Dizionari de Lenghe Furlane

sierâ  sie|râ  [FO]

1. v.tr. meti un element, ancje mobil, intune posizion che e impedìs la comunicazion, il passaç e v.i.:  "[…] Spietait nome un credo, tant che o sieri chestis puartis, se no i laris mi fasin il disio" (Luigi Gortani, Meni Fari); o sieravi ancje i scûrs dai barcons e o impiavi la lûs (Alan Brusini, Gian Paolo Linda, I forescj)
   Var. serâ , sarâ² , sirâ
2. v.tr. fâ che un spazi, un contignidôr o sim. nol sedi viert, acessibil e v.i.:  dopo cene, cetantis mascaris a balâ in cjase Dordul e li ridi, sierâur la cjamare par no che a vadin a durmî, çocâ e cjantâ (Pieri Menis, Une cotule pal dì de sagre); il nono al veve sierât il camarin cuntun lochet grues e si puartave simpri ator lis clâfs (Checo Tam, Sante); sierâ il bussulot de marmelade
   Cfr. taponâ , stropâ
3. v.tr. unî, fâ che si cometin lis parts o i lements di alc, di une linie, di un grup e v.i., in mût che e risulti une forme, une linie, une superficie continue:  sierâ un cercli
4. v.tr. tirâ dongje parts di un vistît o sim.:  une cjamesute scure cu lis maniis lungjis ravaiadis in comedon e cuntun cordonut che le sierave fin sot dal cuel (Roberto Ongaro, Cretevierte)
   Sin. leâ , peâ
5. v.tr. tornâ a meti dongje o tignî strent alc che al steve viert, spec. se componût di plui elements:  Jacum svelt al sierà il pugn e al metè la man in sachete (Angelo Covazzi, Baste la mosse); o vierç la puarte: Catia e stâ leìnt un libri. "Che mi scusi" mi dîs, "o voi vie dal lamp". E siere il libri (Alan Brusini, Gian Paolo Linda, I forescj); sierâ la ombrene
   Sin. pleâ , strenzi
6. v.tr. fâ che no si puedi plui passâ:  in puartis di Glemone il vigjil cui braçs a viert i siere la strade juste in chel che al steve rivant (Alan Brusini, Amîs come prime)
   Sin. blocâ , stropâ , taiâ , tressâ
7. v.tr. tignî dentri o delimitâ un spazi:  […] la stangjaçade par confin, disore, il puarton di fier dal zardin, su la strade, a sieravin un mont di vert e di ombrene (Dino Virgili, La aghe da pît la cleve); la Mont Grande […] dibot e sierave la val a misdì, lassant viert nome un strentoi par che al surtìs il riul e une stradute (Roberto Ongaro, Cretevierte)
   Sin. cenglâ , cenzi , cercenâ , cerclâ , cjapâ dentri , cludi , confinâ , contornâ , coronâ¹ , incenglâ , sierâ intor , torcenâ
8. v.tr. (fig.) fâ deventâ insensibil o indisponibil:  sierâ il cûr al amôr
9. v.tr. meti intun puest che nol è viert o tal viert:  la sô femine ae casse, […] pronte sui bêçs cu lis mans plenis di anei, a contâju, a sierâju tal cassetin che al sune (Alan Brusini, Par stradis lungjis)
10. v.tr. obleâ a stâ intun puest controlât:  i todescs […] dopo vê cjapât lui e la sô femine Norme a Vignesie, dulà che a jerin scuindûts, ju àn sierâts tun cjamp di concentrament a Carpi (Pieri Somede dai Marcs, Tripoli bel sol d'amore)
    Sin. meti dentri
11. v.tr. tignî blocât:  a jerin trê bussulots di bande che a sieravin te smuarse de glace cualchi gjambe secje di autunâl (Carlo Sgorlon, Prime di sere)
    Sin. fermâ , strenzi
12. v.tr. inderedâ il moviment o il passaç:  l'atacant al è stât sierât dai difensôrs
    Sin. blocâ , strenzi
13. v.tr. (ancje ass.) puartâ insom, concludi o assisti ae conclusion:  cussì, sierant il discors, o dîs che o soi tant contente de mê situazion (AAVV, Sul florî); o sierìn un altri an, e ce an. Dificil, ruspiôs (Dree Valcic, Indevant cu la nestre muse, cence simiotâ)
    Sin. finî , concludi
    
