Dizionari de Lenghe Furlane

meti sù    [FO]

1. loc.v. meti alc parsore di alc altri:  tornâ a meti sù un clap sore chel altri (Francesc Placerean, La vite di chest mont, cence un pôc di spirt, e devente brute e insopuartabile)
2. loc.v. fâ jentrâ tun orifizi dal cuarp:  [il dotôr] al tacà subit a visitâlu: palpe a diestre, palpe a çampe; sint i polmons, viôt i voi, met sù il dêt di chê bande daûr, par viodi se la prostate e jere a puest (Angelo Covazzi, Jacum dal miedi)
   
   1. (pop.) penetrâ tal at sessuâl:  vergogna, tasêt, che i lu savìn ben / parcè che i tavanais a scûr e a lum / parcè che i sês vecjatas che impestais / che a nol vôl metivel sù plui nissun (Giorgio Ferigo, Sul stamp di Carlo Porta)
      Sin. parâ sù
3. loc.v. montâ alc che si tache, che si picje, che al sta a contat, che al sta impins e v.i.:  ma tant e tant soi bon / di spegaçâ portons, / di tasselâ bragons, / di nasâ un caratel, / di meti sù un spinel (Pieri Çorut, La mê biografie); si tratave di meti sù lis cjampanis gnovis (Riedo Pup, Predis di ogni fate)
   
