Dizionari de Lenghe Furlane

jevâ  je|vâ  [FO]

1. v.tr. puartâ adalt o fâ stâ sù, adalt o in posizion verticâl:  si infrontave cu lis gjambis a larc, al jevave il Crist une altre volte, si inviave […], al rivave, di bessôl, a picjâlu ogni volte tal so puest (Riedo Pup, Vigji Strassanît)
   Sin. alçâ , tirâ sù
   Var. levâ
2. v.tr. sveâ, fâ che cdn. nol stedi plui a durmî:  la piçule o voi a jevâle jo, e tu no stâ lâ sù a dismovile (Maria Forte, La tiere di Lansing)
   Sin. sveâ , dismovi
3. v.tr. puartâ vie cdn.:  cuant che il plevan e il muini a son passâts pal borc par lâ a jevâ la muarte, no àn incuintrât un cjan (Pieri Menis, La int)
   Sin. cjoli , cjapâ , puartâ , butâ
4. v.tr. fâ che alc al vegni sù di tiere, al svoli:  al jere un sec e un polvar che la int te strade a cjaminavin fof jevant a ogni pas nûi di pulvin (Alan Brusini, Come tai romançs)
   Sin. burî , burî sù , tirâ sù
5. v.tr. [TS] venat. (ancje ass.) di cjan di cjace, cjatâ un uciel e fâ che al svoli in maniere che il cjaçadôr al puedi trai:  al è un cjan che nol vâl nuie par jevâ (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. burî , burî sù , burî fûr
   Cfr. discovâ
6. v.tr. tignî insù:  i vosave come a un cjan e al jevave la man par aiar come il cjastì di Diu su Caìn (Gianni Gregoricchio, Trê feminis); i ôcs a jevavin dome il cjâf e a cjalavin in sbighet, cence pôre (Maria Forte, I ôcs di Miute)
   Sin. alçâ , tirâ sù
   
   1. (ancje fig.) indreçâ a alc o a cdn. che si calcole adalt, impuartant, divin e v.i.:  al jeve i voi al cîl pre Nocent e al tabache (Arturo Feruglio, Viaç a Vignesie)
      Sin. alçâ , tirâ sù
7. v.tr. dî, pronunziâ con solenitât o daûr di une musiche:  dut il mont al jevi il cjant al Signôr trê voltis sant (Glesie Furlane, Domenie II "vie pal an")
   Sin. alçâ
8. v.tr. [BF] judâ a nassi un frut:  cui lui aie jevât chest frut (Maria Gioitti del Monaco, Storiutis di îr e di vuê)
   Sin. cjapâ sù
9. v.tr. (fig.) fâ nassi, cressi, fâ in mût che si sintin i efiets di alc:  o ai jevade la cuistion e ur ai fate la mê propueste (Adrian Cescje, Memoriis di politiche linguistiche)
   Sin. movi , dismovi , stiçâ , saborâ
10. v.intr. tirâsi sù impins:  [l'avocat che al jere sentât] al jeve, si volte viers dal procuradôr (Pieri Piçul, Vieri e gnûf)
    Sin. jevâ sù , jevâsi , jevâsi sù , alçâsi , dreçâsi
    
    1. sveâsi e vignî fûr dal jet:  duar, che doman o vin di jevâ a buinore (Alan Brusini, Par stradis lungjis); un che al jeve a misdì, al è un sflacjon e vonde (Antescûr, L'om misteriôs)
11. v.intr. dal soreli, de lune e di altris cuarps celescj, vignî sù de linie dal orizont:  cuant che al criche il dì, il soreli al jeve par ducj (Ivano Urli, Storie di Min); je jevade la biele stele, / son trê oris devant dì. / Sdrindulaitle chê bambinute / che si torni a indurmidî (Popolâr, Je jevade la biele stele)
    Sin. jevâsi , nassi , dâ sù , cricâ , vignî sù
12. v.intr. di uciei, tacâ a svolâ:  i sturnei a jevin in cîl a scjaps une vore grancj; lui al ti netave di polvar jeurs e cuais e parfin i becanots tal palût che a jevin sù a vueu come fusetis strambis (Alan Brusini, Par stradis lungjis)
    Sin. partî¹ , petâ il svol , jevâsi , jevâ il svol
    
    1. di avions, tirâsi sù di tiere
       Sin. partî¹
    2. ancje di altris elements, là sù, lontan de tiere:  la fumate dut câs dopo un pôc e jere jevade (Franca Mainardis, La liende dal riûl)
    3. di vint, tacâ a soflâ:  si bonave soreli e al jevave un vintulin di tramontan (Dino Virgili, La aghe da pît la cleve)
13. v.intr. (fig.) di alc di imateriâl, nassi, deventâ plui grant, fâ sintî il so pês e v.i.:  al vûl plui impegn par fâ jevâ il turisim intal Friûl de Alte (Redazion La Patrie dal Friûl, Grancj events sì, ma al vûl plui impegn par fâ jevâ il turisim intal Friûl de Alte); a jevavin tes bancjis i conts des Compagniis (Gianfranco Pellegrini, La lune te stele)
14. v.intr. cressi di volum pe fermentazion produsude dal levan:  la Not dai Muarts a ere une femine che a veve metût a jevâ il pan di forn (pan di cjase), cirche dîs pans e intant a ere vignude miezenot (Manuela Quaglia, A trei pas di distance…)
    Sin. cressi , dâ sù , sglonfâsi
15. v.tr. [BF] tirâ vie, viôt gjavâ :  buliva il mâr plui furiôs, la aria no veva riten. […] Si derin premura i doi umin di calâ chel straç [di vele] e jevâ il pâl che tigniva lûc di arbul [de barcje] (Federigo Comelli, Il me paîs); e fasint a madame un compliment / da lis spalis i jeve il tabarin (Pieri Çorut, Pronostic del 1827); se al cjatave une buine cristiane ur varès jevât tancj fastidis (Maria Forte, Cjase di Dalban)

Polirematichis e espressions idiomatichis

• jevâ sù loc.v.

Proverbis:

• cui che al jeve al piert la siele, cui che si sente si comede
• il soreli al jeve par ducj
• il soreli al jeve pardut
• jeve solt e sente bêç
• nol conte jevâ adore, baste rivâ su la ore
• se a Sant Bartolomiu al jeve il soreli clâr, o vin zulugne prin dai Sants