Dizionari de Lenghe Furlane

ancjemò  an|cje|mò  [FO]

1. av. fin in chest moment, fin in chel moment, par segnâ une continuitât dal passât:  sul cricà dal dì, cuant che ancjemò e lusive la biele stele, lui jere za lât su la vore (Catarine Percude, Il solt del Signôr); la muse, segnade de fadie, e je ancjemò graciose (Marisa Moretti, Neveade); o ai ancjemò chê peraule tai miei pinsîrs (Checo Tam, Sic transit gloria mundi)
   Sin. inmò
   Var. encjemò , ancjimò , incjimò , incjemò , cjemò
   
   1. par segnâ une azion o alc che nol è za sucedût e che forsit al sucedarà tal avignî:  ""No son vignûts ancjamò?" (Federigo Comelli, Il me paîs); la cjase dai contents e je ancjemò di fâ sù! (Roman Michelot, La cjase dai contents)
2. av. une altre volte tal futûr:  se us vegnin ancjemò al viers, us prei mandaitju a cjase mê (Luigi Gortani, La ospitalitât)
   Sin. di gnûf , une altre volte , inmò
   
   1. tant che esclamazion, par domandâ di ripeti alc:  «Disimi "Cuc"!, ancjemò!» (Dino Virgili, La aghe da pît la cleve)
      Sin. inmò
3. av. in determinazions di timp passadis, par segnâ un principi, un inizi:  la faide tra chestis dôs fazions e scomence ancjemò in ete patriarcjine (Carli Pup, Il Friûl de Joibe Grasse dal 1511); cetante fam che o ai scugnût sopuartâ ancjemò di piçule! (Carlo Tolazzi, La salamandrie tal fûc); si jerin plasûts ancjemò di canais… lant par cjase (Maria Forte, Il tei); al à spiegât e justificât cussì la sô sielte politiche democristiane, fate ancjemò di zovin (Riedo Pup, Mizzau al bat Pitt un a zero)
   Sin. inmò , bielzà , benzà , za
   
   1. ancje in determinazions di spazi:  si sintive ancjemò di lontan la armoniche (Pieri Menis, Doro)
      Sin. inmò , bielzà , benzà , za
4. av. une altre volte tal passât:  mi par di vêti viodude ancjemò, ma no sai indulà (Alviero Negro, Riedo Pup, Blancje come la nêf)
   Sin. za , bielzà , benzà , inmò
5. av. par une altre volte:  par strade e butà ancjemò il voli su la cjase che i stave a cûr (Maria Forte, La tiere di Lansing)
   Sin. di gnûf , inmò
   
   1. par segnâ un altri element di une serie, o une azion che si ripet une altre volte:  a beverin ancjemò un tai e po Turo al cjolè il disturp (Roberto Ongaro, Il muc); ma aial di vignî ancjemò cualchidun… ? (Alviero Negro, Int di masnade); e dopo la prime crosere, ancjemò a çampe (Franco Marchetta, Light my Fire)
      Sin. ancje , inmò
6. av. par rinfuarçâ un comparatîf:  o vin une storie che purtrop e je pôc cognossude e ancjemò mancul insegnade te scuele (Pierino Donada, Insegnâ il furlan: oblic o oportunitât?); si sin tirâts plui sot dal barcon e o vin sunât indenant, cun plui cûr ancjemò (Meni Ucel, Serenadis)
   Sin. ancje , parfin , fintremai , inmò
7. av. in domandis retorichis o in espressions enfatichis, par rimarcâ alc che al varès di jessi za sucedût, che e sarès za stade ore:  "La finîso ancjimò?… / Isal bordel di fâ?… / La gnot je par durmî, no par cjassâ." (Pieri Çorut, Il Strolic mezan par l'an 1866)
   Cfr. po , mo , ve , cjo , gjo , almancul
8. av. par rinfuarçâ une cualsisei declarazion, par pandi maravee, indignazion e v.i.:  o vin ordin di fâus fûr parcè che o sês traditôrs e ancjemò o vês il coragjo di pretindi di usurpânus Trent e Triest! (Riedo Pup, L'armistizi dal '16)
   Sin. inmò , dongje , sore , parsore , fintremai , adiriture , di prionte , in plui , di plui , cun di plui , ancjemò sore , ancjemò dongje

Polirematichis e espressions idiomatichis

• ancjemò dongje loc.av.
• ancjemò sore loc.av.

Proverbis:

• ancjemò su lis peraulis no son dazis ni tassis