   1. montâ un implant:  a Gjani Cjasalot di Gnespolêt i àn metût sù il puarton gnûf, cul comant eletronic a distance (Ivano Urli, Il progrès)
4. loc.v. stampâ o publicâ:  il diretôr Alberto Buvoli mi veve impromitût di publicâ su la riviste "Storia contemporanea in Friuli" une recension che i vevi antecipade. Je ai dade tal mês di Avrîl, ma no me à metude sù (Luche Nazzi, La storie vere de "Garibaldi-Natisone")
5. loc.v. meti alc, soredut vistîts, scarpis, furniments e v.i., a contat cul cuarp:  "E intant doman, che e ven la contesse, no varai un fîl di vistît di meti sù par presentâmi, e par no parè propit une contadinate!" (Ercole Carletti, Mariute); tornant a meti sù i ocjai forsit cumò il plevan si inacuarç di alc che prime nol podeve viodi (Franco Marchetta, Madalene)
   Sin. meti intor , meti aduès , meti
6. loc.v. soredut in riferiment ai dincj, jessi tal moment che a tachin a vignî fûr:  "[…] tu mi rontis come une frutute, co mi met sù i dincj di lat! Meni!… e tu mi vaiussis in chist mût, tu mi frichis!" (Dolfo Zorzut, Mi ûstu ben)
7. loc.v. riferît ai chilos, ae panze, al gras e v.i., deventâ plui pesant:  miôr doprâ pôc o nuie i gras saturs di origjin animâl tant che spongje, ardiel, saìn e pane, parcè che il consum ecessîf di chescj gras al fâs meti sù chilos in plui (Guglielmo Pitzalis, Mangje san 3)
   Sin. butâ sù
8. loc.v. riferît ai agns, deventâ plui vecjo o vê aspiet di plui vecjo:  «Al par che al vei metût sù cent agn, siôr Simon, e di pôc incà» (Maria Forte, La tiere di Lansing)
9. loc.v. cjapâ une ande, vê une maniere di fâ:  "Se vuê, in cheste cjase e vês un dovê, al è di no meti sù i aiars di une volte" (Ercole Carletti, Il çoc); «Biât frut» al pensà Zuan «al à za metût sù une grinte di "socsfîr" che al console» (Maria Forte, La tiere di Lansing)
10. loc.v. fâ, preparâ e furnî alc par che al puedi fâ une ciert funzion, soredut in riferiment a ativitâts economichis:  in timp di militâr, al veve fate amicizie cuntun ustîr di Praclûs, che al veve metude sù une ostarione cun tant di zûc di balis (Gianni Gregoricchio, Îr e doman); il progjet di meti sù une fabriche di tiessidure al jere stât spampanât in lunc e in larc e tante biade int, bisugnose di lavorâ, massime zoventût, e veve domandât di podê lâ a vore te gnove industrie (Pieri Menis, Chei di Muraie)
    Sin. prontâ , fâ , vierzi
11. loc.v. fâ une ativitât o une struture che e domande preparazion, organizazion:  la regjon, come che e sarà imbastide in Italie no disberdee nuie, no comede nuie, no zove nuie. E, in fin dai conts, no nus impuarte nuie che le metin sù o che no le metin sù (Josef Marchet, Lôr no molin e nô no molìn); si à començât a sintî a dî che ca e là a metevin sù une "vuardie nazionâl pe sigurece dal popul" (Riedo Pup, Il prin moto); o vevin metût sù a fuarce di vitis une biele comedie (Pieri Somede dai Marcs, In teatro)
    Sin. imbastî¹ , inmaneâ , dâ dongje , fâ , meti adun , meti dongje , vierzi , tacâ
12. loc.v. imponi o contâ une spese, un contribût:  cuissà ce tasse di famee che mi meteve sù… cun chê famee che o ai jo, sôl come un cjan! (Pieri Somede dai Marcs, Une scarpute)
    Sin. fissâ , imponi , cjamâ , cjariâ
13. loc.v. meti alc tal fogolâr o te stue o sul fûc par che al brusi:  "Sù, sù dati coragjo Rose, il Signôr ti judarà, bute vie un pôcs di pinsîrs, al è Nadâl, vin di sei ducj in pâs…" "A podêlu… pai, no ise ore di meti sù la çocje?" (Pieri Somede dai Marcs, Vilie di Nadâl (teatri)); flame no 'nd jere plui, ma dome un côl di boris rossis. Al metè sù doi tocs di len e al vierzè il respîr par che a cjapassin miôr (Carlo Sgorlon, Prime di sere)
14. loc.v. meti a cuei:  "Servît un fiasc di chel bon in tinel e dopo meteit sù il cafè" (Costantino Smaniotto, Co l'amôr al cimie); jê si scunfusionà dute par meti sù la mignestre, parcè che no veve plui une idee di fâ di mangjâ (Jolanda Mazzon, Di là de rêt)
15. loc.v. fâ lâ tun aparât, tun implant, soredut di riproduzion di musiche, video e v.i.:  al tacà il gramofon e al metè sù il toc plui biel dai Spiders From Mars, "Starman" (Checo Tam, Sense)
16. loc.v. fâ che cdn. al sedi in contrast cun cdn. altri:  "Che nol stedi a lassâsi simpri meti sù di chê femine cuintri di me!" (Ercole Carletti, Mariute); la Luzie e cirive saldo di meti sù ducj e alçâ mûrs di cjacaris fra lôr e lis fameis. Peçots dome a nivel dai curtîi, va ben, ma cun dut achel a siôr Bertin i jere scomençât il batiment di cûr (Maria Forte, Cjase di Dalban)
17. loc.v. meti cdn. tun puest di podê:  ["chei de fasse"] no jerin ben viodûts di nissun: ni dai todescs, che no si contentavin mai di nuie, ni dai nestris che a scrupulavin che ju vessin metûts sù i mucs par spionâ in paîs (Alviero Negro, I piavots, Titon e la spagnole)
18. loc.v. fâ jentrâ in vore:  il rît aquileiês lu à butât jù lui [sant Paulin] e al à metût sù il messâl franc (Francesc Placerean, La nestre storie)
    Sin. istituî

Components:

• meti v.tr.
• sù av., inter., s.m.inv., adi.inv.

Proverbis:

• cuant che no 'nd è te panarie, dibant meti sù la cjalderie
• la cjarte si lasse meti sù ce che si vûl