Dizionari de Lenghe Furlane

sù  sù  [FO]

1. av. in posizion alte, tun puest alt, bande di alc o di cdn. che al è adalt e v.i.:  al sint la vôs de femine po al cjale sù e al viôt chê biele fantatel (Andreina Nicoloso Ciceri, Blancje come la nêf - Racconti popolari friulani I); e jere corude sù in cjamare a cjoli un cussin (Pieri Menis, Chei di Muraie)
   Sin. adalt , insù
   Cfr. sore , parsore , disore
   
   1. a cuote alte o tun puest a cuote alte:  a jerin tornâts a stâ sù, in mont, intun stali metût a gnûf (Gianfranco Pellegrini, Cidulis)
   2. a Nord o intun puest a Nord:  al à començât a lavorâ de mê etât in Calabrie te cjase di famee, dopo al è vignût sù in Friûl, bandis di Pontebe, a fâ galariis (AAVV, Sul florî); Zili al leve ogni dì a vore a Glemone, sù a buinore e jù la sere (Alan Brusini, Amîs come prime)
2. av. in riferiment a un valôr, un pês, une cuantitât e v.i.., in cuantitât grande o plui grande:  i presits a vadin sù che a consolin, dì par dì (Josef Marchet, Il pietin e il grop)
   Sin. insù
3. av. in funzion, in cjarie, spec. intune posizion jerarchiche alte, in posizion di podê:  "Se a fossinsù i comuniscj…! Almancul il plevan e i massepassûts, picjâts te sô gabane, a saressin fûr dai tabars" (Alviero Negro, La cjase); "Viôt di stâ sù president fin che tu âs finide cheste vore […]" (Adrian Cescje, Memoriis di politiche linguistiche)
4. av. intune posizion o colocazion specifiche, massime di un ogjet o imprest, tal so puest:  se tu ûs, podìn entrâ: je sù la clâf (Pieri Çorut, Par lis gnocis Percût-Braçà)
5. av. sveât, no a durmî:  e tignive in dret la cjase; e e jere sù prime di ducj, scuasit prime che la zornade e ves lusôr di albe (Maria Forte, Cjase di Dalban); son stâts sù dute la gnot (Catarine Percude, Il voli di chest mont)
   Sin. in pîts , impins
6. av. spec. di une costruzion, cu la struture che e je impins, in esistence:  dilunc lis stradis de citât a son sù ancjemò mûrs di toressis e di palaçs (Adrian Cescje, Viaç aes origjins dal Logos); sì, chê grande cjase e je ancjemò sù, no stâ a bacilâ (Enrico Martina, Ricuarts e inlusions)
7. av. spec. di vistîts, scarpis e v.i., intor dal cuarp:  l'utent al varà di presentâsi inte zornade e inte ore concuardade, cun sù la mascarute (Aministrazion Publiche, Orari Ufici Licencis ETPI); al veve sù nome che une cjamese liule (Gianluca Franco, Il solt di Arlunc)
   Sin. aduès , induès , intor
8. av. suntune superficie:  une zovine e sta picjant dai manifescj cun sù scrit il program des esibizions (Checo Tam, La maree nere); sot il ferâl al jere il clap cul non di Rivuinis di sù (Dino Virgili, La aghe da pît la cleve)
9. av. dentri tun veicul:  doi fantats che a jerin là sot, ducj sanganâts […] o verin […] a pene il timp di strissinâju sù te nestre machine e scjampâ di corse (Pieri Menis, Sul agâr)
10. av. sul fûc, a scjaldâsi, a boli, a cueisi:  Margarite e Arduin a jerin za daûr a meti sù il prin cafetut de zornade (Antescûr, L'om misteriôs); ise za sù la aghe pe polente?
11. inter. ancje ripetût, par sburtâ o ancje par criticâ, mostrâ che si è in disacuardi, che no si crôt e v.i.:  «Sù, bevêt… vuê e je fieste grande…» e cussì bocâi e bocâi di vin a metevin colôr su lis musis dai invidâts (Pieri Menis, Chei di Muraie); "Sù, sù, fra amîs, al po cjacarâ cun libertât" (Angelo Covazzi, Il gnûf plevan); "Sù, sù, Linde, no stâ rabiâti!" (Pieri Somede dai Marcs, Barbane); al saveve che Jacum nol diseve cussì par tristerie, ma si sintì ferît: "Sù, Jacum! Ti ai pûr dit che no bevarai altri" (Amedeo Giacomini, Tal ospedâl)
12. s.m.inv. in gjenar in corelazion cun jù, part alte di une forme, di un moviment, di une dinamiche e v.i.:  al travierse la plane, mugnestri e sglonf di pâs, dopo il sù e jù des culinis (Raffaele Serafini, Altris contis di famee)
13. adi.inv. che al sta parsore par posizion, impuartance, jerarchie, bêçs, capacitâts e v.i.:  par solit lu clamavin a sunâ tai sposalizis o in ocasion di cualchi batisim di int sù (Gianni Gregoricchio, Pollione Magrini)

