Dizionari de Lenghe Furlane

lâ ben    [FO]

1. loc.v. jessi just, adat, vê une cierte utilitât, convenience, armonie e v.i.:  o vin mostrât, in pratiche, che la nestre lenghe e va ben par tratâ cualuncue cuistion e no dome par contâ fufignis o par imbastî vilotis (Josef Marchet, Alo, indenant!)
   Sin. stâ ben
   Cfr. lâ di gale , lâ di cane , lâ di viole , lâ di vite , lâ une cane
   
   1. jessi just, soredut pe morâl, pe buine creance:  [la glesie] e à di dî se al è just o se nol è just, se al va ben o se nol va ben (Francesc Placerean, L'unic concuardât che la glesie no po rinunziâ al è chel cu la sô int)
      Sin. confâ , confâsi , lâ a plomp , parê ben , stâ ben , parê bon
   2. ancje cun costruzions cun infinît o participi:  e e va ben dite ancje une altre peraule in cheste ocasion: che la fede in Lui al vûl dî lassâsi puartâ di Lui, crodi ancje là che no si rive adore di viodi (Francesc Placerean, Crodi e mût di crodi)
2. loc.v. jessi acetât e preseât:  "Prin di dut lasse che o bevìn alc: ce cjolistu? Ti vadial ben un cafè?" (Jolanda Mazzon, Fûr di timp); al è chel che al acete dut e al pare jù dut in non de comoditât, de modernitât e de pegrece inteletuâl, chel che i va ben dut parcè che nol à mai vût un pont di riferiment seri (Antoni Beline, Sant Jacum, là che al finìs il mont)
   
   1. ancje e soredut in espressions di conferme, jessi capît, concuardât, acetât e v.i.:  "Eco siôr dotôr lis cjartis dal procès di chês dôs feminis…" "Va ben, poie li." (Pieri Somede dai Marcs, L'avocat e la luianie); «Trop isal di fit?» […] «Cuatri mil al mês. Vadial ben?» «Cul jet e cun dut?» «Si capìs», «Par me al va benon» (Carlo Sgorlon, Prime di sere)
   2. ancje par rimarcâ une amission, une concession:  il gondolîr mi à presentât, dute smacaiade, la preziose canute, che al veve podût recuperâ a fuarce di manovrâ cul rem. Smacaiade, va ben, ma salve! (Arturo Feruglio, Viaç a Vignesie); la tele dai vistîts no jere di presi,… va ben, ma cuside de miôr sartore ur donave (Maria Forte, Cjase di Dalban)
3. loc.v. lâ indenant cence problemis:  e jo a sfadiâmi a dî di sì, a dî che dut al sarès lât ben, che o jerin sigûrs che ducj a varessin votât pal «sì» (Pieri Somede dai Marcs, Lis votazions); us dîs che cun doi gjai tun gjalinâr no si po lâ ben (Roberto Ongaro, Cretevierte)
   
   1. funzionâ:  tal tornâ indaûr, dongje Aquilee, il motôr no leve ben (Pieri Somede dai Marcs, A Aquilee)
   2. dâ bogns risultâts, vê bon sucès e v.i.:  se i vadin ben i afârs, dentri di un an / al ûl comprâ la vile di Sant Zuan (Pieri Çorut, Il muini di Bolzan)
   3. vê fortune, jessi intune situazion positive:  chê dì o sin lâts ben cu la mangjative (Alan Brusini, I ribei)
   4. ancje in costruzions impersonâls, sotintindint une vicende, un afâr o la vite in gjenerâl:  a mi la none Catine mi diseve: "Eh, us va ben a voaltris feminis di cumò." (Gianni Gregoricchio, Trê feminis)
   5. dit di cdn.,otignî bogns risultâts in alc:  un brâf scuelâr, che al va ben in dutis lis materiis
4. loc.v. di vistîts, scarpis e v.i., jentrâ, jessi de misure juste:  [lis primis scarpis] mes àn compradis tant grandis, di pôre che no mi vadin ben cul cressi, che, cuant che o soi sposât, lis ai cjoltis un numar plui piçulis (Riedo Pup, I furlans e la culumie)
   Sin. jentrâ , lâ

Components:

• ben av., inter., s.m., coniun.
• lâ v.intr., s.m.sing.

Proverbis:

• cuant che il vieli al duar e il zovin al vegle, il mont nol va plui ben
• dutis no puedin lâ ben
• la stagjon e va ben avonde fin che il timp le seconde
• nol è tapon che nol ledi ben sun cualchi cit