Dizionari de Lenghe Furlane

tirâsi sù    [AF]

1. loc.v. cjapâsi e fâ fuarce par lâ insù:  si tirà sù ben planc pai bârs, che no si rompessin ancje chei, al jessì da la aghe (Riedo Pup, Vergjilio)
2. loc.v. movisi lant insù:  cjoca di doul, a si tirà sù pal salâr (Novella Cantarutti, Li Anzuliti)
   Sin. lâ sù , vignî sù
3. loc.v. metisi intune posizion che e fâs stâ sù, dret, soredut impins o ancje in senton:  il vieli al cirive di tirâsi sù in senton sui comedons (Alan Brusini, Amîs come prime); e scugnî tirâsi sù su lis pontis dai pîts par rivà a viodi (Rosute, In spiete)
   Sin. dreçâsi , jevâsi , jevâ sù , jevâsi sù , jevâ
   
   1. ancje di une plante o di une robe inanimade, cjapâ une posizion plui drete, plui verticâl, lâ plui adalt e v.i.:  si viodevin i arbui plui dongje a stuarzisi, a tirâsi sù, a pleâsi di gnûf, a intorteâsi, a sbatisi un cuintri l'altri, a crevâsi pe fuarce de sbave (Pieri Somede dai Marcs, La bissebove)
4. loc.v. cressi di cuantitât, misure, intensitât, valôr e v.i.:  al sgrisulave tant che un basalisc, si ben il clip de temperadure che si jere tirade sù i suiàs il gaban che al bugave come une mastele de lissie (Fabian Ros, Il lôf)
5. loc.v. (fig.) cjapâ fuarce fisiche, morâl, psicologjiche:  "[…] sù metimi dentri un got di sgnape, o ai bisugne di tirâmi sù" (Pieri Somede dai Marcs, Un pugn di moscjis); "[…] no ai costance di lâ indevant, mi buti jù masse svelte e po o ai di fâ vitis par tirâmi sù. Tu varessis di jessi simpri tu a dâmi fuarce, alore o cumbinarès alc di plui" (Jolanda Mazzon, Fûr di timp)
6. loc.v. tirâ sù alc di se stes, alc che si à intor e v.i.:  sù pes scjalis e scugnì tirâsi sù un pôc la cotulone par no inçopedâsi (Pieri Menis, Il testament); ogni tant Rosute si fermave a tirâsi sù cu la conole un riçot restîf che i colave jù pe muse (Dino Virgili, La aghe da pît la cleve)
   
   1. tirâ alc parsore di se:  cheste puare frute, cjatantsi a sei nude, si tire sù tante fuee tor di se (Andreina Nicoloso Ciceri, La sentence de regjine - Racconti popolari friulani I)

Components:

• sù av., inter., s.m.inv., adi.inv.
• tirâsi v.pron.tr., v.pron.intr.