    1. puartâ ae conclusion une operazion, une dinamiche, une procedure e v.i.:  [la tratative] le ai gjestide dute jo, prime di lâ in feriis. Po o ai lassât i miei doi fîs Renzo e Paolo, par sierâle (Oscar Puntel, Mario Collavino: une bandiere furlane parsore il gnûf World Trade Center di New York); li sun doi pîts, tic e tac, o vin sierât l'afâr (Riedo Pup, Jo, evasôr fiscâl); prime de polse al rive il gol dal atacant basc, che al siere inte maniere miôr un assist di Molina (Marc Stolf, Udinese - Sassuolo 2-0)
    2. formâ la part conclusive:  si pues "formulâ" cuistions "teologjichis" intal lengaç curint de sience […] come che si pues viodi des 142 pagjinis di formulis matematichis che a sierin il libri di Tipler (Sergio Cecotti, Teologjie algjebriche); chê sô vecjaie svampide e tormentade e sierave une vite vivude un pôc cence stoc, va ben, ma serene e furnide di lavôr (Maria Forte, La aghe dal Ariul)
14. v.tr. [TS] zûcs (ass.) in cualchi zûc di cjartis, vinci la man metint in taule lis cjartis tes cumbinazions previodudis
15. v.tr., v.intr. (ancje ass.) fermâ, dismeti une ativitât:  malon ancje l'andament des aziendis: a àn sierât in 1275, cuintri 1051 che a àn vierzût (Redazion il Diari, Casse integrazion); intant che dutis lis associazions no fassistis a son stadis sieradis dal fassisim, la SFF e à podût continuâ la sô ativitât (Sandri Carrozzo, La colonie)
    
    1. v.intr. finî di vore o no jessi in vore, no jessi viert al public, ai clients e v.i.:  i cines a sierin aes dîs sot sere (Angelo Floramo, Cuintristorie dal Nûfcent 1970-1980); [la ostarie] usgnot e po sierâ adore: a son ducj a cjase, la int, e i gjermaniots a la «Fieste dal mandi» (Dino Virgili, La aghe da pît la cleve)
16. v.intr. di plui parts, cometisi, lâ dongje o sim.:  a Denêl Cjandùs, par vie che al jere tarondin, [la vieste] no i sierave ben denant (Pieri Menis, Tinut di Libro)
    Sin. sierâsi , dâsi dongje
17. v.intr. rinunziâ, spec. in maniere definitive, a une persone, a un rapuart, a une ativitât, a un costum e v.i.:  o ai cognossût miôr gno barbe Primo cuant che o jeri plui grant, cuant che al à sierât cul pugjilât e al à scomençât cu la lote libare (John Carnera, in Storiis e Memoriis di Furlans in Grande Bretagne Lunari 2010); vonde, cun te o ai sierât!
    Sin. finî , finîle

Polirematichis e espressions idiomatichis

• sierâ a clâf loc.v.
• sierâ buteghe loc.v.
• sierâ dentri loc.v.
• sierâ dongje loc.v.
• sierâ fûr loc.v.
• sierâ fûr de puarte loc.v.
• sierâ i conts loc.v.
• sierâ i voi loc.v.
• sierâ il cercli loc.v.
• sierâ il cjôt dopo scjampade la purcite loc.v.
• sierâ il discors loc.v.
• sierâ il stomi loc.v.
• sierâ la bocje loc.v.
• sierâ la casse loc.v.
• sierâ la cusine loc.v.
• sierâ la puarte loc.v.
• sierâ la puarte dal cjôt daspò scjampât il purcit loc.v.
• sierâ la puarte su la muse loc.v.
• sierâ la puarte sul nâs loc.v.
• sierâ lûs loc.v.
• sierâ tai braçs loc.v.
• sierâ un voli loc.v.
• sierâ voli loc.v.

Proverbis:

• a chei che ur sierin la puarte, il Signôr ur spalanche il puarton
• a un lari in cjase no si siere mai
• ai laris di cjase no si siere mai
• ai laris no si ur siere lis puartis
• cjamp sierât al è mieç coltât
• cjan e vilan no sierin mai la puarte
• cuant che il lari al à robât,nol ocor sierâ la puarte
• cuant che lis bolps si consein, sierait il gjalinâr
• cui che al jentre ultin che al sieri la puarte
• cui che al reste daûr che al sieri la puarte
• cui che ben al siere al cjate
• cui che ben al siere ben al vierç
• il Signôr al siere une puarte e al vierç un barcon
• la avemarie sunade, la fantate sierade
• no si à di sierâ la chebe co l'uciel al è scjampât
• no stâ spietâ di sierâ il cjôt daspò scjampade la purcite
• nol vâl sierâ la stale co a son stâts robâts i bûs
• se il Signôr al siere une puarte, ind vierç cent
• se il Signôr al siere une puarte, ind vierç dôs
• se si siere une puarte, si vierç une altre
• spalancâ i voi parsore il ben, sierâ un voli parsore il mâl