Dizionari de Lenghe Furlane

osservâ  o|sser|vâ  [AF]

1. v.tr. cjalâ cun atenzion:  ducj lu cjale, ducj lu osserve, / ducj lu critiche e remene (Zaneto, Par prime Messe); scartabelant i autôrs di astronomie, / e de lis stelis osservant il zîr, / un pronostic o scrîf in poesie (Pieri Çorut, Pronostic del 1821)
   Sin. analizâ , calumâ , contemplâ , controlâ , lumâ , rimirâ , scandaiâ , scrusignâ , voglâ , voglonâ
   
   1. cjapâ in esam:  la teorie fisiche, chê politiche come ancje la rapresentazion artistiche a son il pont di viste mobil di dulà che si osserve l'om e il so mont (Adrian Cescje, Viaç aes origjins dal Logos)
      Sin. analizâ , controlâ , scandaiâ
   2. [TS] med. studiâ e tignî sot control costant un pazient:  bisugnave che si fos fermât che a vevin di osservâlu e fâi lis analisis (Alan Brusini, Il malât di Cime Undis)
2. v.tr. fermâsi cu la atenzion su alc e deventâ cussient de sô esistence e des sôs carateristichis:  al veve osservât che gno barbe al doprave i imprescj dal contadin tant che i pinei: al lassave i cjamps e i ordenaris cu lis cumieris dretis dretis, cui cjantons ben staronzâts e lis striciduris cence sporcheçs (Lucio Perès, Gno barbe Sisto); i costrutôrs di lampadinis eletrichis cun filament a cjarbon a vevin osservât che il consum dal filament al produseve chel che al vignive clamât "efiet blu" (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. notâ , visâsi , inacuarzisi
3. v.tr. fâ notâ cuntun coment, soredut contrari:  al ecuivaleve a dî, cemût che al osservà cualchidun cun ironie, che no si varessin vût di fâ dizionaris bilengâi ni pe lenghe furlane ni par altris lenghis (Adrian Cescje, Memoriis di politiche linguistiche); un di chescj al osservà: "A mi mi pâr che il Signôr al è paron di mandâ no tal infier, ma ancje a gnargnic, che al è mil miis plui inlà, cui che dal folc al vûl […]" (Luigi Gortani, La invidiose)
   Sin. comentâ , notâ , marcâ , rimarcâ , visâ
4. v.tr. lâ daûr di une norme, di une indicazion, di un compuartament e v.i.:  chei che a lavorin a àn un orari, e lu osservin (Riedo Pup, Doi mil francs di puntualitât); une volte i domandarin cui che a son chei che a osservin plui ben la leç (Riedo Pup, I furlans e la leç); il Cristianisim nol è une serie di dogmis […], nol è une serie di comandaments di osservâ la domenie e cualchi volte dîs di vore, ma al è semplicementri un fidâsi, un lassâsi puartâ de persone di Crist (Francesc Placerean, Crodi e mût di crodi)
   Sin. ubidî , rispietâ