Dizionari de Lenghe Furlane

leâ  le|â  [FO]

1. v.tr. strenzi cuntune cuarde, un laç, un spali, un fîl e v.i., une o plui cjossis o ancje personis par unî o tignî fer:  cuntune manate gruesse, pelose, ju brincave [i agnei], ur leave a strent cuntune vermene di vencjâr lis cuatri çatutis in crôs e po… op!, ju butave di pês su la briscje (Pieri Somede dai Marcs, Clâr e scûr); cu la spade al taie un pôcs di lens grues; ju lee insiemi come une çate e cussì a rivin a passâ [la aghe] (Popolâr - Andreina Nicoloso Ciceri, Blancje come la nêf - Racconti popolari friulani I); a seselavin a grampis lis spiis che a leavin in balçs e che a metevin in jeche (Pieri Somede dai Marcs, La spiarie)
   Sin. inlaçâ , laçâ , tacâ , peâ
   Var. leiâ
2. v.tr. (fig.) condizionâ e a gjavâ libertât:  chês robis segretis che, par intant, a leavin tancj zovins e ju tignivin impastanâts tal pericul (Maria Forte, Cjase di Dalban)
   Sin. fermâ , inclaudâ , vincolâ , peâ
3. v.tr. (ancje ass.) limitâ tai moviments:  al si tirà sù in senton, negri sfinît, cu la gjacheta che a i leava i braçs (Novella Cantarutti, La not di Gjoriu)
   Sin. imberdeâ , intrigâ , peâ
4. v.tr. [TS] lead. cusî insiemi lis pagjinis e i fassicui di un libri:  leâ un libri
5. v.tr. [TS] ores. unî cun fîi metalics par fâ zoiis:  o vuei fâ leâ in arint chest ritratut di puartâ tor il cuel (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
6. v.tr. [TS] gastr. (ancje ass.) fâ alc plui fis e cremôs:  lassâ suiâ [il guselâr in purè] a fûc bas regolant di sâl e leâ ae fin cul formadi (Giorgio Pascoli, Il Litum: jerbis salvadiis te cusine)
   Sin. infissî , strenzi
7. v.tr. (fig.) svicinâ fin scuasi a fondi doi elements:  une armoniche estrose che, a voltis, e leave ben dutis lis notis o lis distacave a colp par dâ gnerf al sun (Maria Forte, La cjase dal Murat)
   Sin. peâ
   
   1. [TS] fon. pronunziâ insiemi dôs vocâls par mantignî il ritmi dal viers
8. v.tr. (fig.) puartâ di un puest a di un altri:  la Blancjade e jere un gatul di strade che e leave pes curtis, sot Cjampeon, l'ultin borc di Biliris cun Samardencje (Meni Ucel, I colaçs)
   Sin. colegâ , coneti , unî , peâ
   
   1. dâ la impression di meti in comunicazion:  bande des montagnis a jerin des lungjis saetonis che a leavin il cîl a la tiere (Checo Tam, La codebuie)
9. v.tr. (fig.) svicinâ dôs o plui personis cun relazions afetivis, afinitâts di interès e sim.:  nuie nus leave, nome la zoventût e la clamade dal istint (Carlo Sgorlon, Il dolfin)
   Sin. zontâ , dâ dongje , dâ adun , meti adun , unî , peâ
10. v.tr. (fig.) fâ stâ dongje cuntune relazion, dipendence, afinitât e v.i. fats, argoments, ponts logjics, elements astrats e v.i.:  la mari inte famee e comande […] cu la fuarce dal amôr che al lee ancje ce che al è disleât, che al ten dongje ancje ce che si sparnìs (Francesc Placerean, Cemût tirâ sù i fîs in cheste ete); ve che cumò si podeve leâ i fats e lis personis cuntun fîl, ancje se sutîl, di logjiche (Roberto Ongaro, Cretevierte)
    Sin. zontâ , dâ dongje , dâ adun , meti adun , unî , peâ
11. v.intr. (fig.) fâ amicizie, intindisi, jessi in cunvigne:  cui siei compagns di scuele nol leave trop (Gianni Gregoricchio, Îr e doman); i membris [de comission pe grafie] che a leavin cu la Filologjiche o che le consideravin cun deference a jerin plui di un (Adrian Cescje, Memoriis di politiche linguistiche); furlans e todescjis no lein ben, al pensave (Agnul di Spere, L'avignî di Antoni Cossâr)
    Sin. armonizâ , cumbinâ , familiarizâ , ingranâ , intignîsi , intindisi , simpatizâ , socializâ , triscâ
12. v.intr. (fig.) jessi in conession logjiche:  no stâ a tirâ fûr robis che no lein tra di lôr
    Sin. concuardâ , concuardâsi , cumbinâsi , leâsi , tacâsi , tacâ
13. v.tr., v.intr. (fig.) di robe di mangjâ, di bevi o sim., dâ une brute sensazion in bocje:  E ce sêtu? Sêtu vea / o piel nova che a si screa? Sêtu garp che al lea i dincj? (Giorgio Ferigo, Romancillo dal amôr galup); i polifenôi (tanins, chei che a fasin la ue garbe, che e lee in bocje) a son di cualitât otime (Enrico Peterlunger, Lis varietâts di vît resistentis a lis malatiis)
    Sin. peâ
14. v.intr. [TS] agr. tacâ a fâ lis pomis dopo de floridure:  i mandolârs e i pierçolârs e vevin une biele floride, ma no àn leât cause la ploie e il frêt (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• leâ i dincj loc.v.
• leâ in bocje loc.v.
• leâ la bocje loc.v.
• leâ lis mans loc.v.
• leâ mans e pîts loc.v.
• vê i braçs leâts loc.v.
• vê lis mans leadis loc.v.

Proverbis:

• cui che al è mat che si fasi leâ
• cui che ben al lee ben al dislee
• dulà che nol dûl no si lee
• i bûs si ju lee pe cjavece, i oms pe lenghe
• il Concei di Trent al à leât il diaul cuntun cjaveli de madone
• lis feminis si leilis pe peraule, lis vacjis pe cjadene
• nol covente leâ il cjâf prin che al sedi rot
• si lee il mus là che il paron comande