Dizionari de Lenghe Furlane

nasâ  na|sâ  [AF]

1. v.tr. sintî l'odôr, sedi par azion volontarie che par percezion spontanie tirant sù aiar cul nâs:  al da un colp al grop dal cuel de butilie che al salte vie come une cocule… Al nase… Ah, ce profum! … Al cerce… rosoli, tant che rosoli! (Pieri Menis, Doi pizighets e un lari); ti viôt el sclopon ta tace, lu tire jù, lu nase (Dolfo Zorzut, La furlane)
   Sin. nulî , usmâ
2. v.tr. tirâ sù cul nâs, ancje no dome par sintî l'odôr:  il Mestri pacjific, / nasant la presute, / se gjave di un socio / che al vesse, che al rute (Romeo Battistig (?), Ai Piombi)
   Sin. tirâ sù
3. v.tr. (fig.) presintî alc, capî alc in maniere intuitive:  "Aial viodût ce dal diambar che al nasseve?" "O savevi… o savevi… mi pareve fin di savêlu… lu vevi nasât ancje jo!" "Un fregul ancje jo lu vevi nasât!" (Arturo Feruglio, Un grop sul stomi); e stave in vuaite, nancje che e nasàs cuissà ce pericul (Gianni Gregoricchio, Îr e doman)
   Sin. lampâ , olmâ , capî , induvinâ , intuî , nulî , usmâ
4. v.tr. (fig.) valutâ, viodi se alc o cdn. al è interessant o no:  vincj di lôr a jerin a stâ sù tal fogolâr di puar Gjildo: fantats (che a vignivin a nasâ chês dôs fiis di Gjildo), fantatis dal borc, viei, babis […] (Meni Ucel, Il sunsûr)
5. v.intr. fâ odôr, vê un odôr:  «Buine sere» dissal Eliseo. «Buine» al rispuindè l'ostîr, biel cjalantlu fis. […] L'ambient al nasave di tabac, di salam e di vin (Carlo Sgorlon, Prime di sere); "Di ce nasial il gno cjâf?" i domande la viele. "Di bon odôr" i rispuint la frutate (Popolâr - Andreina Nicoloso Ciceri, La fie e la fiastre - Racconti popolari friulani I); a jerin floridis lis paugnis, i saûts a nasavin a fuart cu lis rosis largjis a cjapielute (Dino Virgili, La aghe da pît la cleve)
   Sin. nulî , odorâ
6. v.intr. (fig.) plasê, jessi volût:  a chel zerbinot no i comodave di stâ a direzi la fatorie, no i nasave di stâ a tratâ cui contadins, a fevelâ di vacjis, di ledan… (Pieri Somede dai Marcs, La braide)
   Sin. pocâ , petâ , piçâ , comodâ , dâ , lâ , lâ ben , smecâ , plasê¹ , scuadrâ , convinci , lâ a scuare , lâ a plomp , lâ a sanc

Polirematichis e espressions idiomatichis

• nasâ bon loc.v.
• nasâ di bon loc.v.
• nasâ il pevar loc.v.
• nasâ la fuee loc.v.
• nasâ la garbe loc.v.

Proverbis:

• cui che al à bon nâs lis nase a la lontane
• cui che al à il nâs lunc lis nase a la lontane
• cui che al puce al sminuce, cui che al nase al travase
• cui che le nase le travase, cui che le nûl le trai pal cûl
• cui che le tire le nase
• di istât o tirâ o nasâ
• i litighents a nasin il past e i avocats lu mangjin
• miôr tirâ che no nasâ