Dizionari de Lenghe Furlane

strenzi  /-è-/  stren|zi  [FO]

1. v.tr. (ancje ass.) cjapâ cuntune cierte fuarce:  e jere za sentade sul caretin, dongje il barbe Tite che al strenzeve fuart la scorie e lis brenis par tignî fer il cjaval (Maria Forte, Cjase di Dalban); nol resistè a la tentazion di strenzi la mantie e di vierzi la puarte (Checo Tam, Il palaç)
   Sin. cjapâ , grampâ
   Cfr. fracâ , strucâ , fruçâ , sierâ
2. v.tr. (ancje ass.) sierâ cun fuarce:  al veve tacât a piturâ i scûrs: a 'nd tirave jù un par volte, lu gratave e lu slissotave cu la cjarte di veri e i dave sù il vueli di lin; al strenzeve lis vîts a len, al onzeve i cancars (Roberto Ongaro, Cretevierte)
   
   1. fâ fuarce suntune part dal cuarp o sierâ fuart une part dal cuarp su se stesse o plui parts une cun chê altre:  al strenzeve i dincj di dolôr, ma no si rindeve (Pieri Menis, Tinut di Libro); la fantate e strenzè lis mans cussì a fuart che lis aìnis a deventarin blancjis (Gianni Gregoricchio, Trê feminis); e siere i voi e ju strenç cun dute fuarce tant che se e fos intune poiate di fum (Josef Marchet, Lis predicjis dal muini)
3. v.tr. cjapâ cui braçs cdn., tant che at di afiet, o di amôr, o di passion e v.i.:  la strenzevi cuintri di me, le bussavi sul cerneli, su la bocje, i cjareçavi i cjavei (Alan Brusini, Gian Paolo Linda, I forescj); daûr il frascjam dai ramaçs, lui le veve strente e bussade, a colp. E i veve viert dut il cûr (Maria Forte, Cjase di Dalban)
   Cfr. cjapâ , cjoli , cjapâ a bracecuel , cjoli a bracecuel , braçolâ
4. v.tr. (ancje ass.) fâ sintî une pression su alc che al è sierât o cjapât dentri:  chest pâr di scarpins che lusin di vernîs e mi strenzin i pîts (Emilio Nardini, La Signorine Mie)
5. v.tr. (fig.) di sensazion, fisiche o psicologjiche, cjapâ cun fuarce:  il lancûr mi strenzeve il cûr (Gianni Gregoricchio, Trê feminis); al veve cjatade sô fie e, cuntun grop che i strenzeve il cuel, i disè: "Marie, co tu ti maridarâs un toc di cheste tiere e sarà tô […]" (Pieri Somede dai Marcs, La braide)
6. v.tr. tignî dongje, tignî sierât:  al dismole un toc de curdele che e strenç il camisot (Franco Marchetta, Madalene)
7. v.tr. (fig.) tignî tacât cuntun leam, cuntune relazion o ancje cuntun contrat, un debit e v.i.:  a no è dita che il Signour nol vedi pietât di nû […] al sa cuant amour che al ni strens a chistu nustri paisut spierdût tal mont (Pier Paolo Pasolini, I Turcs tal Friûl)
8. v.tr. (ancje fig.) meti cdn. o alc tun lûc stret sfuarçant par che al jentri:  Diu no si po strenzilu tal nestri cjâf (Pieri Piçul, Vieri e gnûf)
   Sin. fracâ
9. v.tr. (ancje ass.) fasint un svolt o passant un veicul, cjapâ une traietorie che e je masse dongje de bande didentri dal svolt o masse dongje di chel altri veicul
   Sin. sierâ
10. v.tr. fâ plui strent:  mi rangji a fâ ancje lavoruts di sartorie, tal limit dal pussibil: scurtâ bregons, cambiâ cernieris, strenzi, slargjâ (Marta Vezzi, Tania Cassutti, "Il fier di gugje")
    Sin. ridusi , setâ , stretâ
11. v.tr. (fig.) meti in struc, sintetizâ:  o podaressin fâ un discors lunc come la fam; ma o cirarìn di strenzilu in pocjis peraulis (Josef Marchet, Iresponsabilitât)
    Sin. riassumi , sintetizâ , staronzâ , strucâ
    
    1. fâ in curt, finî in pôc timp o in mancul timp:  l'assessôr nus domande di strenzi, […] al volarès viodi inviadis lis voris de Comission viers la conclusion (Adrian Cescje, Memoriis di politiche linguistiche)
12. v.tr. (fig.) inviâ un rapuart tra personis o ents, istituzions e v.i., in gjenar mutuâl:  [Giulio Camillo] a Vignesie, al jentre tal circul dai Asolani, e al strenç rapuarts di amicizie cun Pietro Bembo, Pietro Aretino, Tiziano Vecellio (Mario Turello, Il brevet); une traduzion e covente ancje par strenzi un leam tra lenghis e culturis (Sandri Carrozzo, Note dal curadôr ae traduzion dal Infier di Dante)
    Sin. concludi , cumbinâ , incuintrâ , justâ , laçâ , tiessi
13. v.tr. [TS] gastr. fâ deventâ plui fis, plui penç:  cuei par strenzi il tocj
    Sin. infissî

Polirematichis e espressions idiomatichis

• strenzi i dincj loc.v.
• strenzi i lavris loc.v.
• strenzi il cûr loc.v.
• strenzi la cinture loc.v.
• strenzi la cinturie loc.v.
• strenzi la man loc.v.
• strenzi lis spalis loc.v.
• strenzi un altri boton de cinture loc.v.

Proverbis:

• cui che trop al abrace nuie nol strenç