Dizionari de Lenghe Furlane

inmò  in|mò  [FO]

1. av. fin in chest moment, fin in chel moment, par segnâ une continuitât dal passât:  su dôs cjasis dal borc inmò si viodin lapidis datadis 1493 che a fevelin di un Jacum di Pauli Pelôs (Alan Brusini, Come tai romançs); lis trupis talianis a jerin scjampadis di buride, passant sul puint di Pinçan che al jere inmò in pîts e che al fo fat saltâ subit dopo par fermâ il nemì (Roberto Ongaro, Il muc)
   Sin. ancjemò
   
   1. par segnâ une azion o alc che nol è za sucedût e che forsit al sucedarà tal avignî:  lôr là jù no si rassegnavin inmò a crodi ae disgracie (Lucio Perès, Gno barbe Sisto); nissun inmò nol è stât bon di mostrâ il contrari (Josef Marchet, Cuarde e savon)
2. av. une altre volte tal futûr:  tu sês un tabaiot e guai se ti sint inmò a dî chês robis (Pieri Somede dai Marcs, Il prossim)
   Sin. di gnûf , une altre volte , ancjemò
3. av. in determinazions di timp passadis, par segnâ un principi, un inizi:  il guvier talian al à fate buine la European Charter for Regional and Minority Languages dal Consei di Europe (che e jere stade firmade inmò tal 2000) dome tal 2012 (Mario Dutto, Scuelis di cualitât e lenghis di minorance. Une riflession su la lenghe furlane intes scuelis)
   Sin. ancjemò , bielzà , benzà , za
   
   1. ancje in determinazions di spazi:  lis flamis si viodevin inmò di lontan
4. av. une altre volte tal passât:  Rose, che lu veve viodût inmò in cjase sô, insiemi cun so fi, i fasè biel acet e i metè fûr di bevi (Roberto Ongaro, Il muc)
   Sin. za , bielzà , benzà , ancjemò
5. av. par une altre volte:  daspò di chê prime cognossince, Guido al tornà inmò e simpri plui da spes (Roberto Ongaro, Cretevierte); dôs saetis a sgriarin inmò il cîl, a luparin la campagne e il cuc lontan de Cleve di une lûs stranie (Dino Virgili, La aghe da pît la cleve)
   Sin. di gnûf , ancjemò
   
   1. par segnâ un altri element di une serie, o une azion che si ripet une altre volte:  daspò di vê spietât inmò doi dîs, a clamarin i carabinîrs (Roberto Ongaro, Cretevierte)
      Sin. ancjemò , ancje
6. av. par rinfuarçâ un comparatîf:  tal scûr si cjatave a sei inmò plui bessôl (Dino Virgili, La aghe da pît la cleve); dentri vie al jere pôc convint di chê vuere e inmò mancul di vincile (Roberto Ongaro, Il muc)
   Sin. ancje , parfin , fintremai , ancjemò
7. av. par rinfuarçâ une cualsisei declarazion, par pandi maravee, indignazion e v.i.:  rivât a disenûf agns, Bepo nol veve cognossût inmò che i boscs: taiâ i lens e fâ cjarbon (Pieri Somede dai Marcs, Co une vôs e clame); e inmò e à il difiet di sei une grant biele femine (Alan Brusini, Gian Paolo Linda, I forescj)
   Sin. ancjemò , dongje , sore , parsore , fintremai , adiriture , di prionte , in plui , di plui , cun di plui , ancjemò sore , ancjemò dongje