Dizionari de Lenghe Furlane

zontâ  zon|tâ  [FO]

1. v.tr. fâ une sume o meti une cierte cuantitât par rivâ a une sume:  al à un librut […] dulà che, se al zonta i solts di Viea, al salte four un numar che al imbarlumìs (Novella Cantarutti, I cjans di not); cent e otantedoi francs e sincuantesinc sentesins, servizio compreso. […] O spudi lis cjartis di dîs une a la volte. Al numar disevot o zonti i doi francs e sincuantesinc (Arturo Feruglio, Viaç a Vignesie)
   Sin. sumâ , azonzi
2. v.tr. meti in plui, meti dongje di altris elements de stesse sorte o di altre sorte:  la man blancje di cjalcine e zonte clap su clap, modon su modon cuntune ande sigure e seguitive (Dino Virgili, La aghe da pît la cleve); cualchi setemane fûr dal mont par fâ un lavôr che al zonte ponts ae mê cariere (Alan Brusini, Gian Paolo Linda, I forescj); "Lat sì; ma par contentâti o ai zontât un got di cafè, ma sôl un got, tu sâs che il miedi ti à ordenât di no cjoli ni cafè, ni licôrs" (Pieri Somede dai Marcs, Un pugn di moscjis); cuant che lis verduris a son ben smoladis, zontâ une tace di salse di pomodoro (Margherita Timeus, Cusine etniche, parinte strete de cusine furlane)
   Sin. meti , meti sù , rionzi , inzontâ
   
   1. dâ in plui, tant che regâl:  a mê mari, sor Poldo, su la spese, i zontave cualchi crodie di ardiel e di formadi, une talpe di purcit, robe vanzade (Alan Brusini, Come tai romançs)
3. v.tr. dî, o ancje scrivi, comunicâ e v.i., alc in plui:  i triestins a stan di gale come che a son: a sberghelin a fuart «Trieste all'Italia» e po a zontin plui planc: «…il più tardi possibile!» (Josef Marchet, Sot di nissun); cence zontâ nuie altri, lu brincà par braç e lu sburtà fûr (Gianni Gregoricchio, Trê feminis)
   Sin. inzontâ , meti dongje
4. v.tr. meti dongje di une pratiche, di un messaç, di une spedizion e v.i. alc che nol è l'ogjet principâl ma che al pues coventâ o zovâ:  al zontà ae denunzie la fotografie de disparide e si indi le cun chei documents firmâts in man (Fabian Ros, Un piçul particolâr); o vuei che ancje chest document al sedi zontât al verbâl di cheste riunion e che al sedi doprât se si pues pe difese de Regjon cuintri dal ricors presentât (Adrian Cescje, Memoriis di politiche linguistiche)
   Sin. meti in zonte , inzontâ
5. v.tr. meti dongje un cun chel altri plui elements, plui parts, ancje fasintju deventâ un complès sôl:  [al jere il plan di] zontâ Çarvignan e la Basse cu la provincie di Gurize, par cjapâ dentri Monfalcon in chê di Triest (Francesc Placerean, Cuintristorie dal Friûl dal 1866 fint in dì di vuê); zontâ i fîi da la urdidure (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. cometi¹ , coneti , conzonzi , meti dongje , peâ , tacâ , unî
   
   1. meti in colegament, in comunicazion:  si podeve viodi, disot, dut Cretevierte cui siei cops scrodeâts e cul so riul che lu taiave in doi e cul so puintut che lu tornave a zontâ (Roberto Ongaro, Cretevierte)