Dizionari de Lenghe Furlane

jevâsi  je|vâ|si  [FO]

1. v.pron.intr. tirâsi sù impins:  Gusto Masin a non de minorance al domandà la peraule e si jevà a fevelâ (Dino Virgili, La aghe da pît la cleve)
   Var. levâsi
   
   1. sveâsi e vignî fûr dal jet:  al è tart. Doman o scuen jevâmi a buinore (Gianni Gregoricchio, Trê feminis)
2. v.pron.intr. dal soreli, de lune e di altris cuarps celescj, vignî sù de linie dal orizont:  jù te val si dismôf il paîs. / Il soreli si jeve di bore / fin a lenzi forans e ruvîs (Gjiso Fior, Cjant al Friûl)
3. v.pron.intr. di uciei, tacâ a svolâ:  lis lodulis si jevin ca e là fûr dai sterps, si voltolin tal cîl cuntun legri strît e po, a plomp, e tornin jù tun bati di voli (Cesare Bortotto, Ancje la vite culì e finìs); al era il cator che al si è levât svualant jù abàs rasu via li gravi (Novella Cantarutti, Sacrup)
   Sin. partî¹ , petâ il svol , jevâ , jevâ il svol
   
   1. di avions, tirâsi sù di tiere
      Sin. partî¹
   2. ancje di altris elements, vignî sù, slontanâsi de tiere:  un sac vueit […] al colà suntune cjadree: si jevà un fumiç di farine viere che e puçave di musar (Dino Virgili, La aghe da pît la cleve); si jevave il fum parsore dai lens (Dino Virgili, Devant di dut il cîl)
   3. dal vint, tacâ a soflâ:  si è jevade un fregul di buere (Josef Marchet, Di bessôi)
4. v.pron.intr. (fig.) di alc di imateriâl, nassi, cressi, vê efiet e v.i.:  come saborâ tal timp che si jevin lis liendis (Dino Virgili, La aghe da pît la cleve); ca si jeve un ferment / al mormore dut Udin (Pieri Çorut, Orès lâ a Triest); si jevarin sù reazions di ogni sorte, come che al jere di imagjinâsi (Adrian Cescje, Memoriis di politiche linguistiche)
5. v.pron.intr. cressi di volum pe fermentazion produsude dal levan:  lassâ l'impast a jevâsi tun puest clip
   Sin. cressi , dâ sù , sglonfâsi
6. v.pron.intr. vê une forme o une dimension che e ven insù rispiet a une linie di riferiment:  si fermà tal çondar di chel cret che si jeve a tramontane sul spieli dal lâc (Josef Cjargnel, La gnot di Sant Cjandit); il dint di Paludana, plantât suntun dai cjantons pi secrets da la Miduna, al si leva a spontâ il ciel (Novella Cantarutti, Val intun sum)
7. v.pron.intr. di vôs o sun, cressi di intensitât o vê un volum alt, jessi sintût, in assolût o parsore di altris rumôrs:  il Bulo al jentrave sot il so puarton cuant che si jevà une vôs (Maria Forte, Il Bulo di Crodio)
8. v.pron.intr., v.pron.tr. [BF] viôt gjavâsi :  jo no pues jevâmal dal cûr (Pieri Somede dai Marcs, Vilie di Nadâl (teatri))

Polirematichis e espressions idiomatichis

• jevâsi sù loc.v.