cressi
/-è-/
cre|ssi
[FO]
-
v.intr.
di persone, bestie, plante e v.i., deventâ plui grant, tal fisic e te etât:
la Lise e cresseve an par an plui fuarte. E jere deventade une biele zovenute, dut a colp. Come che a sclopin, a timp just, ducj i butui (Maria Forte, Cjase di Dalban);
cumò che Eve e jere cressude e deventade cuasi fantate, i fevelave vulintîr di robis ancje delicadis (Carlo Sgorlon, Ombris tal infinît);
cuant che un gjatut al è cressût di trê mês, al tache za a jessi avonde autonom
Sin. vignî sù
, dâ sù
-
ancje di une part di organisim, deventâ plui grande, formâsi, cjapâ man a man la sô forme:
un lavôr masse dûr par chei fruts, par chei vues che a vevin di finî di cressi (Pieri Menis, Sul agâr);
sul cjâf i jere cressût un biel dêt di cjaveluts riçots (Ivano Urli, Storie di Min);
te lôr braide a cressevin di chei raps di ue blancje, e di chei râfs che a fasevin vignî la aghegole (Lucio Perès, A pescje tal suei)
Sin. vignî
-
ancje di coletîf, insiemi, tacâ a jessi o mantignîsi par vie dal vignî sù dai diviers individuis che le componin:
une dì mi jeri pierdût tai trois dai boscuts di agaciis che a cressin dongje des rivis de Tor (Checo Tam, Sense);
la jerbe e cresseve salvadie par dute la cort (Dino Virgili, La aghe da pît la cleve)
Sin. nassi
, vignî sù
, dâ sù
, jessi1
-
v.intr.
deventâ plui grant, plui rilevant, plui grâf, plui numerôs, plui alt di cualitât, intensitât, jerarchie e v.i.:
tai prins trê secui Aquilee e cressè di popolazion e di impuartance (Josef Marchet, Cuintristorie dal Friûl fin sot la Italie);
Tite, blanc in muse, al mostrave un malstâ che al cresseve minût par minût (Gianni Gregoricchio, Trê feminis);
lis emissions industriâls di solfar, leadis soredut a la combustion dal petroli e dal cjarbon, a podevin fâ cressi la aciditât des ploiis (Dario Bianchini Giaiotti, Fulvio Stel, Clime e incuinament: prime l'ûf o la gjaline?);
tra i zovins al tache a cressi l'interès par cheste radio singolâr (Max Mauro, Un Friûl difarent: i 90 mhz di Onde Furlane);
che tu cressis, mari lenghe, / grande e fuarte, se Dio vûl! / che tu slargjis la tô tende / su la Cjargne e sul Friûl (Bindo Chiurlo, Il cjant de Filologjiche Furlane);
Dopo vot dîs di ploie la aghe de Sfueime e jere cressude di fâ pôre (Alan Brusini, Amîs come prime)
Sin. dâ sù
, lâ sù
, tirâsi sù
-
lâ sù di presit:
e je cressude la benzine, ducj a bruntulin (Alan Brusini, Amîs come prime)
-
v.tr.
dâ a un frut, a un animalut, a une plantute e v.i. dut ce che i covente, di nudriment, di curis e ancje di educazion, par che al vegni sù ben:
al sint di vê tradît ogni strussie che jê e à patît par nudrîlu e cressilu e fâlu fuart e preparâlu a la vite, al sint un rimuars di cussience che lu fâs compagn dal om plui soç di chest mont (Amedeo Giacomini, Tal ospedâl)
Sin. tirâ sù
, arlevâ
-
v.tr.
fâ che alc al sei plui grant in dimension, cualitât, cuantitât, frecuence e v.i. o che si percepissi di plui:
i comerciants chei ludros par no jessi di mancul a àn cressût il presit trê voltis (Alviero Negro, Int di masnade);
mancumâl che i parons no pain tassis - al riduçave Brusin - se no a scugnaressin cressi il fit…! (Riedo Pup, Vigji Brusin);
al dave une vôs al cjaval e chel al cresseve il pas (Maria Forte, Il Bulo di Crodio)
Sin. incressi
, ingrandî
, slargjâ
, aumentâ
, tirâ sù
-
v.tr.
ancje ass., lavorant di gucje, inzontâ ponts
Polirematichis e espressions idiomatichis
Proverbis:
- a pôc a pôc si cres
- cjar che e cres no po sta ferme
- di Sant Tomâs a Nadâl al cres il dì un pas di gjal
- il mont al cres ma nol invente
- il mont al è fat a scjale: cui cres e cui cale
- il mont al è fat a scjale: un pôc si cres e un pôc si cale
- il Signôr al è piçul ma al cres ogni dì
- la cjative jerbe e cres prest
- la jerbe triste e cres pardut e nissun no le mangje
- la jerbe triste e cres prest
- la malizie e cres cu la etât
- la triste jerbe a cres simpri
- lasse mus che la jerbe a cressi
- se a vessin di cressi i dincj, ur cressaressin ai avocats
- spiete bo che la jerbe e cres
- spiete cjaval che la jerbe e cres
- une idee e nas tal cjâf ma e cres tal cûr