Dizionari de Lenghe Furlane

sbassâ  sba|ssâ  [FO]

1. v.tr. puartâ injù, tirâ jù:  i pareve che al ves pôc lusôr par lei e scrivi, e al sbassà il plat de lampade (Carlo Sgorlon, Prime di sere)
   Sin. disbassâ , tirâ jù
   Var. bassâ
2. v.tr. indreçâ injù o pleâ injù une part dal cuarp:  la Anzuline e sbassave i voi e e deventave dute rosse (Maria Forte, Cjase di Dalban); Bonan al sbasse il cjâf e lu cjale jenfri des ceis e dai ocjâi (Riedo Pup, Predis di ogni fate)
3. v.tr. fâ deventâ plui bas:  un altri adatament [te badie di Rosacis] al è dal 1823, sot dal arcivescul Emanuele Lodi, che, tra altri, al puartà a sbassâ i spalts e lis toratis (Consorzi pe difese dai cjistiei storics dal Friûl - Vignesie Julie, Rosacis)
   Sin. calâ , disbassâ , tirâ jù
4. v.tr. fâ deventâ minôr di cuantitât, cualitât, intensitât e v.i.:  [une diete ecuilibrade] e jude ancje a sbassâ il pericul di malatiis dal cûr e de circolazion e a protezi il stomi e il colon dal disvilup di tumôrs (Guglielmo Pitzalis, Mangje san 1); no jerin cognossûts ni antibiotics ni antipiretics (medisinis che a sbassin la fiere) (Franc Fari, Il cjâf dai furlans); po, sbassant la vôs come che si dîs tra di nô, cumò che nissun sint: "Isal cualchi progjet in viste? […]" (Alan Brusini, Gian Paolo Linda, I forescj)
   Sin. calâ , disbassâ , staronzâ , tirâ jù
5. v.tr. (fig.) meti intune posizion jerarchiche, psicoligjiche, di dignitât e v.i. plui basse:  il so al jere il cruziâsi fis di un che al à scugnût stâ in valanghin fra il jessi siôrs e il scugnî someâlu par no sbassâ la famee (Maria Forte, Cjase di Dalban)
   Sin. degradâ , disbassâ , tirâ jù , umiliâ

Polirematichis e espressions idiomatichis

• sbassâ i cuars loc.v.
• sbassâ il cjâf loc.v.
• sbassâ la code loc.v.
• sbassâ la creste loc.v.
• sbassâ lis alis loc.v.
• sbassâ lis orelis loc.v.

Proverbis:

• il popul o che al alce trop o che al sbasse trop
• tant alçâ e tant sbassâ