Dizionari de Lenghe Furlane

alçâsi  al|çâ|si  [FO]

1. v.pron.intr. metisi sù in pîts:  viodint a rivâ chel siôr si alce dal scagnut dulà che al jere sentât (Pieri Menis, Un macet di sanmartinis)
   Sin. dreçâsi , jevâsi , jevâ sù , jevâ , saltâ sù
2. v.pron.intr. vê un moviment o un mudament di forme o dimension che al fâs stâ plui insù:  la plete si alçave e si disbassave, sù e jù, in volte, daûr il respîr (Dino Virgili, La aghe da pît la cleve); la cinise si alçave […]. Chel altri frut, cul so stec, al parave sù la cinise e al procurave di vuaiâle; ma jê si sglonfave, si sglonfave, tant che e scomençà a comparî la fuiace (Catarine Percude, La fuiace de Madone)
3. v.pron.tr. tirâ sù alc di se stes, alc che si à intor o alc par se stes:  Baldo si alçà il cjâf des mans (Dino Virgili, Devant di dut il cîl)
   Sin. alçâ , tirâ sù , jevâ , jevâ sù , tirâsi sù
4. v.pron.intr. lâ insù:  lis compagniis a scjampin a finî la fieste al Lido indulà che in rive dal mâr - mi capissial - a spietin di saludâ el soreli cuant che si alce, la matine (Arturo Feruglio, Viaç a Vignesie); un penacul di fum e di faliscjis si alce tal cîl (Pieri Menis, Lis leiendis di Buie); di Davian si alçavin i F16 americans e talians (Angelo Floramo, Cuintristorie dal Nûfcent 1990-2000); une stangje che si alce nome se tu âs la clâf (Cristina Noacco, Faliscjis)
   Sin. jevâ , partî¹ , lâ sù , svolâ sù , vignî sù
5. v.pron.intr. aumentâ di nivel, di cuantitât, di valôr e v.i.:  par diviers motîfs fisics, la temperadure de atmosfere si alce e si torne a sbassâ plui voltis (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. dâ sù , lâ sù , tirâsi sù , vignî sù , cressi
6. v.pron.intr. di alc di grant e alt, jessi intun ciert puest, vê une posizion o une forme di dominance, ancje in maniere di jessi viodût:  parsore si alçave a plomp la crete e jù si viodeve la valade (Pieri Menis, Funerâl a Pâl Piçul); chê int e jere usade a viodi chel cjasament che si alçave su la piche dal cuc (Pieri Menis, La int)
   Sin. jessi¹ , jevâ , jevâsi , dâ sù , vignî sù , imparêsi
   
   1. vê une linie, une traietorie, e v.i. che al va sù di cuote:  la rive si alce sflanchinant e, fra la cjase sgombade dai Grîs e la scjalute dal Sagrât, si piert te plaçute dal borc (Maria Forte, La rive di Sant Pieri)
7. v.pron.intr. (fig.) di sun, cjant e v.i. fâsi sintî:  la nestre vôs si alce clare e fuarte a berlâ cuintri ogni forme di prevaricazion (Angelo Floramo, Cuintristorie dal Nûfcent 2000-2010); e da dute chê int si alce gaudiôs e intonât prin il «Magnificat» po il «Pange lingua» (Pieri Somede dai Marcs, Corpus Domini)
   
   1. di aiar, tacâ a soflâ:  al si alsa un vint teribil e spaurous, mai jodût (Pier Paolo Pasolini, I Turcs tal Friûl)