Dizionari de Lenghe Furlane

staronzâ  sta|ron|zâ  [AF]

1. v.tr. taiâ alc tor ator, par dâi une forme taronde o plui o mancui taronde:  mestri Checo al ripià il stranset e al finì di staronzâ lis suelis di un pâr di scarpis, sueladis aromai pe tierce volte e, ogni volte, fruiadis fin sul vuardul (Roberto Ongaro, Cretevierte)
   Sin. tarondâ
   
   1. taiâ in maniere che divers elements a vedin une lungjece vualive:  i barbîrs a son cjacarons; cuant che si va te lôr buteghe, intant che ti staronzin i cjavei, ti contin chê…, ti domandin chel…, magari dome par gjavâti fûr i passarats (Giovanni Miani, Barbîrs e pan)
   2. dâ une forme taronde, o plui o mancul taronde, sedi gjavant che zontant materiâl:  [fasint la statue di arzile] al slissotave il cerneli, al scompartive i cjavei, al staronzave i mêi de muse (Maria Forte, La Madone de Pâs)
      Sin. tarondâ
2. v.tr. fâ taronde une cifre o une cuantitât par difiet:  al è un an che no mi paie e ancjimò al intint di staronzâ il cont (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   
   1. fâ taronde une cifre o une cuantitât cressintle:  a cjalavin la spongje, lis plui lichignosis le nasavin e cuant che a decidevin di comprâ a tratavin sul presit e, dopo justade, a staronzavin i grams (Pieri Menis, Il cuader de none)
      Sin. tarondâ
   2. fâ cressi une cuantitât, ancje cence fâ cifre taronde:  capitâl di vuardâlu plui de salût, e di staronzâlu un pôc a la volte cul timp a lâ, par rivâ adore une dì, cul aiût dal Signôr, a comprâ une altre bestie, di raze (Meni Ucel, La vacje); al jere rivât a vê cualchi steche di nazionâls cul dâi la mandule al infermîr de matine, un vieli gjeneric che al staronzave la paie cul contentâ i malâts (Amedeo Giacomini, Tal ospedâl)
3. v.tr. (fig.) fâ che alc, ancje imateriâl, al sedi plui piçul, plui curt, plui bas, plui limitât e v.i.:  chel fregul di indipendence e di decentrament che al è restât tal ordenament regjonâl preparât de Comission plenarie al vignarà ancjemò staronzât e ridusût e, par ben che e vadi, e saltarà fûr une pape di lin, cence savôr e cence risultâts (Josef Marchet, 80 discors); alc lu ai savût di altris e lu vent daûr che lu ai comprât, cence ni zontâ ni staronzâ (Antoni Beline, Pre Pitin)
   Sin. scurtâ , sbassâ , taiâ , strenzi , ridusi , limâ
4. v.tr. (fig.) fâ che alc al somei plui complet, plui impuartant, plui interessant zontant alc:  ce costial a dî lis robis te lôr vere misure e realtât? Lassait ai sfueis il vizi di staronzâlis, di sglonfâlis, di fâur la pinie e l'ôr da pît o, salacor, di inventâlis di plante fûr (Josef Marchet, Lis predicjis dal muini); i bêçs a staronzin la felicitât ancje se no le rezin dal dut (Maria Forte, Cjase di Dalban)
   Sin. sglonfâ