Dizionari de Lenghe Furlane

butâ sù    [AF]

1. loc.v. butâ in alt o parsore di alc:  a vevin butât sù un clap tal scûr di un barcon (Maria Forte, Cjase di Dalban); il fantat al butà sù na grampada di stecs sul fogolâr (Novella Cantarutti, La aga di Plan da li steli)
2. loc.v. fâ alc che al compuarte che si tiri fûr materiâl:  a vevin un pôc di lavôr a butâ sù fossai o cjaveçâi (Alviero Negro, Setimio)
3. loc.v. vê un moviment inviers dal alt:  al de un tiron: dute la polente si movè come une farcadice cuant che e bute sù (Riedo Pup, Chei di Martrent)
4. loc.v. meti in plui, zontâ a di une cierte cuantitât o a alc che al è za:  par fâ tasê la Mabile, al jere stât butât sù [in plui de part juste di ereditât] un stricut di tiere (Maria Forte, Mabile la Lunghine)
   Sin. meti sù
5. loc.v. (ancje ass.) jessi la origjin di un fenomen atmosferic, in particolâr di nûi e temporâi:  a mieze matine il siroc al si tacà a butâ sù, e dopo vê cjariât in premure, al molà jù di mostre un prin scjas di ploie (Luigi Gortani, Al marcjât di Vile); «Al è il Garda, al è il Garda che al bute sù» (Alan Brusini, Come tai romançs)
   
   1. di nûi o temporâi, vignî cuintri di cui che al fevele o di un ciert pont di riferiment:  la int a cjalavin chei zovins che nancje no alçavin i voi par spesseâ a finî la vore se là sù daûr al butave sù il burlaç (Dino Virgili, La aghe da pît la cleve)
      Sin. dâ sù
6. loc.v. (ancje ass.) fâ vignî fûr odôrs
   
   1. di odôr, vignî fûr e spandisi:  dal pocit al bute sù un brut odôr

Components:

• butâ v.tr., v.intr.
• sù av., inter., s.m.inv., adi.inv.