Dizionari de Lenghe Furlane

notâ  no|tâ  [FO]

1. v.tr. scrivi alc par visâsi o par lassâ alc documentât:  ogni volte che si fâs un passaç di proprietât bisugne lâ al ufici dal catast e il diretôr […] al note li che il teren al è passat di proprietât in chel moment (Francesc Placerean, La nestre storie)
   Sin. cjapâ sù , marcâ , scrivi , tirâ jù , segnâ
2. v.tr. segnâ un credit tun cont, par fâsi paiâ plui indevant:  invezit di paiâ, i disevin: «Un cuart a talpe, Dreute, ti pai doman»; e lui al notave (Alan Brusini, Alpin jo mame!); «Po ben», i dîs Rico, «daitmi ca un mieç, e notaitjal a Meni» (Meni Ucel, Credit); ca si paie nâs di cuaie, no si note nâs di pote (Zuan Nazzi Matalon, Ottorino Burelli, Sacheburache)
   Sin. segnâ , meti in cont
3. v.tr. meti notis, segns che a caraterizin:  notâ lis frasis plui impuartantis
   Sin. comentâ , postilâ , segnâ , marcâ
4. v.tr. meti intune liste, intune categorie:  i siei inteletuâi a podevin ben notâ la pax cristiane e l'amôr che le ispirave tra i valôrs universâi di proponi (Adrian Cescje, Viaç aes origjins dal Logos)
   Sin. cjapâ dentri , comprendi , contizâ , contâ , meti tal numar
   
   1. fâ une iscrizion:  la mestrute piçule mi à preât di visâus che al è di lâ a notâ i fruts pe scuele publiche, che a moments e scomençarà (Josef Marchet, Lis predicjis dal muini)
      Sin. dâ in note , iscrivi
5. v.tr. cjapâ at, visâsi e vê cussience di alc:  notait che chist diau no veva ne coda pelosa, ne pîts di cjavra, ne voi nome dôs boris; al jara fat come un om (Zuan Luîs Filli, Il diau sul Studeniz); al veve lassât la Mercedes de sô femine intune stradute pierdude, li che nissun le varès notade (Fabian Ros, Un piçul particolâr)
   Sin. cjalâ , fâ câs , intravignî , osservâ , riscontrâ , spiâ , viodi
6. v.tr. meti in evidence, fâ che altris si visin e a vedin cussience di alc:  il soldât lu fasin ducj. Chi si vûl nome notâ la diference fra il compuartament dai furlans e di chei altris sul fat dal militâr (Riedo Pup, Soldât jo mame!)
   Sin. marcâ , rimarcâ