Dizionari de Lenghe Furlane

marcâ  mar|câ  [FO]

1. v.tr. segnâ alc cuntune marche o cuntun simbul:  [sô mari] i veve marcade dute la blancjarie cuntun LS (Agnul di Spere, I prâts des Savodagnis); il persut al ven marcât: su la cuesse prime di jessi vendude, al ven metût, cun timbri a fûc, un codiç di identificazion dal produtôr (Oscar Puntel, Un persut unic par un lûc unic)
   Sin. segnâ , siglâ
   Var. marcjâ²
2. v.tr. segnâ insot, cun intensitât:  marcâ lis liniis di un dissen
   Sin. aumentâ , cjalcjâ , cressi , enfatizâ , evidenziâ , valorizâ
   
   1. (fig.) lassâ un segn:  une brute malatie che le veve marcade insot, cussì zerve di muse (Maria Forte, Cjase di Dalban)
3. v.tr. pronunziâ un enfasi particolâr:  «No tu ti vergognis» i à dit di adalt ae femine, marcant une da la une lis peraulis, «a disturbâ doi che a sintin musiche!» (Ivano Urli, La musiche)
   Sin. segnâ , bati , cjalcjâ
   
   1. dî cun convinzion:  lis lenghis e il sport - al à marcât Lorenzo Fabbro - a son cetant impuartants pal benstâ e la coesion sociâl (Erika Adami, La lenghe al «Friûl»)
4. v.tr. (fig.) dâ evidence, fâ viodi ben:  Lulù e jere vistude cuntun rochet blanc che a i marcave l'incjarnât indorât de piel slisse (Fabian Ros, Eivissa mon amour)
   Sin. notâ , rimarcâ , visâ , rilevâ¹
   
   1. fâ notâ cun intenzion, fâ capî cun clarece:  o ai vût interès a marcâ chestis incoerencis par rivâ a convinci ducj che no varessin podût fâ di mancul dal arbitri par che al dedi lui coerence a dut il sisteme (Adrian Cescje, Memoriis di politiche linguistiche)
5. v.tr. cjapâ note di alc, regjistrâ ce che si à voie di ricuardâ:  a è stada una zornada lungja parcè che al à cugnût pontâ i voi pardut a contâ sacs, a controlâ staderi, a marcâ numars [dal cjarbon vendût] (Novella Cantarutti, I cjans di not)
   Sin. cjapâ note , regjistrâ , notâ
6. v.tr. [TS] sport otignî un o plui ponts par se o pe sô scuadre:  prin timp, che si siere cul vantaç marcât di Inglese che al controle ben, al sghiribice Nuytinck e al bat Scuffet in diagonâl (Marc Stolf, Parma - Udinese 2-2)
   Sin. realizâ , fâ , segnâ
7. v.tr. [TS] sport tal basket, tal balon e v.i., tignî controlât un zuiadôr, pal solit un atacant, de scuadre aversarie
   Sin. controlâ , tignî