Dizionari de Lenghe Furlane

sore  /-ó-/-ò-/  so|re  [FO]

1. prep., av., adi.inv. al segne la posizion di alc metût suntun supuart o su di une base:  sore la taule taronde cu la tavaie blancje e je prontade une cjicare sul plat e il tavaiuç (Alan Brusini, Gian Paolo Linda, I forescj); no je distudade ancjemò, tai nestris paîs, la voie di meti un modon sore chel altri (Francesc Placerean, La vite di chest mont, cence un pôc di spirt, e devente brute e insopuartabile)
   Sin. insom , su , sù , parsore , disore
   
   1. (fig.) al segne fonde teoriche, sostegn morâl e v.i.:  il Cristianisim […] al è plantât sore un fat che si presente come storic, sucedût culì, tal nestri mont, tal mieç dai umign (Francesc Placerean, La Pasche)
2. prep., av., adi.inv. intor e a contat cun alc:  e meteve sù, par provâle, une viestute turchine clare, ben setade sore il so cuarp (Agnul di Spere, Spietant); freiava un pâr di voltis la lama su la magna de la cjamesa par netâla dal pantan che gji si jera fermât sora nel uçâla (Federigo Comelli, Il me paîs)
   Sin. su , sù , parsore , intor , disore
   
   1. ancje par segnâ la posizion suntun o intun supuart di scriture, piture e v.i.:  une pergamene cun sore un steme ripartît a mitât par lunc (Franco Marchetta, La bandiere di Bertrant)
   2. (fig.) par indicâ une incombence, un pericul, une menace e v.i.:  il sens di colpe dai Ebreus viers Diu che ju compagnave simpri, il sens dal mâl simpri sore che no ju bandonave mai (Adrian Cescje, Viaç aes origjins dal Logos)
3. prep., av., adi.inv. par segnâ posizion plui alte a pet di alc ancje cence contat:  avions che si alcin dal aeropuart. Tun minût i avions a son sore il mâr (Agnul di Spere, Il puint de ledre); al era il ciel sora di lour, un grant ciel larc cença cunfins (Novella Cantarutti, Il Bolp)
   Sin. su , sù , parsore , disore , adalt
   
   1. ancje par segnâ une posizion di anterioritât intun test:  inalore, par ce che si à dit sore, lis comunitâts a) cun lenghe diferente dal talian e b) minoritariis, a son chestis dodis […] (Adrian Cescje, Memoriis di politiche linguistiche)
      Sin. parsore , disore , prime¹ , prin , adalt
4. prep., av., adi.inv. (fig.) in posizion plui alte in prioritât, jerarchie, responsabilitât, control, domini, disponibilitât economiche e v.i.:  il palaç imperiâl, il centri dal comant sore dut il mont todesc e intodescjât (Agnul di Spere, Un cidinôr todesc); un bon predi al veve simpri di tasê cun chei sore e di vosâur a di chei sot (Antoni Beline, Pre Pitin)
   Sin. su , sù , parsore , disore , adalt
5. prep., av., adi.inv. par segnâ une posizion a nivel, altece o altitudin superiôr:  pes monts sore Trep di Cjargne a jerin a stâ i maçarots (Josef Cjargnel, I maçarots di Trep); scurtadis lis cotulis fin sore il zenoli (Alan Brusini, Chei de vuere dal '15)
   Sin. su , sù , parsore , disore , adalt
   
   1. par segnâ une posizion plui setentrionâl:  i storics a lassin crodi che lis invasions a sein rivadis di sore injù (Josef Marchet, Cuintristorie dal Friûl fin sot la Italie)
   2. par segnâ une posizion plui a mont:  là sù in cima indulà che a nas la Miduna sora Frasseneit (Novella Cantarutti, Stradi pa la val da la Miduna)
6. av., prep. par introdusi un complement di argoment:  une altre Comission ristrete e tornà sore la leç inte Sierade di chel an (Adrian Cescje, Memoriis di politiche linguistiche); al disè alc sore de esistence di Diu (Agnul di Spere, Spietant); «Ce us parie la pensade di Zuan?» i domandà. «No sai ce dîti, fie mê» «Jo no i romp sore, … no vuei disgustâlu» (Maria Forte, La tiere di Lansing)
   Sin. su , sù , parsore , disore
7. prep., av., adi.inv. par segnâ un limit di numar, cuantitât, misure, valôr e v.i.:  lis aziendis sot dai 5 etars (piçulis) a jerin l'85,67%, chês tra i 5 e i 50 (medianis) a jerin il 16,20% e chês sore (grandis) l'1,13% (Adrian Cescje, Liniis di storie sociâl e economiche dal Friûl 1500 - 1800); par chei sore dai 65 agns, o vin invezit il dât de ricercje dal 1977/1978 che al rivuarde lis personis che chê volte a vevin plui di 45 agns (Linda Picco, Ricercje su la condizion sociolenghistiche dal furlan); sore dai 1300 °C e partìs la reazion dal zirconi cul vapôr de aghe produsint ossit di zirconi e idrogjen (Alessandro Pascolini, Il disastri de centrâl nucleâr di Fukushima Dai-ichi)
   Sin. parsore , disore , oltri , plui inlà , plui inlà di , di là , di là di
8. prep., av. par segnâ un compens, un premi, une paie e v.i.:  vuê di matine soi stade a mulin par mê sûr, che e je chê siorone che e sta culì dongje. O speravi che sore mi ves dât almancul un cuatri zumielis di farine (Catarine Percude, La fuiace de Madone); il [patriarcje] Trevisan al spesseà a rinunziâ a ogni dirit temporâl sul Friûl sore une buine indenitât in ducâts (Josef Marchet, Cuintristorie dal Friûl fin sot la Italie); ti prei, no stâ pandimi, ni fevelâ di alc, e jo sore ti fasarai un grant regâl (Andreina Nicoloso Ciceri, Lis striis - Racconti popolari friulani I)
   Sin. in cambi , in compens , parsore
9. prep., av. par segnâ une zonte:  lis cuistions plui minudis a deventin berdeis, i afaruts di aministrazion ordenarie a dismovin davois sore davois (Josef Marchet, Barufis); o pensi a mê mari e a gno pari che, par tirâ dilunc, a àn di scanâsi dut il dì e ancje sore a àn di viodi di me (AAVV, Sul florî)
   Sin. in plui , parsore , di prionte , cun di plui , dongje , di sore plui , ancjemò , inmò
10. s.m.sing. part alte, zone alte, part di alc che e je adalt:  la tampieste e à macolât dut il sore de machine
    Sin. disore , parsore

Polirematichis e espressions idiomatichis

• ancjemò sore loc.av.
• cence meti sâl sore loc.av.
• filâ sore loc.v.
• lâ sore la brucje loc.v.
• passâ sore loc.v.
• pensâ sore loc.v.
• pensâi sore loc.v.
• sore che loc.coniun.
• sore di loc.prep.
• sore di dut loc.av.
• sore gracie loc.av., loc.adi.inv.
• sore il dut loc.av.
• sore il nivel dal mâr loc.av., loc.adi.inv.
• sore nuie loc.av., loc.adi.inv.
• sore sere loc.av., loc.adi.inv., loc.s.f., loc.s.m.
• sul nivel dal mâr loc.av., loc.adi.inv.
• vê un frut sore filâ loc.v.

Proverbis:

• sore sâl nol è savôr, sore diu nol è signôr