai pîts (Marisa Gregoris, L'aiar cence non)
   Sin. smecâ , petâ , piçâ , plasê¹ , comodâ , dâ

Polirematichis e espressions idiomatichis

• pocâ Dree loc.v.
• pocâ infûr loc.v.
• pocâ jù loc.v.
• pocâ la fadie loc.v.
• pocâ sù loc.v.