Dizionari de Lenghe Furlane

alçâ  al|çâ  [FO]

1. v.tr. movi, puartâ, meti adalt:  al alçave une tace di vin cuintri il lusôr di une cjandele tal so biel cesendeli di arint e al diseve: «Ae salût de veretât e nestre!» (Alan Brusini, Come tai romançs); al jere rivât su la puarte che il cûr i sbalçave e si jere dut dreçât prime di alçâ il saltel (Maria Forte, Fadie come ale); Tite Peresel al alçave la bandiere rosse come une flame (Maria Forte, "Nossent")
   Sin. alçâ sù , jevâ , jevâ sù , parâ sù , tirâ sù
   
   1. direzi insù une part dal cuarp:  Meni Cuc, che nol veve ancjemò vierte bocje, al alçà la man par domandâ la peraule (Pieri Menis, Il fiâr dal plevan); chel cjan, daspò che al à ben vuacât e cu lis çatis raspade la tiere, al alce il music e al si met a urlâ (Catarine Percude, Il cjan blanc di Alturis)
   2. voltâ, direzi adalt:  intant che al inviave il motôr al alçà i voi e si viodè tal spieli (Agnul di Spere, In Friûl, nossere)
   3. [TS] lit. (ancje ass.) tirà sù la ostie pe consacrazion intune celebrazion cristiane:  la gnot di Nadâl, intant che il predi al alce, di ducj i spirts si pues liberâsi (Pieri Menis, Lis leiendis di Buie)
2. v.tr. fâ cressi di misure, di nivel, di dimension, di valôr, di cuantitât e v.i.:  int, in sumis, che e lavorave no par alçâ il grum des palanchis, ma nome par tentâ di sbassâ la tasse dai debits (Riedo Pup, I furlans e i bêçs); «Al à dit che [la letare che al vendeve] al jere un ricuart di famee. Ma secont me al voleve alçâ il presit.» (Franco Marchetta, Il numar 1089); srarî i raps, propit par alçâ la cualitât (Mara Piccoli, Vendeme 2009: cuantitât, cualitât e… lavôr!)
   Sin. alimentâ , aumentâ , cressi , dopleâ , fâ cressi , fâ lâ sù , incressi , ingruessî , inricjî , insiorâ , moltiplicâ , nudrî , profondî , rionzi , sglonfâ , slargjâ , staronzâ , svilupâ , tirâ sù
   
   1. fâ cressi tune jerarchie:  juste in chei dîs lu vevin tornât a meti intal servizi, alçantlu di grât cul fâlu gjenerâl (Giovanni Gortani, Sot consei di vuere); a fevelavin lombart une cu la altre, e a berlavin une sorte straordenarie di talian cun dôs fantacinis, che di lôr, al è clâr, a cirivin di alçâ la cuotazion sociâl doprant la lenghe de television (Agnul di Spere, Chê dì che al neveà a Vignesie)
3. v.tr. fâ deventâ plui alt:  a volevin fâlis [lis scuelis] te braide di Michêl, disore de strade dal Tescolan, un puest une vore plui legri. E ancjemò a volevin fâlis di trê plans, par no mateâ une altre dì a alçâlis (Riedo Pup, Il façolet dal Dacian)
   Sin. alçâ sù , parâ sù
4. v.tr. fâ une struture edificade o che e compuarte un moviment di materiâl:  [Zuan Batiste Cavedalis] tal '39 al alçà une roste su la rive diestre de Ciline par protezi Cordenons (Giovanni Pillinini, Zuan Batiste Cavedalis - Une vite esemplâr)
   Sin. fâ , costruî , tirâ sù , fâ sù , jevâ
5. v.tr. pronunziâ o indreçâ a vôs:  No stin pensâi. Alcìn un cjant: Stait alegris fantacinis / che alegris podeis stâ. / Cuant che po sarês sposadis / dut il ben al finirà. (Anute Fabris, A passe la scalmane); a alçavin un zigo di fâ dûl (Maria Forte, Cjase di Dalban)
6. v.tr. [TS] zûcs dividi in doi e cambiâ di ordin il mac di cjartis messedât di un altri zuiadôr:  "Siore Luzie, che stei utente! che alci lis cjartis […] Eco… un, doi, trê… benon… trê di spade…" (Pieri Somede dai Marcs, Ursule); Zuanat al de di alçâ il mac (Dino Virgili, La aghe da pît la cleve)
   Sin. taçâ , taiâ
7. v.tr. [TS] sport soredut ass., te bale a svol fâ un passaç alt a di un compagn

Polirematichis e espressions idiomatichis

• alçâ di pês loc.v.
• alçâ il comedon loc.v.
• alçâ il grumâl loc.v.
• alçâ la vôs loc.v.
• alçâ lis alis loc.v.
• alçâ lis spalis loc.v.
• alçâ sù loc.v.

Proverbis:

• al è miôr tignîlu pe brene che no alçâlu pe code
• il popul o che al alce trop o che al sbasse trop
• l'om che al alce masse il bocâl al devente un nemâl
• miôr tignîlu pe cjavece che no alçâlu pe code
• tant alçâ e tant sbassâ