Dizionari de Lenghe Furlane

olmâ  ol|mâ  [AF]

1. v.tr. rivâ a viodi, a individuâ cui voi, soredut di lontan, di scuindon, a la svelte, par câs o ben cuntun ciert sfuarç, cun atenzion, cun desideri e v.i.:  [il gjat] cu la cjaladure tirade, cui pêi luncs ingredeâts, cun chê ande suturne che ti olmave di jenfri lis fueis, al someave che ti cjalàs fûr dal infier (Josef Cjargnel, Il gjatat neri dai Fers); sot sere si comedà par ben, par lâ a cirî l'om e lu cjatà ta la ostarie de More. Cuant che lu olmà che al strenzeve jenfri i dêts i smursiei ros e taronts de frutate, si sintì a crevâsi la vite (Maria Forte, La cotule di none Betilde); [Sant Pieri] al butà il voli jù par olmâ il timp de bande di Tarcint (Alviero Negro, Lis çariesis pe mari di sant Pieri); "A 'nt fossin di striis cussì!" al suspirave un altri, poiât cuintri dal antîl, a olmâle, cun gole, tal biel che e passave (Gianni Gregoricchio, Îr e doman)
   Sin. lumâ , cjalâ , voglâ , calumâ , cucâ , lampâ , viodi , lupâ , osservâ
   Var. vualmâ
   Cfr. ocjâ , sberlocjâ , svoglitâ , voglitâ , travuardâ , lutâ , voglonâ , spiâ
   
   1. (ancje ass.) indreçâ i voi di une cierte bande:  Berto al olmà ancjemò une volte di une bande e di chê altre par sigurece (Carlo Tolazzi, La salamandrie tal fûc)
2. v.tr. (fig.) rivâ a individuâ o a percepî, no dome cui voi:  in diviers câs o vin olmât un ciert disinterès (Carli Pup, A ce pont ise la atuazion de leç 482); [il libri de Apocalìs] nus permet di cjalâ di là dal inmediât e di olmâ chel futûr che nus incjante e nus spavente (Antoni Beline, Atualitât di une rivelazion)
   Sin. capî , cucâ , determinâ , viodi , sintî , ricognossi , cognossi , intraviodi , traviodi , notâ , acuarzisi , inacuarzisi , visâsi , intaiâsi , nasâ , osservâ