Polirematichis e espressions idiomatichis

• alçâ sù loc.v.
• butâ sù loc.v.
• cence meti sâl sù loc.av.
• cjapâ sù loc.v.
• cjapâsi sù loc.v.
• cjoli sù loc.v.
• cjolisi sù loc.v.
• culà sù loc.av.
• cumbinâ sù loc.v.
• dâ sù loc.v.
• dâ sù il sanc tal cjâf loc.v.
• dâ sù la fumate loc.v.
• dâ sù la vôs loc.v.
• dâle sù loc.v.
• di rive sù loc.av., loc.adi.inv.
• dî sù loc.v.
• dî sù di dut loc.v.
• dilunc sù loc.av., loc.prep.
• fâ sù loc.v.
• fâ sù un pinsîr loc.v.
• fâ vignî sù il futar loc.v.
• fâ vignî sù il madron loc.v.
• fâ vignî sù la ostie loc.v.
• filâ sù loc.v.
• in sù loc.av., loc.adi.inv.
• jevâ sù loc.v.
• jevâsi sù loc.v.
• là sù loc.av.
• lâ sù loc.v.
• lâ sù cui agns loc.v.
• lâ sù pal stec loc.v.
• lenti sù loc.av.
• mandâ sù loc.v.
• mangjâ sù loc.v.
• menâ sù loc.v.
• meti sù loc.v.
• meti sù buteghe loc.v.
• meti sù cjase loc.v.
• meti sù famee loc.v.
• meti sù la creste loc.v.
• molâ sù dut loc.v.
• montâ sù loc.v.
• pacagnâ sù loc.v.
• par sù loc.av., loc.adi.inv.
• par sù e par jù loc.v.
• parâ sù loc.v.
• parâ sù la musse loc.v.
• pensâ sù loc.v.
• pensâi sù loc.v.
• pôc sù pôc jù loc.av.
• pocâ sù loc.v.
• rivâ sù loc.v.
• saltâ sù loc.v.
• sbilfâ sù loc.v.
• stâ sù loc.v.
• sù di là loc.av.
• sù di zîrs loc.av., loc.adi.inv.
• sù e jù loc.av., loc.s.m.inv.
• sù mo loc.inter.
• sù mo sù loc.inter.
• sù pai dêts loc.av.
• sù par loc.prep.
• sù par jù loc.av.
• sù par là loc.av.
• sù po loc.inter.
• sù po sù loc.inter.
• tacâ sù loc.v.
• tignî sù loc.v.
• tignî sù il balon loc.v.
• tignî sù la anime loc.v.
• tignî sù la barache loc.v.
• tignî sù la vene loc.v.
• tignî sù trê cjantons de cjase loc.v.
• tignî sù trê cjantons di cjase loc.v.
• tirâ sù loc.v.
• tirâ sù cul nâs loc.v.
• tirâ sù di cane loc.v.
• tirâ sù di cuarde loc.v.
• tirâ sù i cantins loc.v.
• tirâ sù i passarats loc.v.
• tirâ sù i scarpets loc.v.
• tirâ sù i stivâi loc.v.
• tirâ sù il grumâl loc.v.
• tirâ sù il nâs loc.v.
• tirâ sù lis maniis loc.v.
• tirâ sù lis spalis loc.v.
• tirâ sù pal spêt loc.v.
• tirâlis sù loc.v.
• tirâsi sù loc.v.
• tirâsi sù lis maniis loc.v.
• tornâ sù loc.v.
• vê sù loc.v.
• vêle sù loc.v.
• venti sù loc.av.
• vignî sù loc.v.
• vignî sù chei cinc minûts loc.v.
• vignî sù i cinc minûts loc.v.
• vignî sù il futar loc.v.
• vignî sù il mat loc.

Proverbis:

• a fuarce di cori sù e jù, ancje la cuarde e fruie la piere dal poç
• a Sant Simon si tire sù la cjalce e il scufon
• daspò cjapât sù trê voltis il fûs a une fantate, si sclape la fave
• Sant Scugnî al fâs lâ di rive sù