Dizionari de Lenghe Furlane

pleâ  ple|â  [AF]

1. v.tr. fâ che alc, soredut alc che si puedi assimilâ a une linie o a une superficie, al cjapi une forme a arc o a cjanton plui o mancul sierât:  la gjambe flapide le plearin a scuare e le learin cuntune cengle (Riedo Pup, I zimuluts dal Çuet); un riduçâ lizêr che i pleave i lavris (Gianni Gregoricchio, Îr e doman); su la diestre al jere un machinari di chei par pleâ il fier (Igor Londero, Delit in vie del Lavoro)
   Var. pleiâ
   Cfr. stuarzi
   
   1. fâ sù dant une forme ordenade:  "Dami une man, Nives, a pleâ il mantîl" (Costantino Smaniotto, Co l'amôr al cimie); al tacà a slavinâ, e alore a cjaparin sù la robe [che e jere a suiâ] a braçadis, come che e vignive, butantle tal zei cence pleâle (Carlo Sgorlon, Prime di sere)
   2. fâ brutis pleis, fâ cjapâ une forme a grispis, ancje no volude:  sta atent che cussì tu pleis dute la cjamese
      Cfr. ingrispâ , fruçâ , frapâ
2. v.tr. fâ che alc si sbassi o movi o meti intune posizion inclinade:  il vieli, sbatûts i voi, al plee il cjâf di une bande e al reste sec (Pieri Somede dai Marcs, Dure leç); al cjapà la pale incolme e le pleà in svuinc, par mostrâi che la malte grasse no si distacave (Maria Forte, La tiere di Lansing)
   Sin. disbassâ , sgobâ , sbassâ , arcâ
3. v.tr. rivâ a fâ acetâ une reson, un argoment, un rapuart di fuarcis:  a è testarde, ma speri di pleâle (Pieri Somede dai Marcs, Vilie di Nadâl (teatri))
   
   1. rivâ a fâ rinunziâ, fâ che cdn. si pierdi di morâl:  la strache no le pleave (Maria Forte, Cjase di Dalban)
4. v.tr. (fig.) imponi di stâ sot di un podê, sot di un comant, sot di une autoritât:  in chel an [I Langobarts] a jerin stanziâts in Ongjarie e te basse Austrie, indulà che a vevin vinçûts e pleâts i Gjepidis (Josef Marchet, Cuintristorie dal Friûl fin sot la Italie)
   Sin. domeâ , folpeâ , somerzi , tibiâ , sotanâ , suditâ , meti sot
5. v.intr. cjapâ une traietorie che e cambie di direzion:  rivâts al puint di Sant Quarin, pleìn sù a tramontane (Josef Cjargnel, La regjine dal Landri); al veve un tumôr intal lobi frontâl, de bande çampe dal cerviel. Prime di lâ tal ospedâl si jere inacuart che cuant che al cjaminave o che al vuidave la machine, al pleave a diestre (Franc Fari, Il cjâf dai furlans)
   Sin. cjapâ , zirâ , butâ , tirâ , voltâ , svoltâ , voltâsi
   
   1. (fig.) cjapâ une cierte ande:  furlans, us doi l'avîs / che o sin entrâts nel an cincuantesîs. / Savês che l'è bisest, e come tâl, Secont l'antîc judizi, Al devi pleâ mâl (Pieri Çorut, Il Strolic mezan. Pronostic par l'an 1856); l'autonomisim furlan, in linie di massime, al à pleât su la posizion moderade di mantignî la unitât regjonâl (Adrian Cescje, Garantî la unitât furlane)

Polirematichis e espressions idiomatichis

• pleâ la schene loc.v.

Proverbis:

• bisugne pleâ l'arbul co al è zovin
• bisugne pleâ la bachete, l'arbul si romp
• l'arbul al cole di chê bande che al plee
• l'om si plee, il mûl al è ustinât